ពលរដ្ឋជាង២០០នាក់ តំណាងឱ្យជាង៣០០គ្រួសារ បានប្រមូលផ្តុំតវ៉ានៅមុខសាលាឃុំឃុនរាម ស្រុកបន្ទាយស្រី ខេត្តសៀមរាប នៅថ្ងៃពុធនេះ ដើម្បីទាមទារឱ្យអាជ្ញាធរដោះស្រាយបញ្ហាដីធ្លីជូនពួកគាត់ តាមការសន្យាដែលបានធ្វើឡើងមុនពេលបោះឆ្នោតក្រុមប្រឹក្សាឃុំសង្កាត់។
ពលរដ្ឋរស់នៅភូមិខ្នារង្វាស់ ឃុំឃុនរាម លោក កែវ យឿន ប្រាប់វីអូឌីនៅថ្ងៃពុធនេះថា ពលរដ្ឋជាង៣០០គ្រួសារ និងដីប្រហែល៥០០ហិកតា ស្ថិតក្នុងឃុំឃុនរាម ស្រុកបន្ទាយស្រី កំពុងរងការរំលោភបំពានពីក្រុមហ៊ុនឯកជនមួយឈ្មោះ សុខគា ហ្គាដិន ឯ.ក ខណៈដីនោះ អ្នកភូមិបានចូលអាស្រ័យផលតាំងក្រោយសម័យប៉ុលពត។
ពលរដ្ឋរូបនេះបន្តថា គ្រួសារលោកបានប៉ះពាល់ដី៥ហិកតា និងផ្តើមមានជម្លោះជាមួយក្រុមហ៊ុនតាំងពីឆ្នាំ២០២១។ លោកថា អាជ្ញាធរឃុំធ្លាប់សន្យាថា នឹងចុះវាស់វែង ហើយចេញបណ្ណកម្មសិទ្ធិជូនពលរដ្ឋ ក្រោយបេក្ខភាពគណបក្សប្រជាជនកម្ពុជា ជាប់ឆ្នោតឃុំសង្កាត់ ប៉ុន្តែក្រោយបានជាប់ឆ្នោតហើយ ខាងអាជ្ញាធរទាំងនោះមិនបានដោះស្រាយជូនពលរដ្ឋតាមការសន្យាឡើយ។
លោកបន្ថែមថា៖ «ប្រជាពលរដ្ឋគាត់មកទាមទារបណ្ណកម្មសិទ្ធិ ព្រោះកាលមុនយើងបោះឆ្នោតហ្នឹង ពួកគាត់ដើរប្រកាសថា បើគណបក្សប្រជាជនជាប់ នឹងកាត់ឆ្វៀលដីឱ្យប្រជាពលរដ្ឋមានប្លង់រឹង។ ប៉ុន្តែឥលូវនេះ ជិតដល់ថ្ងៃបោះឆ្នោតទៀតហើយ អត់ទាន់ឃើញគាត់ធ្វើឱ្យទេ តែបែកធ្លាយក្រុមហ៊ុនបោះបង្គោលចូលដីពួកយើងវិញ។ អ៊ីចឹងពួកយើងភ័យខ្លាចបាត់បង់ដីយើង អ៊ីចឹងពួកយើងមកសួរនាំដើម្បីចង់ដឹងឱ្យច្បាស់»។
ពលរដ្ឋម្នាក់ទៀត លោក ប៉ី តិ ដែលអះអាងថាបានប៉ះពាល់ដី៤ហិកតា បានឱ្យដឹងថា ដីដែលប្រជាពលរដ្ឋកំពុងមានជម្លោះនោះជាប្រភេទដីស្រែ និងដីចម្ការ ដែលពលរដ្ឋធ្វើស្រែ ដាំដំឡូងមី ខ្នុរ ស្វាយ និងដំណាំហូបផ្លែផ្សេងៗទៀត។
ពលរដ្ឋរូបនេះបានឱ្យដឹងថា រូបលោក និងពលរដ្ឋផ្សេងទៀតកំពុងបារម្ភពីការបាត់បង់ដីធ្លី ដោយគ្មានដីសម្រាប់បង្កបង្កើនផលទៀត ប្រសិនបើអាជ្ញាធរមិនដោះស្រាយ និងចេញបណ្ណកម្មសិទ្ធិជូនពលរដ្ឋឱ្យបានឆាប់នោះទេ។ លោកថា ពលរដ្ឋតវ៉ានៅសាលាឃុំនេះ ដើម្បីទាមទារឱ្យអាជ្ញាធរចុះវាស់វែង កាត់ឆ្វៀល និងចេញបណ្ណកម្មសិទ្ធិជូនពលរដ្ឋតាមការសន្យា ខណៈដីរបស់ពួកគាត់មិនទាន់មានបណ្ណកម្មសិទ្ធិត្រឹមត្រូវ។
