ប្រជាពលរដ្ឋរស់នៅជាប់បឹងតាមោកជាង ៧០នាក់ បានប្រមូលផ្តុំគ្នានៅក្នុងសង្កាត់សំរោង រាជធានីភ្នំពេញ ដើម្បីទាមទារឱ្យអាជ្ញាធរពាក់ព័ន្ធធ្វើការអភិវឌ្ឍន៍នៅនឹងកន្លែង ហើយផ្តល់ប្លង់កម្មសិទ្ធិដីធ្លី និងធ្វើលិខិតអត្រានុកូលដ្ឋានជូនពួកគេឱ្យបានស្របច្បាប់។
អ្នកស្រី ប្រាក់ សុភា ដែលជាតំណាងពលរដ្ឋរស់នៅជាប់បឹងតាមោក ស្ថិតក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ នៅថ្ងៃអាទិត្យនេះបានឱ្យដឹងថា ពួកគេរស់នៅផ្លូវ ១៥១ ភូមិសំរោងត្បូង មិនព្រមចំពោះគោលការណ៍ដោះដូរដីទៅទីតាំងផ្សេងតាមការចង្អុលបង្ហាញរបស់អភិបាលខណ្ឌព្រែកព្នៅនោះទេ។
ករណីនេះ អ្នកស្រីថា ពួកគាត់បាននាំឱ្យគ្នាជាង៧០នាក់ ប្រមូលផ្តុំ និងកាន់បដា អមដោយអក្សរសរសេរថា ស្នើសុំឱ្យអាជ្ញាធរធ្វើការអភិវឌ្ឍន៍នៅនឹងកន្លែងចាស់ដែលពង្រីកផ្លូវ ៥០ម៉ែត្រ ស្នើសុំប្លង់កម្មសិទ្ធិ សៀវភៅស្នាក់នៅ និងសៀវភៅគ្រួសារជាដើម ។
អ្នកស្រីនិយាយថា៖ «យើងប្រមូលផ្តុំគ្នានៅថ្ងៃនេះ ទាមទារឱ្យអាជ្ញាធរធ្វើការអភិវឌ្ឍន៍នៅនឹងកន្លែង សុំប្លង់កម្មសិទ្ធិ និងលិខិតអត្រានុកូលដ្ឋាន ពួកយើងអត់ទទួលយកការដោះដូរដីទៅកន្លែងផ្សេងទេ ព្រោះអភិបាលខណ្ឌ លោក ធឹម សំអាន គាត់ថា បើយើងនៅរស់នៅកន្លែងហ្នឹង គាត់អត់ចេញលិខិតអត្រានុកូលដ្ឋានឱ្យយើងទេ។ បើសិនជាយើងដូរទៅទីតាំងថ្មី បានគាត់ផ្តល់អត្រានុកូលដ្ឋានឱ្យ ។ អ៊ីចឹងវាជារឿងមួយអយុត្តិធម៌សម្រាប់ពួកខ្ញុំ»។
ពលរដ្ឋរស់នៅភូមិសំរោងត្បូង អ្នកស្រី ហេង ស៊ីលាភ ប្រាប់វីអូឌីថា ពួកគាត់បារម្ភពីការបណ្តេញចេញដោយបង្ខំ ដែលអាចធ្វើឱ្យពួកគេជួបបញ្ហាប្រឈមក្នុងជីវភាពរស់នៅ ដូចជាប៉ះពាល់មុខរបរ ការសិក្សារបស់កូនៗជាដើម ។ ករណីនេះ អ្នកស្រីថា បើអាជ្ញាធរនៅតែមិនព្រមដោះស្រាយជូនពលរដ្ឋទេ នោះពួកគាត់នឹងបន្តតវ៉ារហូតមានដំណោះស្រាយ។
អ្នកស្រីនិយាយថា៖ «ពួកខ្ញុំសុំធ្វើការអភិវឌ្ឍន៍នៅនឹងកន្លែង ធ្វើប្លង់ឱ្យ និងផ្តល់សៀវភៅគ្រួសារ សៀវភៅស្នាក់នៅឱ្យពួកខ្ញុំ បើអត់ព្រមដោះស្រាយឱ្យទេ ពួកខ្ញុំនៅតែតវ៉ារហូតមានដំណោះស្រាយ ព្រោះគេអត់ដោះស្រាយឱ្យយើង ធ្វើឱ្យយើងហេលហាល ដូចអត់មានអាវពាក់អីចឹង ហើយគាត់[អាជ្ញាធរ]ជាម៉ែ ជាឪ គាត់អត់មានដោះស្រាយឱ្យយើងអីចឹងង យើងពិបាកណាស់ »។
អភិបាលខណ្ឌព្រែកព្នៅ លោក ធឹម សំអាន មានប្រសាសន៍ថា តាមគោលការណ៍របស់រដ្ឋបាលរាជធានីភ្នំពេញ មិនអនុញ្ញាតឱ្យពលរដ្ឋរស់នៅជាប់បឹងតាមោកបន្តទៀតនោះទេ ព្រោះពួកគេមកសាងសង់សំណង់រស់នៅខុសច្បាប់។ តែលោកថា ជម្រើសមានតែមួយទេ ពលរដ្ឋត្រូវទៅរស់នៅទីតាំងថ្មី តាមការកំណត់របស់អាជ្ញាធរ ដើម្បីទទួលបានប្លង់ស្របច្បាប់ ។
