អាណាព្យាបាល និងបេក្ខជនដែលប្រឡងធ្លាក់សញ្ញាបត្រមធ្យមសិក្សាទុតិយភូមិ ប្រមាណ៥០នាក់ នៅថ្ងៃសុក្រនេះ បានប្រមូលផ្ដុំនៅមុខក្រសួងអប់រំ យុវជន និងកីឡា ដោយស្នើសុំពិនិត្យសំណៅកែលើវិញ្ញាសារប្រឡងរបស់ពួកគេឡើងវិញ ក្រោយពួកគេមិនអស់ចិត្តនឹងលទ្ធផលប្រឡង។
ការស្នើនេះបានធ្វើឡើងក្រោយពីក្រសួងអប់រំ យុវជន និងកីឡា បានប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅរាជធានីភ្នំពេញ និងតាមបណ្តាខេត្ត នៅថ្ងៃទី២២ និងទី២៣ ខែធ្នូ ឆ្នាំ២០២២។ បើតាមសេចក្តីប្រកាសព័ត៌មានរបស់ក្រសួង លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ មានសិស្សប្រឡងជាប់ចំនួន៩០ ៩៥០នាក់ ស្មើនឹង ៧២,៣៣% នៃចំនួនបេក្ខជនមកប្រឡង។
បេក្ខជនមកពីសាលាប៊ែលធីអន្តរជាតិ នៅរាជធានីភ្នំពេញ កញ្ញា ហ៊ីង បានម៉ាលីយ៉ា បានឱ្យដឹងថា តាមការប្រកាសលទ្ធផលប្រឡងកាលពីថ្ងៃម្សិលមិញ កញ្ញាបានធ្លាក់មុខវិជ្ជាភាសាខ្មែរ។ ករណីនេះ កញ្ញាបង្ហាញពីការមិនអស់ចិត្ត និងបានស្នើដល់ក្រសួងអប់រំ ដើម្បីពិនិត្យសំណៅកែលើវិញ្ញាសារប្រឡងលើមុខវិជ្ជាភាសាខ្មែររបស់កញ្ញាឡើងវិញ ថាតើពិតជាធ្លាក់មែនឬយ៉ាងណា ខណៈកញ្ញាអះអាងថាបានធ្វើមុខវិជ្ជានេះបានច្រើនដែរ។
កញ្ញាថា៖ «ពិនិត្យលើលទ្ធផលពិន្ទុខ្មែរ ដោយសារតែខ្ញុំធ្វើបានច្រើនដែរ តែចេញមកធ្លាក់ វាអត់ដូចអ្វីដែលខ្ញុំធ្វើអ៊ីចឹង។ យើងរៀនបានច្រើនហើយ យើងព្យាយាមអស់ពីលទ្ធភាពយើងហើយ តែចេញមក គឺធ្លាក់»។
កញ្ញាបន្ថែមថា៖ «ខ្ញុំគិតថា ពេលខ្លះយើងគួរតែពិនិត្យមើលពិន្ទុ ព្រោះអីយើងម្នាក់ៗគឺចង់ជាប់ទាំងអស់គ្នា ប្រឹងទាំងអស់គ្នាហើយ។ អ៊ីចឹងទៅ គាត់គួរតែជួយសើរើ ជួយពិនិត្យវិញដែរ។ គ្មាននរណាចង់ធ្លាក់ទេ គឺប្រឹងទាំងអស់គ្នា។ ហើយមកកន្លែងហ្នឹង ដឹងថាខ្លួនឯងធ្វើបានហើយ បានមកកន្លែងហ្នឹង»។
