សមត្ថកិច្ចបានរាយការណ៍ឱ្យដឹងថា អតីតសមាជិកសភាអាហ្វហ្កានីស្ថានជាស្ត្រីមួយរូប ត្រូវបានខ្មាន់កាំភ្លើងមិនស្គាល់អត្តសញ្ញាណបាញ់សម្លាប់នៅក្នុងផ្ទះរបស់ខ្លួន ក្នុងរដ្ឋធានីកាប៊ុល (Kabul)។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៦ ខែមករា ឆ្នាំ២០២៣។
ប្រភពដដែលបន្តថា អតីតសមាជិកសភា គឺលោកស្រី Mursal Nabizada និងមន្ត្រីសន្តិសុខរបស់ខ្លួនត្រូវបានបាញ់សម្លាប់ ខណៈបងប្រុសរបស់លោកស្រីបានរងរបួសនៅក្នុងការបាញ់ប្រហារ កាលពីថ្ងៃអាទិត្យកន្លងទៅ។
ទាក់ទិននឹងករណីនេះ សមត្ថកិច្ចបានបន្ថែមឱ្យដឹងតាមរយៈសេចក្តីថ្លែងការណ៍មួយថា៖ «កងកម្លាំងសន្តិសុខ បានចាប់ផ្តើមការស៊ើបអង្កេតយ៉ាងស៊ីជម្រៅ ទាក់ទងនឹងករណីនេះ ដើម្បីស្វែងរកឧក្រិដ្ឋជនយកមកផ្តន្ទាទោសតាមច្បាប់»។
លោកស្រី Mursal Nabizada បានក្លាយជាសមាជិកសភា រហូតដល់ក្រុមតាលីបង់បានចូលមកគ្រប់គ្រងប្រទេស ខណៈដែលកងកម្លាំងបរទេសបានដកខ្លួនចេញនៅឆ្នាំ២០២១ ស្របពេលដែលអ្នកនយោបាយជាច្រើនក៏បានភៀសខ្លួនចេញពីប្រទេសជាបន្តបន្ទាប់ផងដែរ។
ប្រព័ន្ធផ្សព្វផ្សាយក្នុងស្រុកមួយក៏បានឱ្យដឹងដែរថា លោកស្រី Nabizada ក៏ធ្លាប់ត្រូវបានបោះឆ្នោតជ្រើសរើសជាសមាជិកសភាជាន់ទាបក្នុងឆ្នាំ២០១៨ ដើម្បីតំណាងឱ្យទីក្រុងកាប៊ុលផងដែរ។
គិតចាប់តាំងពីចូលមកកាន់កាប់ប្រទេសមក ក្រុមតាលីបង់ តែងតែអះអាងថា ពួកគេផ្តោតលើការធានាសន្តិសុខរបស់ប្រទេសជាតិ និងលើកទឹកចិត្តឱ្យជនជាតិអាហ្វហ្កានីស្ថាននានាត្រលប់មកកាន់ប្រទេសវិញផងដែរ។
ទោះជាយ៉ាងណា ការវាយប្រហារជាច្រើនត្រូវបានសង្កេតឃើញថាបានកើតឡើងជាបន្តបន្ទាប់ក្នុងរយៈពេលប៉ុន្មានខែថ្មីៗនេះ រួមទាំងការវាយប្រហារមួយដែលកើតឡើងនៅក្រសួងការបរទេស កាលពីសប្តាហ៍មុន ដែលបានសម្លាប់ និងធ្វើឱ្យរបួសមនុស្សរាប់សិបនាក់។
កាលពីខែធ្នូកន្លងទៅ មនុស្សម្នាក់ក៏ត្រូវបានសម្លាប់នៅក្នុងការវាយប្រហារដោយគ្រាប់បែកអត្តឃាតនៅជិតការិយាល័យនៃគណបក្ស Hezb-e-Islami ប្រចាំទីក្រុងកាប៊ុល ខណៈដែលមេដឹកនាំរបស់ខ្លួន គឺលោក Gulbuddin Hekmatyar នៅពេលនោះក៏ស្ថិតនៅខាងក្នុងទីតាំងមួយនេះផងដែរ៕
