ធនាគារអភិវឌ្ឍន៍អាស៊ី (ADB) ផ្ដល់ប្រាក់កម្ចី និងជំនួយឥតសំណង មានតម្លៃសរុប ៣៦១,៤លានដុល្លារ ដល់កម្ពុជា ដើម្បីជំរុញទៅលើការអប់រំផ្នែកវិទ្យាសាស្ត្រ ពង្រីកសេវាថែទាំសុខភាពនៅតាមតំបន់ព្រំដែន គាំទ្រដល់ការចិញ្ចឹមសត្វដោយឆ្លាតវៃ និងវិស័យមួយចំនួនទៀត។
យោងតាមទំព័រហ្វេសប៊ុករបស់ធនាគារអភិវឌ្ឍន៍អាស៊ី ដែលបានផ្សព្វផ្សាយនៅថ្ងៃនេះ បានឱ្យដឹងថា ការផ្តល់ប្រាក់កម្ចី និងជំនួយឥណទាន នូវទឹកប្រាក់ចំនួន៣៦១,៤ លានដុល្លារនេះ បានធ្វើឡើងតាមរយៈការចុះហត្ថលេខាលើកិច្ចព្រមព្រៀងប្រាក់កម្ចី និងជំនួយឥតសំណង សម្រាប់គម្រោងចំនួន៦ រវាងធនាគារអភិវឌ្ឍន៍អាស៊ី (ADB) និងក្រសួងសេដ្ឋកិច្ច និងហិរញ្ញវត្ថុកម្ពុជា នៅថ្ងៃទី២២ ខែធ្នូ ឆ្នាំ២០២២។
ប្រភពដដែលបន្តថា រាប់ទាំងកិច្ចព្រមព្រៀងដែលបានចុះហត្ថលេខាថ្មីនេះ បានធ្វើឱ្យប្រាក់កម្ចី និងជំនួយសរុបរបស់ ADB សម្រាប់កម្ពុជាក្នុងឆ្នាំនេះ បានកើនដល់ ៥៧៦,៣លានដុល្លារ ដែលក្នុងនោះ ១៦៣,៧លានដុល្លារ ជាសហហិរញ្ញប្បទានពីដៃគូអភិវឌ្ឍន៍ផ្សេងទៀត។
ADB ថាគម្រោងថវិកាទាំងនេះនឹងជំរុញទៅលើការអប់រំផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM), ពង្រីកសេវាថែទាំសុខភាពនៅតាមតំបន់ព្រំដែន, ពន្លឿនការផ្លាស់ប្តូរថាមពលស្អាតរបស់ប្រទេស, ពង្រឹងពាណិជ្ជកម្ម និងការប្រកួតប្រជែង, គាំទ្រដល់ការចិញ្ចឹមសត្វដោយឆ្លាតវៃ (climate-smart livestock) និងផលិតកម្មជលផលសមុទ្រ នៅកម្ពុជា។
បើតាមព្រឹត្តិបត្រស្ថិតិបំណុលសាធារណៈកម្ពុជារបស់ក្រសួងសេដ្ឋកិច្ច គិតត្រឹមត្រីមាសទី៣ ឆ្នាំ២០២២នេះ កម្ពុជាមានបំណុលសាធារណៈសរុប ៩,៤៧ប៊ីលានដុល្លារអាមេរិកនេះ ក្នុងនោះ ជំពាក់ ADB ចំនួន ២០%, ចិន ៤១%, ជប៉ុន ១០%, កូរ៉េ ៥%, បារាំង ៥%, បំណុលមរតក មានចំនួន ៧%, ធនាគារពិភពលោក ៩% និងពហុភាគីផ្សេងទៀត៕