លោកបន្ថែមថា៖ «ប្រជាពលរដ្ឋគាត់មានការព្រួយបារម្ភ ដោយសារបច្ចុប្បន្ននេះ ខាងបរិស្ថានបានកាត់ដី ៥០០ហិកតា ពីឧទ្យានជាតិភ្នំគូលែន ឱ្យទៅក្រុមហ៊ុន សុខគា ហ្គាដិន ឯ.ក ដោយបានធ្វើឱ្យប៉ះពាល់ដល់ដីប្រជាពលរដ្ឋ។ ដូច្នេះហើយប្រជាពលរដ្ឋមានការព្រួយបារម្ភពាក់ព័ន្ធបញ្ហាខ្លាចក្រុមហ៊ុនផ្សេងៗយកដីធ្លីរបស់ពួកគាត់។ អ៊ីចឹងពួកយើងមកថ្ងៃនេះ យើងចង់ឱ្យអាជ្ញាធរមូលដ្ឋាននៅទីនេះ ពាំនាំក្តីកង្វល់របស់ពួកយើងទៅប្រាប់រដ្ឋាភិបាលឱ្យកាត់ឆ្វៀលដីឧទ្យានជាតិ ឱ្យពួកយើងបានអាស្រ័យដោយស្របច្បាប់»។
កាលពីខែឧសភា ឆ្នាំ២០២១ អគ្គនាយកក្រុមហ៊ុន សុខគា ហ្គាដិន ឯ.ក លោក ឡាវ ណាំគាង បានដាក់សំណើទៅក្រសួងបរិស្ថាន ដើម្បីសុំកិច្ចសហការអចិន្ត្រៃយ៍ និងសុំទីតាំងដីទំហំ ៥០០ហិកតា ពីបរិវេណមជ្ឈមណ្ឌលស្រាវជ្រាវ និងអភិរក្សកេសរកូល សុខអាន ភ្នំគូលែន នៃឧទ្យាជាតិព្រះជ័យវរ្ម័ន នរោត្តម ស្ថិតក្នុងខេត្តសៀមរាប ដើម្បីបង្កើតគម្រោង «កសិដ្ឋានសួគ៌ាមហេន្ទ្របព៌ត» នៅក្នុងមជ្ឈមណ្ឌលមួយនេះ។
ជាការឆ្លើយតប ក្រសួងបរិស្ថាន បានយល់ស្រប និងអនុញ្ញាតតាមសំណើរបស់ក្រុមហ៊ុនមួយនេះ កាលពីថ្ងៃទី២៥ ខែវិច្ឆិកា ឆ្នាំ២០២១ ដោយក្រសួងបរិស្ថាន ឱ្យក្រុមហ៊ុន សុខគា ហ្គាដិន សហការជាមួយក្រសួង ដើម្បីរៀបចំអនុសារណៈនៃការយោគយល់ ស្តីពីកិច្ចសហការនៃគម្រោងនេះ។
មេឃុំឃុនរាម លោក កាយ កុច ប្រាប់វីអូឌីថា មានពលរដ្ឋជាង៥០គ្រួសារប៉ុណ្ណោះដែលបានប៉ះពាល់ពីគម្រោងអភិវឌ្ឍន៍នៅតំបន់ឧទ្យានជាតិព្រះជ័យវរ្ម័ន នរោត្ដម (ភ្នំគូលែន) ខណៈលោកមិនចាំទំហំដីដែលពលរដ្ឋអាស្រ័យផលជាក់លាក់។
លោកបន្តថា មុនបោះឆ្នោតក្រុមប្រឹក្សាឃុំសង្កាត់ អាជ្ញាធរនៅមូលដ្ឋានបានសន្យាដាក់សំណើទៅថ្នាក់លើ សុំកាត់ឆ្វៀលដីពីតំបន់ឧទ្យានជាតិ ឱ្យពលរដ្ឋបានអាស្រ័យផល និងមានបណ្ណកម្មសិទ្ធិពិតមែន ហើយអាជ្ញាធរក៏បានដាក់សំណើនេះទៅថ្នាក់លើរួចហើយដែរ ប៉ុន្តែមិនទាន់មានការឆ្លើយយ៉ាងណានៅឡើយ។
ជុំវិញករណីពលរដ្ឋប្រមូលផ្តុំនៅសាលាឃុំ នាព្រឹកមិញនេះ មេឃុំរូបនេះនៅមិនទាន់អាចឆ្លើយថាយ៉ាងណានៅឡើយ ដោយលោករង់ចាំថ្នាក់លើសម្រេចសិន។ លោកថា ពលរដ្ឋបាននាំគ្នាត្រលប់ទៅផ្ទះវិញ ក្រោយលោកសន្យាផ្តល់ចម្លើយទៅពលរដ្ឋវិញ នៅពេលទទួលបានការឆ្លើយតបពីថ្នាក់លើ។
លោកបន្ថែមថា៖ «តាមពិតយើងបានដាក់ស្នើទៅថ្នាក់លើអស់ហើយ ដើម្បីកាត់ឆ្វៀលដីពីឧទ្យានជាតិហ្នឹងជូនពលរដ្ឋអាស្រ័យផល និងមានបណ្ណសម្រាប់ប្រើប្រាស់ ហើយយើងបានជួបប្រជុំពិភាក្សាជាមួយក្រសួងបរិស្ថានជាច្រើនលើកច្រើនសាហើយដែរ ដើម្បីសរុបទិន្នន័យថាស្នើសុំប៉ុន្មាន! ត្រឹមណាដែលយើងអាចស្នើសុំបាន! ពួកខ្ញុំបានធ្វើអស់ហើយ ប៉ុន្តែរង់ចាំតែការសម្រេចពីថ្នាក់លើមកទេ»។
