ក្រសួងអប់រំអះអាងថា លទ្ធផលបាក់ឌុបឆ្នាំ២០២២ មិនមានការប្រែប្រួលទេ ក្រោយមន្ត្រីជំនាញពិនិត្យលើកិច្ចការរបស់បេក្ខជនដែលដាក់ពាក្យតវ៉ាចំពោះលទ្ធផលនៃការប្រឡង ខណៈបញ្ជាក់ជាថ្មីថា ការប្រឡងនេះប្រព្រឹត្តទៅដោយរលូន ហើយគណៈមេប្រយោគ និងគណៈកម្មការនានា បានអនុវត្តភារកិច្ចដោយភាពហ្មត់ចត់ ស្មោះត្រង់ និងស្មារតីទទួលខុសត្រូវខ្ពស់។
ការអះអាងនេះធ្វើឡើងតាមរយៈសេចក្ដីប្រកាសព័ត៌មានស្ដីពី «សុក្រឹតភាព និងភាពទទួលយកបាន នៃលទ្ធផលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ០៥ ធ្នូ ២០២២» របស់ក្រសួងអប់រំ យុវជន និងកីឡា ចុះថ្ងៃទី ៣ ខែមករា ឆ្នាំ២០២៣។
ក្រសួងអប់រំ បញ្ជាក់ថា ក្រសួងបានពិនិត្យយ៉ាងយកចិត្តទុកដាក់លើកិច្ចការរបស់បេក្ខជនពីសំណាក់ថ្នាក់ដឹកនាំ និងមន្ត្រីជំនាញ ធ្វើយ៉ាងណាឱ្យបេក្ខជន មាតាបិតា អាណាព្យាបាល និងសាធារណណជន មានការជឿទុកចិត្ត ដើម្បីឆ្លើយតបចំពោះសំណូមពរ និងការតវ៉ារបស់បេក្ខជនដែលបានដាក់ពាក្យតវ៉ាចំពោះលទ្ធផលនៃការប្រឡង។
ក្រសួងអប់រំ បញ្ជាក់ថា៖ «ក្រោយពីបានបញ្ចប់ការពិនិត្យ បានរកឃើញថា លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៖ ០៥ ធ្នូ ២០២២ មិនមានការប្រែប្រួលទេ។ ឈរលើមូលដ្ឋាននេះ ក្រសួងសូមប្រកាសបញ្ចប់ការទទួលពាក្យតវ៉ារបស់បេក្ខជន និងបញ្ចប់ដំណើរការពិនិត្យ និដោះស្រាយការតវ៉ា ចាប់ពីថ្ងៃចេញសេចក្តីប្រកាសព័ត៌មាននេះតទៅ»។
យ៉ាងណា ក្រសួងថា ចំពោះសិស្សប្រឡងធ្លាក់ ក្រសួងផ្តល់ឱកាសឱ្យប្រឡងឆ្នាំក្រោយទៀត និងលើកទឹកចិត្តឱ្យខិតខំរៀនសូត្របន្ត ដោយមានការជួយគាំទ្រពីសំណាក់លោកគ្រូ-អ្នកគ្រូ មាតាបិតា អាណាព្យាបាល និងសហគមន៍ ដើម្បីបានជោគជ័យនាឆ្នាំខាងមុខ។
អាណាព្យាបាល និងបេក្ខជនដែលប្រឡងធ្លាក់សញ្ញាបត្រមធ្យមសិក្សាទុតិយភូមិ ប្រមាណ៥០នាក់ កាលពីថ្ងៃទី២៣ ខែធ្នូ បានប្រមូលផ្ដុំនៅមុខក្រសួងអប់រំ យុវជន និងកីឡា ដោយស្នើសុំពិនិត្យសំណៅកែលើវិញ្ញាសារប្រឡងរបស់ពួកគេឡើងវិញ ក្រោយពួកគេមិនអស់ចិត្តនឹងលទ្ធផលប្រឡង។
ការស្នើនេះបានធ្វើឡើងក្រោយពីក្រសួងអប់រំ យុវជន និងកីឡា បានប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅរាជធានីភ្នំពេញ និងតាមបណ្តាខេត្ត នៅថ្ងៃទី២២ និងទី២៣ ខែធ្នូ ឆ្នាំ២០២២។ បើតាមសេចក្តីប្រកាសព័ត៌មានរបស់ក្រសួង លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ មានសិស្សប្រឡងជាប់ចំនួន៩០ ៩៥០នាក់ ស្មើនឹង ៧២,៣៣% នៃចំនួនបេក្ខជនមកប្រឡង៕