យោធាអាមេរិកបាននិយាយកាលពីថ្ងៃព្រហស្បតិ៍ថា យន្តហោះចម្បាំងចិនមួយគ្រឿងហោះចូលកៀកនឹងយន្តហោះចម្បាំងអាមេរិកចម្ងាយប្រហែលជា៣ម៉ែត្រពីគ្នា នៅក្នុងដែនអាកាសនៃសមុទ្រចិនខាងត្បូងដែលកំពុងមានជម្លោះ កាលពីសប្តាហ៍មុន ហើយយន្តហោះចម្បាំងអាមេរិកត្រូវបង្ខំចិត្តគេចចេញ ដើម្បីចៀសវាងការប៉ះទង្គិចគ្នានៅក្នុងដែនអាកាសអន្តរជាតិ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៣០ ខែធ្នូ ឆ្នាំ២០២២ នេះ។
យោធាអាមេរិកបាននិយាយនៅក្នុងសេចក្តីថ្លែងការណ៍មួយថា ឧបទ្ទវហេតុនេះកើតឡើងកាលពីថ្ងៃទី២១ ខែធ្នូ ឆ្នាំ២០២២ រវាងយន្តហោះចម្បាំងរបស់កងទ័ពជើងទឹកចិន J-11 និងយន្តហោះចម្បាំងកងទ័ពអាកាសអាមេរិក RC-135។
សេចក្តីថ្លែងការណ៍នោះបន្ថែមថា៖ «យើងរំពឹងថា ប្រទេសទាំងអស់នៅក្នុងតំបន់ឥណ្ឌូប៉ាស៊ីហ្វិក នឹងប្រើប្រាស់ដែនអាកាសអន្តរជាតិដោយសុវត្ថិភាព និងស្របតាមច្បាប់អន្តរជាតិ»។
អ្នកនាំពាក្យយោធាអាមេរិកបាននិយាយថា យន្តហោះចម្បាំងរបស់ចិនបានចូលកៀកនឹងយន្តហោះចម្បាំងអាមេរិកក្នុងចម្ងាយប្រហែល៣ម៉ែត្រពីស្លាបយន្តហោះ និងប្រហែល៦ម៉ែត្រពីក្បាលយន្តហោះ ដែលធ្វើឱ្យយន្តហោះចម្បាំងអាមេរិកត្រូវបង្ខំចិត្តគេចចេញ។
មន្ត្រីអាមេរិកម្នាក់ទៀតបាននិយាយថា សហរដ្ឋអាមេរិកបានលើកឡើងពីបញ្ហានេះជាមួយរដ្ឋាភិបាលចិន។
ភ្លាមៗ ស្ថានទូតចិនប្រចាំទីក្រុងវ៉ាស៊ីនតោន មិនបានឆ្លើយតបចំពោះសំណើសុំការអត្ថាធិប្បាយឡើយ។
កន្លងមក ចិនបាននិយាយថា អាមេរិកបញ្ជូននាវា និងយន្តហោះចម្បាំងទៅសមុទ្រចិនខាងត្បូង ដែលជាសញ្ញាអវិជ្ជមានសម្រាប់សន្តិភាព។
យន្តហោះចម្បាំង និងនាវាយោធាអាមេរិក តែងតែធ្វើប្រតិបត្តិការឃ្លាំមើល និងធ្វើដំណើរឆ្លងកាត់តំបន់នេះ [សមុទ្រចិនខាងត្បូង]។
នៅក្នុងជំនួបជាមួយសមភាគីចិន កាលពីខែវិច្ឆិកា រដ្ឋមន្ត្រីការពារជាតិអាមេរិក លោក ឡយដ៍ អូស្ទីន (Lloyd Austin) បានលើកឡើងពីភាពចាំបាច់ក្នុងការកែលម្អទំនាក់ទំនងរវាងប្រទេសទាំងពីរ ហើយថែមទាំងបានលើកឡើងពីអាកប្បកិរិយាប្រកបដោយគ្រោះថ្នាក់ដោយយន្តហោះចម្បាំងយោធាចិន៕