វីអូឌី មិនអាចសុំការបញ្ជាក់ពីប្រធានមន្ទីរបរិស្ថានខេត្តសៀមរាប លោក ស៊ុន គង់ និងអភិបាលស្តីទីស្រុកបន្ទាយស្រី លោក ភាន់ សុខុម បានទេ នៅថ្ងៃពុធនេះ ដោយទូរសព្ទចូល គ្មានអ្នកទទួល។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ប្រសិនបើអាជ្ញាធរបានសន្យាជួយដោះស្រាយដីធ្លីនោះជូនពលរដ្ឋពិតមែន ប៉ុន្តែមិនបានធ្វើតាមការសន្យានោះ គឺបង្ហាញពីការមិនទទួលខុសត្រូវចំពោះពលរដ្ឋដែលជាម្ចាស់ឆ្នោត។
មន្ត្រីសិទ្ធិមនុស្សរូបនេះកត់សម្គាល់ឃើញថា មួយរយៈចុងក្រោយនេះ បញ្ហាវិវាទដីធ្លីហាក់ផ្ទុះឡើងវិញ ខណៈយន្តការដោះស្រាយដីធ្លីរបស់រដ្ឋាភិបាលមានភាពអសកម្ម និងមិនដំណើរការ ដែលបញ្ហានេះបានធ្វើឱ្យពលរដ្ឋបន្តរងទុក្ខលំបាក និងមានជីវភាពខ្វះខាតដោយសារការបាត់បង់ដីធ្លី។
មួយទៀតនោះ លោកថា ករណីដែលរដ្ឋាភិបាលកាត់ដីតំបន់ការពារឱ្យក្រុមហ៊ុនឯកជន ប៉ុន្តែមិនកាត់ឆ្វៀលជូនប្រជាពលរដ្ឋនោះ គឺបង្ហាញពីអសមត្ថភាពនៃការបែងចែកដីធ្លីរវាងពលរដ្ឋក្រីក្រ និងអ្នកមានលុយមានអំណាច។
លោកបន្ថែមថា៖ «កន្លែងហ្នឹង រដ្ឋាភិបាល ក៏ដូចជាក្រសួងមានសមត្ថកិច្ច និងអ្នកគ្រប់គ្រងយន្តការដោះស្រាយដីធ្លី ពិចារណាឡើងវិញ ក្នុងការដោះស្រាយបញ្ហាដីធ្លីជូនពលរដ្ឋ។ រហូតមកដល់បច្ចុប្បន្ននេះ យើងកត់សម្គាល់ឃើញថា យន្តការដោះស្រាយដីធ្លីក្រៅប្រព័ន្ធតុលាការហ្នឹង ឃើញថាអត់ដំណើរការទេ គឺនៅទ្រឹង! ហើយរឿងទំនាស់ដីធ្លីហ្នឹងនៅមានបន្តទៀត ហើយរឿងថ្មី វាចេះកើនឡើង ដែលវាផ្ទុយពីរបាយការណ៍របស់ក្រសួងពាក់ព័ន្ធមួយចំនួនដែលថាទំនាស់ដីធ្លីរបស់ប្រជាពលរដ្ឋមានការថយចុះ»។
កាលពីថ្ងៃទី៨ ខែកុម្ភៈ សមាគមការពារសិទ្ធិមនុស្សអាដហុក បានចេញរបាយការណ៍មួយដោយរកឃើញថា ក្នុងឆ្នាំ២០២១ ប្រជាពលរដ្ឋចំនួនជិត ២ម៉ឺនគ្រួសារ (១៧ ០៣៣គ្រួសារ) បានរងផលប៉ះពាល់ដោយសារវិវាទដីធ្លី ដែលមានទំហំជាង៥០ ០០០ហិកតា (៥២ ៦០១,៨៧ហិកតា)។
អាដហុក ឱ្យដឹងទៀតថា មានពលរដ្ឋរងគ្រោះដីធ្លី ១៥៧នាក់ កំពុងជាប់បណ្ដឹងអាជ្ញា និងដាក់ឱ្យស្ថិតក្រោមការត្រួតពិនិត្យពីតុលាការ ខណៈជនរងគ្រោះ ១៧នាក់ទៀត កំពុងឃុំខ្លួនបណ្ដោះអាសន្នក្នុងពន្ធនាគារ ដោយសារការតវ៉ាទាមទារដីធ្លីរបស់ខ្លួន៕
