មន្ត្រីគ្រប់គ្រងគ្រោះមហន្តរាយជប៉ុន បាននិយាយកាលពីថ្ងៃចន្ទថា ព្រិលធ្លាក់ខ្លាំងនៅតំបន់ភាគច្រើននៃប្រទេសជប៉ុនបានសម្លាប់មនុស្សចំនួន១៧នាក់ និងរបួសជាង៩០នាក់ និងធ្វើឱ្យផ្ទះរាប់រយខ្នងគ្មានអគ្គិសនីប្រើប្រាស់។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA។
នៅតំបន់ភាគខាងជើងប្រទេសជប៉ុន មានព្រិលធ្លាក់ខ្លាំងចាប់តាំងពីសប្តាហ៍មុន ដោយធ្វើឱ្យរថយន្តរាប់រយគ្រឿងជាប់គាំងនៅលើផ្លូវល្បឿនលឿន ការពន្យារពេលសេវាដឹកជញ្ជូន និងបណ្តាលឱ្យមនុស្សស្លាប់ជាង១០នាក់។
ការធ្លាក់ព្រិលកាន់តែច្រើននៅចុងសប្តាហ៍ បានធ្វើឱ្យចំនួនអ្នកស្លាប់កើនឡើងដល់១៧នាក់ និងរបួសដល់៩៣នាក់ គិតត្រឹមព្រឹកថ្ងៃចន្ទ។ នេះបើយោងតាមទីភ្នាក់ងារគ្រប់គ្រងអគ្គិភ័យ និងគ្រោះមហន្តរាយ។
មនុស្សជាច្រើនបានដួលធ្លាក់ចូលគំនរព្រិល ខណៈព្យាយាមកាយព្រិលចេញពីដំបូលផ្ទះរបស់ពួក។
ការិយាល័យក្រុងនៅតំបន់ដែលរងផលប៉ះពាល់ដោយព្រិល បានអំពាវនាវឱ្យប្រជាពលរដ្ឋប្រុងប្រយ័ត្នក្នុងអំឡុងពេលកាយព្រិលចេញ ហើយកុំធ្វើការតែម្នាក់ឯង។
ទីភ្នាក់ងារគ្រប់គ្រងគ្រោះមហន្តរាយ បាននិយាយថា ស្ត្រីម្នាក់វ័យ៧០ឆ្នាំ ត្រូវបានប្រទះឃើញស្លាប់កប់នៅក្រោមគំនរព្រិលដ៏ក្រាស់នៅលើដំបូលផ្ទះ នៅក្នុងទីក្រុងណាហ្គៃ (Nagai) ខេត្តយ៉ាម៉ាហ្កាតា (Yamagata) ចម្ងាយប្រហែល៣០០គីឡូម៉ែត្រភាគខាងជើងទីក្រុងតូក្យូ ជាកន្លែងដែលមានព្រិលធ្លាក់កម្ពស់ជាង ៨០សង់ទីម៉ែត្រ កាលពីថ្ងៃសៅរ៍។
ផ្នែកជាច្រើននៃភាគឦសានប្រទេសជប៉ុន ត្រូវបានរាយការណ៍ថាមានព្រិលធ្លាក់ជាមធ្យម ៣ដង ក្នុងអំឡុងរដូវរងានេះ។
យោងតាមក្រសួងសេដ្ឋកិច្ច និងឧស្សាហកម្ម បានឱ្យដឹងថា ព្រិលធ្លាក់យ៉ាងគំហុកបានធ្វើឱ្យប៉មបញ្ជូនថាមពលអគ្គិសនីនៅលើកោះមួយភាគខាងជើងប្រទេសជប៉ុនដួលរលំ ដែលធ្វើឱ្យផ្ទះប្រហែល២០ ០០០ខ្នងគ្មានអគ្គិសនីប្រើប្រាស់ ទោះបីជាអគ្គិសនីត្រូវបានស្ដារឡើងវិញនៅក្នុងតំបន់ភាគច្រើនក៏ដោយ។
យោងតាមក្រសួងដឹកជញ្ជូនជប៉ុន បានឱ្យដឹងថា រថភ្លើង និងជើងហោះហើររាប់សិបត្រូវបានផ្អាក នៅភាគខាងជើងប្រទេសជប៉ុន នៅថ្ងៃអាទិត្យ។ ទោះយ៉ាងណា រហូតមកដល់ពេលនេះ សេវាភាគច្រើនបានដំណើរការឡើងវិញ៕