មេធាវីការពារក្តីឱ្យលោក សុន ឆ័យ បានដាក់ពាក្យបណ្តឹងសាទុក្ខទៅតុលាការកំពូល នៅរសៀលថ្ងៃអង្គារនេះ ដើម្បីប្រឆាំងនឹងសាលដីការបស់សាលាឧទ្ធរណ៍ ដែលបង្គាប់ឱ្យកូនក្តីរបស់លោកផ្តល់សំណងជំងឺចិត្តទៅឱ្យបក្សកាន់អំណាចដល់ចំនួន ១លានដុល្លារអាមេរិក។
លោក ជូង ជូងី មេធាវីការពារក្តីឱ្យលោក សុន ឆ័យ បានឱ្យដឹងនៅថ្ងៃទី៣ ខែមករា ឆ្នាំ២០២៣នេះថា តាមនីតិវិធីច្បាប់ លោកបានដាក់ពាក្យបណ្តឹងសាទុក្ខទៅសាលាឧទ្ធរណ៍រាជធានីភ្នំពេញ នៅថ្ងៃនេះ ដើម្បីឱ្យសាលាឧទ្ធរណ៍បញ្ជូនបណ្តឹងសាទុក្ខនេះទៅតុលាការកំពូលឱ្យបានឆាប់។
លោក ជូង ជូងី បន្តថា ដើមចមដែលនាំឱ្យរូបលោកដាក់ពាក្យប្តឹងសាទុក្ខនេះ ដោយសារតែកាលពីថ្ងៃទី១៤ ខែធ្នូ ឆ្នាំ២០២២ សាលាឧទ្ធរណ៍រាជធានីភ្នំពេញ បានតម្កល់សេចក្ដីសម្រេចរបស់សាលាដំបូងរាជធានីភ្នំពេញ ទុកជាបានការ ក្នុងសំណុំរឿងចំនួន២ របស់លោក សុន ឆ័យ និងបានបង្កើនប្រាក់ពិន័យក្នុងសំណុំរឿងនីមួយៗ រហូតដល់១០លានរៀល និងសំណងជំងឺចិត្តដល់បក្សកាន់អំណាចចំនួន ៤ពាន់លានរៀល ឬស្មើប្រមាណ ១លានដុល្លារអាមេរិក។
ករណីនេះ លោក ជូង ជូងី ចាត់ទុកការសម្រេចរបស់សាលាទ្ធរណ៍ ថាជារឿងអយុត្តិធម៌ ទើបលោកទៅដាក់ពាក្យបណ្តឹងសាទុក្ខទាមទារឱ្យតុលាការកំពូលជួយរកយុត្តិធម៌ជូនកូនក្តី ខណៈកូនក្តីរបស់លោកមិនបានធ្វើខុសដូចការចោទប្រកាន់នោះទេ ។
លោកមានប្រសាសន៍ថា៖ «ចំពោះនីតិវិធីច្បាប់ យើងអត់មានជម្រើសទេ យើងមានតែប្រើសិទ្ធិ និងសមត្ថភាពតវ៉ាទៅតាមផ្លូវច្បាប់។ ហើយរឿងនេះជារឿងនយោបាយ បើថ្ងៃណាមួយ មានការសម្របសម្រួលផ្នែកនយោបាយ អ៊ីចឹងនៅពេលណាមួយដែលមានការសម្របសម្រួលនយោបាយ ហើយបើអ្នកនយោបាយសម្របសម្រួលគ្នា វាចប់ហើយ»។
លោក សុន ឆ័យ អនុប្រធានគណបក្សភ្លើងទៀន ត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប.) និងគណបក្សប្រជាជនកម្ពុជា ប្ដឹងពាក់ព័ន្ធនឹងករណីដែលលោកបានថ្លែងរិះគន់អំពីការបោះឆ្នោតជ្រើសរើសក្រុមប្រឹក្សាឃុំសង្កាត់នៅកម្ពុជា កាលពីថ្ងៃទី៥ ខែមិថុនា ដោយថា លទ្ធផលបោះឆ្នោតមិនបានឆ្លុះបញ្ចាំងពីឆន្ទៈរបស់ពលរដ្ឋ មានការបំភិតបំភ័យ មានការទិញ និងមានការលួចសន្លឹកឆ្នោត។
ទាក់ទិននឹងករណីនេះ សាលាដំបូងរាជធានីភ្នំពេញ កាលពីខែតុលាកន្លងទៅ បានប្រកាសសាលក្រមឱ្យលោក សុន ឆ័យ ចាញ់ក្ដីក្នុងសំណុំរឿងបរិហារកេរ្តិ៍ ដែលប្ដឹងដោយ គ.ជ.ប. និងគណបក្សប្រជាជនកម្ពុជា ដោយបានសម្រេចឱ្យរូបលោកផ្ដល់សំណងជំងឺចិត្តដល់គណបក្សកាន់អំណាចមួយនេះចំនួន «៣ពាន់លានរៀល» ឬស្មើប្រមាណ «៧៥ម៉ឺនដុល្លារ»។ ចៅក្រមជំនុំជម្រះ ក៏បានបង្គាប់ឱ្យលោក សុន ឆ័យ បង់ប្រាក់ពិន័យចំនួន៨លានរៀលចូលថវិការដ្ឋ។ បន្ថែមពីលើនេះ លោកក៏ត្រូវបានតុលាការតម្រូវឱ្យបង់ប្រាក់ពិន័យចំនួន៩លានរៀលបន្ថែមទៀតចូលថវិការដ្ឋ ក្នុងបណ្ដឹងបរិហារកេរិ៍្តរបស់គ.ជ.ប. ផងដែរ។
សាលាដំបូងរាជធានីភ្នំពេញ កាលពីខែមុន ក៏បានចេញដីកាសម្រេចរឹបអូសជាបណ្តោះអាសន្ននូវផ្ទះ២កន្លែងរបស់លោក សុន ឆ័យ នៅរាជធានីភ្នំពេញ និងខេត្តសៀមរាប ថែមទៀតផង៕