ក្រសួងការពារជាតិរុស្ស៊ី បានឱ្យដឹងនៅថ្ងៃពុធនេះថា ទាហានចំនួន៨៩នាក់របស់ខ្លួនបានស្លាប់នៅក្នុងការវាយប្រហាររបស់អ៊ុយក្រែន នៅទីក្រុង Makiivka ក្នុងទីតាំងដែលគ្រប់គ្រងដោយទ័ពរុស្ស៊ី នៃតំបន់ Donetsk ដោយបន្ថែមថា ហេតុផលចម្បងនៃការវាយប្រហារដោយអ៊ុយក្រែននេះ គឺកើតឡើងដោយសារតែកងទ័ពរបស់ខ្លួនបានប្រើទូរសព្ទដៃដោយគ្មានការអនុញ្ញាត។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ក្នុងសេចក្តីថ្លែងការណ៍មួយ ក្រសួងការពារជាតិរុស្ស៊ី បានលើកឡើងថា៖ «ជាការពិត ហេតុផលចម្បងសម្រាប់អ្វីដែលបានកើតឡើង [ការវាយប្រហារចំគោលដៅដោយអ៊ុយក្រែន] គឺការបើកដំណើរការ និងការប្រើប្រាស់ទូរសព្ទដៃយ៉ាងទូលំទូលាយដោយកងទ័ពនៅក្នុងតំបន់ដែលសត្រូវអាចវាយប្រហារបាន ខណៈសកម្មភាពនេះប្រាសចាកពីការហាមឃាត់ទាំងស្រុង »។
ប្រភពដដែលបន្តថា៖ «តាមរយៈសកម្មភាពខាងលើនេះ [ការប្រើប្រាស់ទូរសព្ទដៃ] វាបានអនុញ្ញាតឱ្យសត្រូវអាចធ្វើការតាមដាន និងកំណត់ទីតាំងរបស់ទាហានសម្រាប់ការវាយប្រហារដោយមីស៊ីលបាន»។
គួរបញ្ជាក់ថា ការវាយប្រហារមួយនេះក៏បានកើតឡើងភ្លាមៗ បន្ទាប់ពីព្រឹត្តិការណ៍ថ្ងៃចូលឆ្នាំសកល នៅលើទីតាំងសាលារៀនមួយកន្លែង ដែលបច្ចុប្បន្នត្រូវបានផ្លាស់ប្ដូរទៅជាបន្ទាយយោធា នៅក្នុងតំបន់ Makiivka ខណៈករណីនេះក៏បានបង្កឱ្យមានជាការខឹងសម្បាក្នុងចំណោមពលរដ្ឋ និងសមាជិកសភារុស្ស៊ីមួយចំនួន ទាក់ទងនឹងយុទ្ធសាស្ត្រយោធាដែលបានប្រើនៅទីនោះផងដែរ។
ក្រសួងការពារជាតិរុស្ស៊ីបានបន្ថែមថា សម្រាប់ការវាយប្រហារនេះ គឺអ៊ុយក្រែនបានប្រើប្រាស់គ្រាប់រ៉ុក្កែតចំនួន៤ ដែលជាប្រភេទរ៉ុក្កែតចល័ត ហាយម៉ាស (HIMARS) ផលិតដោយសហរដ្ឋអាមេរិក ដែលបានបណ្ដាលធ្វើឱ្យពិដានអគារដួលរលំ។
ទាក់ទិននឹងករណីនេះ ក្រសួងបានបន្ថែមនៅក្នុងសេចក្តីថ្លែងការណ៍របស់ខ្លួនថា គណៈកម្មការមួយក៏កំពុងតែធ្វើការស៊ើបអង្កេត ដើម្បីឈ្វេងយល់ឱ្យកាន់តែច្បាស់ពីស្ថានភាពនៃការវាយប្រហារនេះផងដែរ៕