ក្រសួងកសិកម្ម រុក្ខាប្រមាញ់ និងនេសាទ គ្រោងសាកល្បងរៀបចំឃុំចំនួន១០ នៅតាមបណ្ដាខេត្តមួយចំនួនឱ្យក្លាយទៅជាឃុំ កសិកម្មគំរូនៅក្នុងឆ្នាំនេះ ដើម្បីជួយដល់ប្រជាកសិករ និងលើកស្ទួយវិស័យកសិកម្មឱ្យមានការរីកចម្រើន។
រដ្ឋលេខាធិការក្រសួងកសិកម្ម ដែលទើបតែងតាំងថ្មី លោក យ៉ង សាំងកុមារ បានឱ្យដឹងនៅថ្ងៃទី០៥ ខែធ្នូ ឆ្នាំ២០២៣នេះថា ដើមចមដែលនាំឱ្យក្រសួងគ្រោងសាកល្បងរៀបចំ «ឃុំកសិកម្មគំរូ» ចំនួន១០ នៅតាមបណ្តាខេត្តមួយចំនួននោះ ដោយសារតែវិស័យកសិកម្មជាវិស័យអាទិភាពមួយក្នុងការជួយដល់ប្រជាកសិករ និងធ្វើឱ្យសេដ្ឋកិច្ចកម្ពុជាកាន់តែរីកចម្រើន។
លោកមានប្រសាសន៍ថា៖ «នៅពេលដែលយើងមានមន្ត្រីកសិកម្មម្នាក់ប្រចាំការ ជួយកសិករនៅក្នុងឃុំនីមួយៗហ្នឹង វានឹងជួយឱ្យមានការផ្លាស់ប្តូរ ជួយឱ្យមានការរីកចម្រើន ហើយវាធ្វើឱ្យមានការរីកចម្រើនល្អ យើងអាចពង្រីកទៅភូមិឃុំទូទាំងប្រទេសទៅថ្ងៃខាងមុខ។ វាអាស្រ័យទៅលើការសម្រេចចិត្តរបស់រាជរដ្ឋាភិបាលទៅថ្ងៃខាងមុខ តែវិធានការដំបូង គឺសម្តេចនាយករដ្ឋមន្ត្រី សុំសាកល្បងចំនួន១០ឃុំសិន ដើម្បីជួយការងារហ្នឹង»។
យ៉ាងណា លោកនៅពុំទាន់អាចបញ្ជាក់ថាតើឃុំទាំង១០ ដែលគ្រោងរៀបចំឡើងជាផ្លូវការនោះថាមានឃុំណាខ្លះនៅឡើយ ខណៈក្រុមការងារជំនាញកំពុងសិក្សាទីតាំង និងជ្រើសរើសមន្ត្រីជាប់កិច្ចសន្យាចំនួន១០នាក់ឱ្យជួយសម្របសម្រួលប្រជាកសិករនៅក្នុងឃុំគំរូទាំងនោះ ដើម្បីរួមគ្នាធ្វើការអភិវឌ្ឍវិស័យកសិកម្មនេះ។ ចំណែកប្រជាកសិករដែលចូលរួមជាមួយឃុំគំរូ លោកថា ក្រសួងមិនកំណត់លក្ខខណ្ឌនោះទេ គឺធ្វើឡើងដោយគោលការណ៍ស្ម័គ្រចិត្ត។
បើតាមលោក យ៉ង សាំងកុមារ ឃុំកសិកម្មគំរូដែលនឹងត្រូវរៀបចំឡើងក្នុងរយៈពេល៣ខែខាងមុខនេះ នឹងផ្តោតលើការដាំស្រូវ ស្វាយចន្ទី និងដំឡូង ជាដើម។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន សាទរចំពោះគម្រោងបង្កើតឃុំកសិកម្មគំរូរបស់ក្រសួងកសិកម្ម ប៉ុន្តែលោកថា ចំនួននេះនៅមិនទាន់គ្រប់តាមតម្រូវការក្នុងការជួយស្តារវិស័យកសិកម្មនៅកម្ពុជានៅឡើយ ខណៈប្រជាពលរដ្ឋប្រមាណជា ៨០% ប្រកបមុខរបរកសិកម្ម។ យ៉ាងណា លោកថា ដើម្បីជួយស្តារវិស័យកសិកម្ម រដ្ឋាភិបាលត្រូវសហការជាមួយដៃគូពាក់ព័ន្ធ រួមមាន អង្គការសង្គមស៊ីវិល និងវិស័យឯកជន ក្នុងការដោះស្រាយបញ្ហាប្រឈមនានាដែលកសិករជួបប្រទះ ។
លោកមានប្រសាសន៍ថា៖ «ក្រសួងអាចពង្រាយធនធាន ថវិកា ហើយបើកឱកាសឱ្យស្ថាប័នអង្គការសង្គមស៊ីវិល ដៃគូវិស័យឯកជន ធ្វើការវិនិយោគទៅលើឃុំផ្សេងៗទៀត ក្រៅពីឃុំទាំង១០ហ្នឹង ពីព្រោះធនធានថវិការដ្ឋអាចនឹងឆ្លើយតប ឬក៏អាចនឹងដោះស្រាយនូវបញ្ហាទាំងអស់ហ្នឹង។ ហើយអ៊ីចឹងវិធីសាស្ត្រដែលល្អក្នុងប្រព័ន្ធលទ្ធិប្រជាធិបតេយ្យ គួរតែត្រូវបានបើកឱកាស និងសហការជាមួយអង្គការសង្គមស៊ីវិល រួមជាមួយវិស័យឯកជនផ្សេងទៀត ធ្វើការដោះស្រាយទៅលើរឿងទាំងអស់ហ្នឹង ដើម្បីធានានូវដំណោះស្រាយមួយនេះដែលមានភាពល្អប្រសើរ និងសមស្រប»។
លោក ថេង សាវឿន ក៏បានជំរុញដល់ក្រសួងជ្រើសរើសមន្ត្រីជំនាញ ប្រកបដោយតម្លាភាព មិនប្រកាន់បក្ខពួក និងជាអ្នកដែលមានសមត្ថភាព ដើម្បីជួយសម្របសម្រួលដល់ប្រជាកសិករនៅក្នុងឃុំគំរូទាំង១០នោះ ឱ្យការងារនេះទទួលបានលទ្ធផលជាវិជ្ជមាន។
ក្នុងកិច្ចសំណេះសំណាលជាមួយអ្នកសារព័ត៌មាន ស្តីពី «វិស័យកសិកម្មនៅកម្ពុជា» កាលពីថ្ងៃទី៦ ខែធ្នូ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានថ្លែងថា លោកបានប្រគល់ភារកិច្ចជូនលោកបណ្ឌិត យ៉ង សាំងកុមារ ឱ្យជួយដោះស្រាយបញ្ហាស្រូវអង្ករ ដើម្បីឱ្យតម្លៃស្រូវនៅថេរ ប៉ុន្តែករណីនេះអាស្រ័យទៅលើការសម្រួលនូវចរាចរណ៍ស្រូវចូលទៅក្នុងរោងម៉ាស៊ីនកិនស្រូវ ដែលត្រូវរៀបចំឱ្យមានការសហការគ្នារវាងកសិករច្រូតកាត់ និងរោងម៉ាស៊ីនកិនស្រូវ ដោយបង្កើតឱ្យមានការប្រមូលផលជាវគ្គ ដើម្បីកុំឱ្យមានការជាន់គ្នាក្នុងពេលតែមួយ៕