លោកមានប្រសាសន៍ថា៖ «ខ្ញុំសំណូមពរទៅប្រជាពលេរដ្ឋប្រញាប់ទៅចាប់ដីយក នៅក្បែរទីតាំងចាស់ ប្រហែលជាចំងាយ១០០៨ម៉ែត្រ ដែលមានទទឹងទំហំ៤ម៉ែត្រកន្លះ គុណនឹង១៨ម៉ែត្រ ជាទំហំមួយធំណាស់សម្រាប់ផ្ទះល្វែង គាត់អាចទៅរស់នៅស្របច្បាប់ ប៉ុន្មានថ្ងៃទៀតនេះ ខ្ញុំទៅធ្វើបេតុងឱ្យហើយ»។
ទាក់ទងនឹងការស្នើសុំធ្វើលិខិតអត្រានុកូលដ្ឋាននោះ លោក ធឹម សំអាន អះអាងថា អាជ្ញាធរមិនធ្វើឱ្យពួកគាត់ទេ ដោយសារពួកគេរស់នៅជាប់បឹងតាមោកដោយខុសច្បាប់។ ប៉ុន្តែលោកថា បើពួកគេទៅរស់នៅទីតាំងដែលអាជ្ញាធរផ្តល់ឱ្យ នោះអាជ្ញាធរនឹងធ្វើលិខិតអត្រានុកូលដ្ឋានជូនពួកគេឱ្យស្របតាមច្បាប់ ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្សនៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ដើម្បីដោះស្រាយបញ្ហាប្រឈមជូនប្រជាពលរដ្ឋឱ្យមានប្រសិទ្ធភាព លុះត្រាតែអាជ្ញាធរត្រូវអនុលោកមតាមរដ្ឋធម្មនុញ្ញ ច្បាប់ភូមិបាល ច្បាប់អស្សាមិករណ៍ បានចែងទាក់ទិងការអភិវឌ្ឍន៍។ លោកបន្តថា រដ្ឋាភិបាលមានសិទ្ធិដោះដូរទីតាំងដីថ្មីជូនពលរដ្ឋបាន ប៉ុន្តែក៏ត្រូវមានការព្រមព្រៀងពីពលរដ្ឋ និងផ្តល់សំណងសមរម្យផងដែរ ។
ករណីនេះ លោកជំរុញទៅអាជ្ញាធរ មុននឹងធ្វើការបណ្តេញពលរដ្ឋចេញពីទីតាំងចាស់ ត្រូវសិក្សាច្បាប់ឱ្យបានគ្រប់ជ្រុងជ្រោយ និងផ្តល់សំណងសមរម្យជូនពួកគេ ដើម្បីកុំឱ្យមានបញ្ហាប្រឈមកើតឡើងនៅថ្ងៃខាងមុខ ដែលនាំឱ្យពលរដ្ឋរងគ្រោះ និងជាគំរូមួយមិនល្អ ហើយប៉ះពាល់ដល់សង្គមថែមទៀតផង។
លោកមានប្រសាសន៍ថា៖ «បើច្បាប់បង្កើតឡើងហើយ អាជ្ញាធរមិនអនុវត្ត ធ្វើឱ្យប្រជាពលរដ្ឋកាន់តែរងគ្រោះដដែល ហើយវាជាការគំរាមកំហែងមួយសម្រាប់ប្រជាពលរដ្ឋដទៃផ្សេងទៀត ឱ្យតែក្រុមហ៊ុន ឬក៏អ្នកមានអំណាចគាត់ចង់បានដីនៅកន្លែងណាមួយ ហើយធ្វើតាមផ្លូវគាត់ យកដីគ្នាអស់ ថ្ងៃក្រោយប្រជាពលរដ្ឋក្លាយទៅជាប្រជាពលរដ្ឋក្រីក្រ ចំណាកស្រុក និងបង្របញ្ហាកើតឡើង អស្ថិរភាពក្នុងសង្គម »។
បឹងតាមោក ឬបឹងកប់ស្រូវ មានផ្ទៃដីសរុប ៣ ២៣៩ហិកតា ដែលជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងមួយនេះ ត្រូវបានរដ្ឋាភិបាលចេញអនុក្រឹត្យកាលពីដើមខែកុម្ភៈ ឆ្នាំ២០១៦ ដោយកំណត់យកបឹងធម្មជាតិមួយនេះជាសម្បតិ្តសាធារណៈរបស់រដ្ឋ។
យ៉ាងណា បើយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ចុងខែធ្នូ ឆ្នាំ២០២១ ផ្ទៃបឹងតាមោក សរុបជាង២ ០០០ហិកតាហើយ ត្រូវបានរដ្ឋាភិបាលកាត់ឬដោះដូរទៅឱ្យស្ថាប័នរដ្ឋ ក្រុមហ៊ុនឯកជន និងបុគ្គលឯកជនមួយចំនួនដែលគេដឹងថាជាអ្នកមានលុយមានអំណាច សម្រាប់សាងសង់អគារ និងហេដ្ឋារចនាសម្ពន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួន ជាដើម៕
