ឧត្ដមស្នងការអង្គការសហប្រជាជាតិ ទទួលបន្ទុកជនភៀសខ្លួន (UNHCR) បាននិយាយថា ជនជាតិភាគតិច រ៉ូហ៊ីងយ៉ា យ៉ាងហោចណាស់ចំនួន១៨០នាក់ ដែលរសាត់អណ្ដែតនៅលើសមុទ្រអស់ជាច្រើនសប្តាហ៍ បន្ទាប់ពីចាកចេញពីប្រទេសបង់ក្លាដែសកាលពីខែវិច្ឆិកា ទំនងជាបានស្លាប់ដោយសារលិចទូកដ៏ទ្រុឌទ្រោមនៅខែនេះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៥ ខែធ្នូ ឆ្នាំ២០២២។
UNHCR បាននិយាយថា ទូកដែលដឹកជនភៀសខ្លួន រ៉ូហ៊ីងយ៉ា ទំនងជាលិចបន្ទាប់ពីបាត់ទំនាក់ទំនងនៅក្នុងសមុទ្រ។
UNHCR បានសរសេរនៅលើបណ្តាញសង្គម Twitter កាលពីថ្ងៃសៅរ៍ថា «សាច់ញាតិរបស់ជនរងគ្រោះមិនអាចទាក់ទង [អ្នកដែលនៅលើទូកបាន]។ អ្នកដែលគេអាចទាក់ទងបានចុងក្រោយ ត្រូវបានសន្និដ្ឋានថាស្លាប់ទាំងអស់»។
ជនភៀសខ្លួនរ៉ូហ៊ីងយ៉ាជាង ១លាននាក់ មកពីប្រទេសមីយ៉ាន់ម៉ា កំពុងរស់នៅក្នុងជំរុំជនភៀសខ្លួនក្នុងប្រទេសបង់ក្លាដែស រួមទាំងជនភៀសខ្លួនរាប់ម៉ឺននាក់ដែលបានភៀសខ្លួនចេញពីប្រទេសមីយ៉ាន់ម៉ា បន្ទាប់ពីយោធាបានបង្ក្រាបដោយហិង្សាក្នុងឆ្នាំ២០១៧។
នៅក្នុងប្រទេសមីយ៉ាន់ម៉ា ជនជាតិរ៉ូហ៊ីងយ៉ា ត្រូវបានបដិសេធផ្តល់សញ្ជាតិ ហើយត្រូវបានចាត់ទុកថាជាអ្នកជ្រៀតជ្រែក និងជាជនអន្តោប្រវេសន៍ខុសច្បាប់មកពីអាស៊ីខាងត្បូង។
នៅប្រទេសបង់ក្លាដែស ជនជាតិរ៉ូហ៊ីងយ៉ា ពិបាករកការងារធ្វើណាស់។
ជារឿយៗ អ្នកជួញដូរមនុស្សបញ្ចុះបញ្ចូលពួកគេ ដោយសន្យាផ្តល់ការងារធ្វើនៅក្នុងបណ្តាប្រទេសអាស៊ីអាគ្នេយ៍ ដូចជា ប្រទេសម៉ាឡេស៊ី ដោយធ្វើដំណើរប្រកបដោយគ្រោះថ្នាក់។
ជនភៀសខ្លួនរ៉ូហ៊ីងយ៉ា តែងតែរសាត់ក្នុងដែនសមុទ្រអន្តរជាតិ បន្ទាប់ពីចាកចេញពីភាគខាងត្បូងប្រទេសបង់ក្លាដែស ដើម្បីស្វែងរកអាហារ ការងារ និងទីជម្រកនៅកន្លែងផ្សេងទៀតក្នុងបណ្តាប្រទេសនៅអាស៊ី ដោយប្រឈមនឹងភាពអត់ឃ្លាន និងជំងឺ។
កាលពីសប្តាហ៍មុន ក្រុមសកម្មជនរ៉ូហ៊ីងយ៉ានៅក្នុងប្រទេសមីយ៉ាន់ម៉ាចំនួនពីរ បាននិយាយថា មនុស្សរហូតដល់២០នាក់បានស្លាប់ដោយសារអត់អាហារ ឬស្រេកទឹកនៅលើទូកដែលរសាត់អណ្តែតនៅលើសមុទ្រប្រទេសឥណ្ឌាអស់រយៈពេលពីរសប្តាហ៍។ ទូកដែលមានមនុស្សយ៉ាងតិច១០០នាក់ ត្រូវបានរាយការណ៍ថា រសាត់អណ្តែតនៅក្នុងដែនសមុទ្រប្រទេសម៉ាឡេស៊ី។
កាលពីដើមខែនេះ កងទ័ពជើងទឹកស្រីលង្កាបានជួយសង្គ្រោះជនជាតិរ៉ូហ៊ីងយ៉ាចំនួន១០៤នាក់ ដែលរសាត់អណ្តែតនៅសមុទ្រភាគខាងជើងនៃឥណ្ឌា។
UNHCR បានជំរុញប្រទេសក្នុងតំបន់ឱ្យជួយកាត់បន្ថយវិបត្តិមនុស្សធម៌ ខណៈជនភៀសខ្លួនបានអំពាវនាវឱ្យពិភពលោកយកចិត្តទុកដាក់ចំពោះស្ថានភាពរបស់ពួកគេ៕
