ប្រទេសមីយ៉ាន់ម៉ា បានផ្ដន្ទាទោសជនជាតិភាគតិចរ៉ូហ៊ីងយ៉ា ចំនួន១១២នាក់ ក្នុងនោះមានកុមារ១២នាក់ ដាក់ពន្ធនាគារ បន្ទាប់ពីពួកគេត្រូវបានចាប់ខ្លួន ពីបទប៉ុនប៉ងចាកចេញពីប្រទេសនេះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Al Jazeera នៅថ្ងៃទី១០ ខែមករា ឆ្នាំ២០២៣នេះ។
សារព័ត៌មានរដ្ឋមីយ៉ាន់ម៉ាឈ្មោះ Global New Light of Myanmar បានរាយការណ៍នៅថ្ងៃអង្គារនេះថា តុលាការនៅទីក្រុងបូហ្កាឡេ (Bogale) ក្នុងតំបន់អៃយ៉ាវ៉ាឌី (Ayeyarwady) ភាគខាងត្បូងនៃប្រទេសមីយ៉ាន់ម៉ា បានផ្តន្ទាទោសជនជាតិភាគតិចរ៉ូហ៊ីងយ៉ាទាំង១១២នាក់ កាលពីថ្ងៃទី៦ ខែមករា ឆ្នាំ២០២៣។
ប្រភពដដែលបន្តថា អ្នកទាំងនេះត្រូវបានចាប់ខ្លួនកាលពីខែធ្នូ បន្ទាប់ពីពួកគេត្រូវបានប្រទះឃើញនៅលើទូក «ដោយគ្មានឯកសារផ្លូវការ»។
សេចក្តីរាយការណ៍បន្ថែមថា ក្នុងចំណោមកុមារទាំង ១២នាក់ មាន៥នាក់ដែលមានអាយុក្រោម១៣ឆ្នាំ ត្រូវបានផ្តន្ទាទោសឱ្យជាប់ពន្ធនាគារ២ឆ្នាំ ហើយកុមារដែលមានអាយុលើសពីនេះ ត្រូវបានផ្តន្ទាទោសឱ្យជាប់ពន្ធនាគារ៣ឆ្នាំ។ ពួកគេត្រូវបានបញ្ជូនទៅកាន់ «សាលាបណ្តុះបណ្តាលយុវជន» កាលពីថ្ងៃចន្ទ។ ដោយឡែក សម្រាប់មនុស្សពេញវ័យទាំងអស់ត្រូវបានតុលាការផ្តន្ទាទោសឱ្យជាប់ពន្ធនាគាររយៈពេល៥ឆ្នាំ។
ជនជាតិរ៉ូហ៊ីងយ៉ា ត្រូវបានបដិសេធផ្តល់សញ្ជាតិ និងសិទ្ធិជាមូលដ្ឋានផ្សេងទៀតនៅក្នុងប្រទេសមីយ៉ាន់ម៉ា ដែលរដ្ឋាភិបាលមីយ៉ាន់ម៉ាអះអាងថា ពួកគេជា «ជនចំណាកស្រុកខុសច្បាប់» មកពីអាស៊ីខាងត្បូង។
មនុស្សរាប់សែននាក់បានភៀសខ្លួនចេញពីប្រទេសមីយ៉ាន់ម៉ា ទៅកាន់ប្រទេសបង់ក្លាដេស ក្នុងឆ្នាំ២០១៧ បន្ទាប់ពីការបង្ក្រាបយ៉ាងឃោរឃៅដោយយោធា ដែលត្រូវបានសហគមន៍អន្តរជាតិថ្កោលទោសពីបទប្រល័យពូជសាសន៍។
ជនជាតិរ៉ូហ៊ីងយ៉ាជាច្រើននាក់ផ្សេងទៀតដែលនៅសេសសល់ក្នុងប្រទេសមីយ៉ាន់ម៉ា ត្រូវបានបង្ខាំងនៅក្នុងជំរំ ដែលត្រូវបានរឹតត្បិតយ៉ាងតឹងរ៉ឹងចំពោះការបន្លាស់ទី ហាមឃាត់មិនឱ្យធ្វើការ មិនឱ្យរៀនសូត្រ ឬទទួលបានជំនួយផ្នែកវេជ្ជសាស្រ្ត។
ដោយត្រូវបានចាត់ទុកថាជាជនជាតិភាគតិច ដែលត្រូវបានធ្វើទុក្ខបុកម្នេញបំផុតលើពិភពលោក ជនជាតិរ៉ូហ៊ីងយ៉ា មកពីជំរំជនភៀសខ្លួនក្នុងប្រទេសបង់ក្លាដែស ក៏ដូចជានៅក្នុងប្រទេសមីយ៉ាន់ម៉ា នៅតែបន្តប្រថុយធ្វើដំណើរតាមសមុទ្រដ៏គ្រោះថ្នាក់ទៅកាន់ប្រទេសម៉ាឡេស៊ី និងឥណ្ឌូនេស៊ី ដែលពួកគេជឿថានឹងអាចរស់នៅបានប្រសើរជាងនេះ។
យ៉ាងហោចណាស់ មានជនជាតិរ៉ូហ៊ីងយ៉ាចំនួន១៨៥នាក់បានចូលចតនៅខេត្តអាឆេ (Aceh) ភាគខាងជើងនៃប្រទេសឥណ្ឌូនេស៊ី កាលពីចុងខែមុន បន្ទាប់ពីទូករបស់ពួកគេបានរសាត់នៅសមុទ្រអស់ជាច្រើនសប្តាហ៍។
ឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន លើកឡើងថា ចំនួនជនជាតិរ៉ូហ៊ីងយ៉ាដែលធ្វើដំណើរប្រកបដោយគ្រោះថ្នាក់បែបនេះ បានកើនឡើង៦ដងកាលពីឆ្នាំមុន បើធៀបនឹងឆ្នាំ២០២១។
ទូកចំនួន២ ដែលផ្ទុកមនុស្សសរុបជាង២០០នាក់ បានចូលចតនៅខេត្តអាឆេ (Aceh) ភាគខាងជើងប្រទេសឥណ្ឌូនេស៊ី កាលពីខែមុន៕