បេក្ខជនមកពីវិទ្យាល័យ ជា ស៊ីម ជ្រោយចង្វារ រាជធានីភ្នំពេញ កញ្ញា សំអាត លក្ខឆាឡាម បានលើកឡើងដែរថា នៅពេលកំពុងសិក្សា កញ្ញាជាសិស្សពូកែខាងមុខវិជ្ជាភាសាខ្មែរ ប៉ុន្តែលទ្ធផលប្រឡងចេញមកបែរជាកញ្ញាធ្លាក់មុខវិជ្ជានេះទៅវិញ ដែលធ្វើឱ្យទាញលទ្ធផលប្រឡងទាំងមូលទៅជាប្រឡងធ្លាក់។ ករណីនេះ កញ្ញាក៏បានបង្ហាញការមិនអស់ចិត្ត និងស្នើដល់ក្រសួងពិនិត្យសំណៅកែលើវិញ្ញាសាររបស់កញ្ញាឡើងវិញ។
កញ្ញានិយាយថា៖ «ដោយសារខ្ញុំអត់អស់ចិត្ត ដោយសារ[មុខវិជ្ជាភាសា]ខ្មែរ ព្រោះអីខ្ញុំអត់ដែលប្រឡងធ្លាក់ខ្មែរ ឃើញលទ្ធផលខ្មែរធ្លាក់ ខ្ញុំអត់អស់ចិត្ត […] អាចនឹង[មកពី]ប្រព័ន្ធកុំព្យូទ័រ មិនអ៊ីចឹងទេអ្នកគ្រូ វា[អាចមកពីមូលហេតុ]ទាំងពីរហ្នឹង»។
វីអូឌី មិនអាចសុំការឆ្លើយតបពីអ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានទេ នៅថ្ងៃសុក្រនេះ។
បើតាមក្រុមបេក្ខជនដែលប្រឡងធ្លាក់ទាំងនោះ នៅអំឡុងពេលប្រមូលផ្ដុំនៅមុខក្រសួងអប់រំ គឺខាងមន្ត្រីក្រសួងបានចេញទៅជួបពួកគាត់ និងបានឱ្យពួកគាត់ដាក់សំណើជាលាយលក្ខណ៍អក្សរ ដើម្បីឱ្យក្រសួងពិនិត្យនិងរកដំណោះស្រាយ។
ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី សង្កេតឃើញថា ការតវ៉ារបស់មាតាបិតា និងសិស្សានុសិស្ស លើលទ្ធផលនៃការប្រឡង តែងតែកើតមានស្ទើរជារៀងរាល់ឆ្នាំ ដែលអាចបណ្តាលមកពីខុសបច្ចេកទេសតាមរយៈកុំព្យូទ័រ និងខ្លះទៀតតាមរយៈអនុរក្សផ្ទៀងផ្ទាត់មិនបានត្រឹមត្រូវ ជាដើម។
លោកស្រីបន្ថែមថា តាមរយៈកំហុសដែលក្រសួងធ្លាប់មានកន្លងមក ក្រសួងគួរតែបន្ថែមការយកចិត្តទុកដាក់ និងធានារាល់ការដំណើរការនៃការកែវិញ្ញាសារ ត្រូវតែជាក់ច្បាស់។
លោកស្រីថា៖ «ប៉ុន្តែខ្ញុំមិនយល់ថា ហេតុអ្វីបានត្រួតពិនិត្យកន្លែងហើយនៅតែមានបញ្ហាកើតឡើង? ធ្វើឱ្យ[មានការ]មិនទុកចិត្តរបស់ពលរដ្ឋបែបនេះ។ អ៊ីចឹងក្រសួងអប់រំ គួរតែពិចារណាម្ដងទៀត មុននឹងធ្វើអ្វី មិនឱ្យមានអ្នកតវ៉ា»។
កាលពីថ្ងៃទី១៧ ខែមករា ឆ្នាំ២០២២ ក៏មានបេក្ខជនប្រឡងធ្លាក់បាក់ឌុបប្រមាណជិត ២០០ នាក់ បានប្រមូលផ្តុំគ្នាមុខក្រសួងអប់រំ ទាមទារសុំឱ្យក្រសួងធ្វើកំណែវិញ្ញាសារប្រឡងឡើងវិញផងដែរ ដោយសារពួកគាត់មិនអស់ចិត្តនឹងលទ្ធផលប្រឡងដូចគ្នានេះដែរ៕
