ធនាគារពិភពលោក ផ្ដល់ហិរញ្ញប្បទាននូវទឹកប្រាក់ចំនួន២៧៤លានដុល្លារអាមេរិក សម្រាប់ជួយដល់កម្ពុជាក្នុងការស្ដារសេដ្ឋកិច្ចឱ្យងើបឡើងវិញ និងពង្រឹងភាពធន់យូរអង្វែង ក្រោយកម្ពុជារងការប៉ះទង្គិចពីវិបត្តិកូវីដ-១៩។
សេចក្តីប្រកាសព័ត៌មានរបស់ធនាគារពិភពលោក ចុះថ្ងៃទី២០ ខែធ្នូ ឆ្នាំ២០២២ បានឱ្យដឹងថា ហិរញ្ញប្បទាននូវទឹកប្រាក់ចំនួន២៧៤លានដុល្លារ ដែលទើបនឹងត្រូវបានក្រុមប្រឹក្សានាយកប្រតិបត្តិរបស់ធនាគារពិភពលោកអនុម័តរួច នឹងជួយដល់កំណែទម្រង់សម្រាប់ជំរុញកំណើនសេដ្ឋកិច្ច និងពង្រឹងភាពធន់របស់កម្ពុជា។
សេចក្តីប្រកាសព័ត៌មាន បន្តទៀតថា ការវិភាគទិន្នន័យបានបង្ហាញថា អត្រានៃភាពក្រីក្របានកើនឡើងចំនួន ២,៨ភាគរយ ដោយរុញមនុស្សប្រហែល ៤៦០ ០០០នាក់ ឱ្យធ្លាក់ក្នុងភាពក្រីក្រវិញ។ បើទោះជាសេដ្ឋកិច្ចបានងើបឡើងវិញនៅឆ្នាំ២០២១ និង២០២២ ប៉ុន្តែបរិយាកាសចុះខ្សោយនៅខាងក្រៅ មានន័យថា លទ្ធភាពវិលទៅទទួលបានអត្រាកំណើនដ៏រឹងមាំដែលធ្លាប់មាននៅមុនការផ្ទុះជំងឺរាតត្បាត ពិតជានឹងមិនងាយរកបានទេ។
ប្រភពដដែលបន្តទៀតថា សង្គ្រាមដែលនៅបន្តមាននៅក្នុងប្រទេសអ៊ុយក្រែន ការធ្លាក់ចុះនៃសេដ្ឋកិច្ចនៅសហរដ្ឋអាមេរិក ដែលជាទីផ្សារនាំចេញដ៏ធំបំផុតរបស់កម្ពុជា និងកំណើនយឺតនៅក្នុងប្រទេសចិន ក៏នឹងជះឥទ្ធិពលមិនល្អទៅលើទស្សនវិស័យពាណិជ្ជកម្មរបស់កម្ពុជា ខណៈប្រទេសនេះក៏ងាយរងគ្រោះខ្លាំងពីផលប៉ះពាល់នៃការប្រែប្រួលអាកាសធាតុផងដែរដោយសារត្រូវប្រឈមនឹងទឹកជំនន់ និងគ្រោះរាំងស្ងួតញឹកញាប់។
ធនាគារពិភពលោក បានគូសបញ្ជាក់ថា៖ «ហិរញ្ញប្បទាននេះនឹងទ្រទ្រង់ដល់កំណែទម្រង់ដែលនឹងសម្រួលដំណើរការចុះបញ្ជីអាជីវកម្ម លើកកម្ពស់ការប្រកួតប្រជែង និងពង្រីកលទ្ធភាពទទួលបានហិរញ្ញវត្ថុសម្រាប់សហគ្រាសធុនតូច និងធម្យម។ កំណែទម្រង់ផ្សេងទៀតនឹងបង្កើនភាពធន់នៃសារពើពន្ធ រួមទាំងការកែលម្អការគ្រប់គ្រងភាពជាដៃគូរវាងផ្នែកសាធារណៈ និងឯកជន និងការសម្រួលដល់ការលក់បណ្ណបំណុលរបស់រដ្ឋាភិបាលក្នុងទីផ្សារក្នុងស្រុក។ ប្រតិបត្តិការរបស់ហិរញ្ញប្បទាននេះ ក៏នឹងជួយសម្រួលដល់ការផ្តល់ជំនួយទាន់ពេលដល់ក្រុមគ្រួសារដែលងាយរងគ្រោះ ក្នុងករណីមានគ្រោះមហន្តរាយធម្មជាតិ ឬវិបត្តិសេដ្ឋកិច្ចណាមួយកើតឡើង»។
ប្រធានគ្រប់គ្រងធនាគារពិភពលោកប្រចាំកម្ពុជា លោកស្រី ម៉ារៀម សាលីម បានលើកឡើងនៅក្នុងសេចក្តីប្រកាសព័ត៌មាននេះដែរថា បើទោះបីយុទ្ធសាស្ត្រ «រស់ជាមួយកូវីដ-១៩» បានជួយស្តារសេដ្ឋកិច្ចឱ្យងើបឡើងវិញក៏ពិតមែន ប៉ុន្តែកម្ពុជានៅតែងាយរងគ្រោះដោយសារតែចរន្តធ្លាក់ចុះនូវតម្រូវការក្រៅប្រទេស និងការរអាក់រអួលនានាក្នុងខ្សែចង្វាក់ផ្គត់ផ្គង់សកលនៅឡើយ។
លោកស្រីបន្តថា៖ «ប្រតិបត្តិការរបស់ហិរញ្ញប្បទាននេះ នឹងជួយកម្ពុជាក្នុងការជំរុញភាពប្រកួតប្រជែងរបស់ផ្នែកឯកជន ពង្រឹងស្ថានភាពសារពើពន្ធរបស់កម្ពុជា និងផ្តល់ជំនួយដល់ប្រជាជនងាយរងគ្រោះបំផុតរបស់ខ្លួន»។
បើតាមសេចក្តីប្រកាសព័ត៌មានរបស់ធនាគារពិភពលោក សេដ្ឋកិច្ចរបស់កម្ពុជាបានរងការខូចខាតធ្ងន់ធ្ងរពីសំណាក់ជំងឺកូវីដ-១៩ ដោយធ្វើឱ្យផលិតផលក្នុងស្រុកសរុបបានធ្លាក់ចុះដក៣,១ភាគរយ ក្នុងឆ្នាំ២០២០ ដែលជាការធ្លាក់ចុះដ៏ខ្លាំងលើកដំបូងក្នុងរយៈពេល៣០ឆ្នាំចុងក្រោយនេះ៕