ក្រុមមន្ត្រីអ្នកការទូត បានឱ្យដឹងថា ក្រុមប្រឹក្សាសន្តិសុខអង្គការសហប្រជាជាតិ (UN) ទំនងជានឹងធ្វើការបោះឆ្នោតនៅថ្ងៃពុធសប្ដាហ៍នេះ លើសេចក្ដីព្រាងដំណោះស្រាយមួយ ដោយទាមទារឱ្យបញ្ចប់ជាបន្ទាន់នូវអំពើហិង្សានៅក្នុងប្រទេសមីយ៉ាន់ម៉ា និងជំរុញឱ្យរបបយោធាមួយនេះដោះលែងអ្នកទោសនយោបាយទាំងអស់ រួមទាំងអតីតមេដឹកនាំមីយ៉ាន់ម៉ាដែលត្រូវបានទម្លាក់ពីតំណែងគឺ លោកស្រី អ៊ុងសាន ស៊ូជី ផងដែរ។
យោងតាមសេចក្តីព្រាងដំណោះស្រាយ ដែលត្រូវបានពិនិត្យដោយទីភ្នាក់ងារសារព័ត៌មាន Reuters ក្នុងនោះ គេសង្កេតឃើញមានការលើកឡើងពី «ការព្រួយបារម្ភយ៉ាងខ្លាំង» ចំពោះស្ថានភាពនៃការដាក់ប្រទេសក្នុងគ្រាអាសន្នដែលកំពុងបន្តអនុវត្តដោយរបបយោធា នៅពេលដែលខ្លួនដណ្តើមអំណាចយកមកគ្រប់គ្រង ដែលបានបង្កជាផលប៉ះពាល់យ៉ាងធ្ងន់ធ្ងរលើប្រជាជនមីយ៉ាន់ម៉ា។
សេចក្តីព្រាងដំណោះស្រាយនោះជំរុញឱ្យមានការចាត់វិធានការជាក់ស្តែង និងជាបន្ទាន់នានា ដើម្បីអនុវត្តផែនការសន្តិភាពមួយដែលបានព្រមព្រៀង ដោយសមាគមប្រជាជាតិអាស៊ីអាគ្នេយ៍ (អាស៊ាន) ក្នុងនោះក៏មានការដាក់ចេញនូវការអំពាវនាវមួយឱ្យមានការបន្តកិច្ចសន្ទនាប្រកបដោយការស្ថាបនា និងការផ្សះផ្សាស្របតាមឆន្ទៈ និងផលប្រយោជន៍របស់ប្រជាជនផងដែរ។
គួរបញ្ជាក់ថា ដើម្បីអនុម័តសេចក្តីសម្រេចរបស់ក្រុមប្រឹក្សាសន្តិសុខ ត្រូវការសំឡេងគាំទ្រយ៉ាងហោចណាស់៩ ដោយមិនត្រូវមានការបោះឆ្នោតវេតូពីរុស្ស៊ី ចិន សហរដ្ឋអាមេរិក បារាំង ឬអង់គ្លេសឡើយ។
ប្រទេសមីយ៉ាន់ម៉ា បានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រងកាលពីខែកុម្ភៈ ឆ្នាំមុន និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស។
យោងតាមសមាគមជំនួយអ្នកទោសនយោបាយ (AAPP) ជនស៊ីវិលរាប់ពាន់នាក់ក៏ត្រូវបានសម្លាប់ដោយកងកម្លាំងសន្តិសុខមីយ៉ាន់ម៉ា ហើយមនុស្សរាប់ម៉ឺននាក់ផ្សេងទៀតក៏ត្រូវបានចាប់ខ្លួនផងដែរ គិតចាប់តាំងពីរដ្ឋប្រហារថ្ងៃទី១ ខែកុម្ភៈ ឆ្នាំមុន៕