ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នៅថ្ងៃអង្គារ បានឆ្លើយតបចំពោះការកំណត់តម្លៃប្រេងរុស្ស៊ីរបស់លោកខាងលិច ដោយចុះហត្ថលេខាលើក្រឹត្យមួយ ដែលហាមប្រាមការផ្គត់ផ្គង់ប្រេងឆៅ និងផលិតផលប្រេង ចាប់ពីថ្ងៃទី១ ខែកុម្ភៈ ឆ្នាំ២០២៣ សម្រាប់រយៈពេល៥ខែ ចំពោះបណ្តាប្រទេសដែលអនុវត្តការកំណត់តម្លៃប្រេងរបស់រុស្ស៊ី។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៨ ខែធ្នូ ឆ្នាំ២០២២នេះ។
ក្រុមប្រទេស G7 សហភាពអឺរ៉ុប និងអូស្ត្រាលី បានព្រមព្រៀងគ្នាក្នុងខែនេះ ក្នុងការកំណត់តម្លៃ ៦០ដុល្លារក្នុងមួយបារ៉ែល លើតម្លៃប្រេងឆៅរុស្ស៊ី ដែលចូលជាធរមានចាប់ពីថ្ងៃទី៥ ខែធ្នូ ឆ្នាំ២០២២ ជាការឆ្លើយតបចំពោះការឈ្លានពានរបស់រុស្សីលើអ៊ុយក្រែន។
រុស្ស៊ី គឺជាប្រទេសនាំចេញប្រេងធំបំផុតទីពីរនៅលើពិភពលោកបន្ទាប់ពីអារ៉ាប៊ីសាអូឌីត ហើយការរំខានចំពោះការលក់ប្រេងរបស់ខ្លួននឹងបង្កផលវិបាកដល់ការផ្គត់ផ្គង់ថាមពលសកល។
ក្រឹត្យដែលត្រូវបានចេញផ្សាយនៅលើគេហទំព័ររបស់រដ្ឋាភិបាលវិមានក្រឹមឡាំង បាននិយាយអំពី «សកម្មភាពអមិត្ត និងផ្ទុយពីច្បាប់អន្តរជាតិរបស់សហរដ្ឋអាមេរិក និងរដ្ឋបរទេស និងអង្គការអន្តរជាតិដែលចូលរួមជាមួយពួកគេ»។
ក្រឹត្យនោះបន្ថែមថា៖ «ការដឹកជញ្ជូនប្រេង និងផលិតផលប្រេងរបស់រុស្ស៊ី ទៅកាន់អង្គភាព និងបុគ្គលបរទេស ត្រូវបានហាមឃាត់»។
ក្រឹត្យនោះក៏រួមមានខចែងដែលអនុញ្ញាតឱ្យលោក Putin បដិសេធការហាមប្រាមក្នុងករណីពិសេស បាននិយាយថា «ក្រឹត្យនេះ…ចូលជាធរមាននៅថ្ងៃទី១ ខែកុម្ភៈ ឆ្នាំ២០២៣ និងអនុវត្តរហូតដល់ថ្ងៃទី១ ខែកក្កដា ឆ្នាំ២០២៣»។
ការនាំចេញប្រេងឆៅនឹងត្រូវបានហាមឃាត់ចាប់ពីថ្ងៃទី១ ខែកុម្ភៈ ឆ្នាំ២០២៣ ប៉ុន្តែកាលបរិច្ឆេទសម្រាប់ការហាមឃាត់ផលិតផលប្រេងនឹងត្រូវបានកំណត់ដោយរដ្ឋាភិបាលរុស្ស៊ី ហើយអាចធ្វើឡើងបន្ទាប់ពីថ្ងៃទី១ ខែកុម្ភៈ ឆ្នាំ២០២៣។
អ្នកវិភាគមួយចំនួនបាននិយាយថា ការកំណត់តម្លៃប្រេងរបស់រុស្ស៊ីនឹងមានផលប៉ះពាល់តិចតួចចំពោះប្រាក់ចំណូលពីប្រេងដែលទីក្រុងម៉ូស្គូរកបាននាពេលបច្ចុប្បន្ន។
ទោះយ៉ាងណា រដ្ឋមន្ត្រីក្រសួងហិរញ្ញវត្ថុរុស្ស៊ី លោក អាន់តុន ស៊ីលូណូវ (Anton Siluanov) បាននិយាយកាលពីថ្ងៃអង្គារថា ឱនភាពថវិការបស់រុស្ស៊ីអាចមានទំហំធំជាងការគ្រោងទុក ២% នៃផលិតផលក្នុងស្រុកសរុប (GDP) ក្នុងឆ្នាំ២០២៣ ដោយការកំណត់តម្លៃប្រេងធ្វើឱ្យប៉ះពាល់ដល់ប្រាក់ចំណូលពីការនាំចេញ ដែលជាឧបសគ្គផ្នែកសារពើពន្ធបន្ថែមសម្រាប់ទីក្រុងម៉ូស្គូ ខណៈខ្លួនចំណាយច្រើនលើប្រតិបត្តិការយោធានៅអ៊ុយក្រែន៕