ក្រសួងសុខាភិបាលប្រទេសអ៊ូសបេគីស្ថានបាននិយាយថា យ៉ាងហោចណាស់កុមារ១៨នាក់បានស្លាប់បន្ទាប់ពីផឹកថ្នាំប្រភេទជាស៊ីរ៉ូ (syrup) ដែលផលិតដោយក្រុមហ៊ុនផលិតថ្នាំឥណ្ឌាឈ្មោះ Marion Biotech Pvt Ltd.។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៩ ខែធ្នូ ឆ្នាំ២០២២ នេះ។
ក្រសួងនេះបាននិយាយថា កុមារ១៨នាក់ ក្នុងចំណោម២១នាក់ ដែលបានផឹកថ្នាំឈ្មោះ Doc-1 Max បានស្លាប់បន្ទាប់ពីផឹកថ្នាំនេះ ដោយមានជំងឺផ្លូវដង្ហើមធ្ងន់ធ្ងរ។ ថ្នាំនេះត្រូវបានដាក់លក់នៅលើគេហទំព័ររបស់ក្រុមហ៊ុនដើម្បីព្យាបាលជំងឺផ្តាសាយ។
ក្រសួងនេះបាននិយាយនៅក្នុងសេចក្តីថ្លែងការណ៍របស់ខ្លួនថា ថ្នាំនេះមានផ្ទុកសារធាតុ Ethylene glycol ដែលជាសារធាតុពុល។ ក្រសួងបន្តថា ថ្នាំនេះត្រូវបាននាំចូលប្រទេសអ៊ូសបេគីស្ថាន ដោយក្រុមហ៊ុន Quramax Medical LLC ។
សេចក្តីថ្លែងការណ៍នោះបាននិយាយថា ឪពុកម្តាយឱ្យកូនៗផឹកថ្នាំនេះដោយគ្មានវេជ្ជបញ្ជាពីគ្រូពេទ្យ ដោយប្រើលើសកម្រិតថ្នាំស្តង់ដារសម្រាប់កុមារ។
ក្រុមហ៊ុន Marion Biotech, Quramax Medical និងក្រសួងសុខាភិបាលឥណ្ឌា មិនបានឆ្លើយតបភ្លាមៗចំពោះសំណើរបស់ Reuters ដើម្បីសុំការអធិប្បាយឡើយ។ ប្រភពពីរដ្ឋាភិបាលឥណ្ឌាបាននិយាយថា ក្រសួងសុខាភិបាលកំពុងពិនិត្យមើលបញ្ហានេះ។
ប្រទេសឥណ្ឌា កាលពីថ្ងៃអង្គារ បានបើកការត្រួតពិនិត្យរោងចក្រផលិតថ្នាំមួយចំនួននៅទូទាំងប្រទេស ដើម្បីធានាបាននូវស្តង់ដារគុណភាពខ្ពស់។
ប្រទេសឥណ្ឌា ត្រូវបានគេស្គាល់ថាជាទីតាំងផលិតឱសថដ៏ធំមួយនៅលើពិភពលោក ហើយការនាំចេញឱសថរបស់ខ្លួនបានកើនឡើងទ្វេដងក្នុងទសវត្សរ៍កន្លងមក ដែលមានតម្លៃរហូតដល់ ២៤,៥ពាន់លានដុល្លារក្នុងឆ្នាំសារពើពន្ធ កន្លងមក។
ក្រសួងសុខាភិបាលអ៊ូសបេគីស្ថានបាននិយាយថា ខ្លួនកំពុងធ្វើការដើម្បីដកថ្នាំគ្រាប់ និងស៊ីរ៉ូ Doc-1 Max ពីឱសថស្ថានទាំងអស់។
សូមរម្លឹកថា កាលពីខែតុលាកន្លងទៅ ក៏មានករណីកុមារស្លាប់ជាង៦០នាក់នៅប្រទេសហ្គាំប៊ី ដោយបញ្ហាតម្រងនោមធ្ងន់ធ្ងរបន្ទាប់ពីប្រើស៊ីរ៉ូក្អក និងផ្តាសាយដែលផលិតដោយក្រុមហ៊ុនផលិតឱ្យសថ Maiden Pharmaceuticals Ltd នៅប្រទេសឥណ្ឌា ហើយដែលឱសថចំនួន៤ប្រភេទពាក់ព័ន្ធនឹងករណីស្លាប់នេះ រួមមាន Promethazine Oral Solution, Kofexmalin Baby Cough Syrup, Makoff Baby Cough Syrup និង Magrip N Cold Syrup៕
