អ្នកគ្រប់គ្រងក្រុមហ៊ុនយោធាឯកជនមួយរបស់រុស្ស៊ី Wagner Group បានឱ្យដឹងនៅថ្ងៃពុធម្សិលមិញថា កងកម្លាំងរបស់ខ្លួន បានសម្រេចបាននូវការរំដោះទាំងស្រុងនៃទីក្រុងរ៉ែ Soledar ភាគខាងកើតអ៊ុយក្រែន ដោយក្នុងនោះ ពួកគេក៏បានសម្លាប់ទាហានអ៊ុយក្រែនប្រមាណជា៥០០នាក់ផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១២ ខែមករា ឆ្នាំ២០២៣។
ទោះជាយ៉ាងណា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ធ្លាប់បានច្រានចោលការលើកឡើងដោយក្រុមនេះ ដោយលោកថា ការប្រយុទ្ធគ្នានៅតែបន្តធ្វើឡើងនៅឡើយ។
យោងតាមលោក Yevgeny Prigozhin ជាអ្នកគ្រប់គ្រង់អង្គភាពយោធាឯកជន Wagner Group បានធ្វើការបញ្ជាក់កាលពីថ្ងៃអង្គារកន្លងទៅថា កងកម្លាំងរបស់លោកបានគ្រប់គ្រងក្នុងតំបន់ Soledar បើទោះបីជាការប្រយុទ្ធនៅតែបន្តកើតមាននៅក្នុងកណ្តាលទីក្រុងក៏ដោយ។
ទោះជាយ៉ាងណា អ្នកគ្រប់គ្រងអង្គភាពយោធានេះ នៅថ្ងៃពុធម្សិលមិញ មិនបានលើកឡើងអំពីការប៉ះទង្គិចគ្នាជាបន្តទៀតនៅក្នុងទីក្រុងរបស់អ៊ុយក្រែនមួយនេះនោះទេ។
ថ្លែងក្នុងសេចក្តីថ្លែងការណ៍មួយ លោកបន្ថែមថា៖ «ខ្ញុំចង់ធ្វើការបញ្ជាក់ពីការរំដោះបានយ៉ាងពេញលេញនៃទឹកដី Soledar ពីអង្គភាពនៃកងទ័ពអ៊ុយក្រែន ខណៈអង្គភាពអ៊ុយក្រែនទាំងឡាយណាដែលមិនព្រមចុះចាញ់ គឺត្រូវបានកម្ទេចចោលទាំងអស់»។
ជាមួយគ្នានេះ ប្រភពដដែលបន្តថា កងកម្លាំងរបស់ក្រុម Wagner ក៏បានសម្លាប់ទាហានអ៊ុយក្រែនប្រមាណជា៥០០នាក់ ផងដែរ ខណៈទីក្រុងទាំងមូល គឺពោរពេញទៅដោយសាកសពទាហានអ៊ុយក្រែន។
គួរបញ្ជាក់ថា អង្គភាពយោធាឯកជន Wagner ត្រូវបានបង្កើតឡើងដំបូងកាលពីឆ្នាំ២០១៤ ដើម្បីបញ្ជូនទាហានមានសមត្ថភាពប្រយុទ្ធទៅតំបន់ដុនបាស់ ភាគខាងកើតអ៊ុយក្រែន។
ទោះជាយ៉ាងណា លោកប្រធានាធិបតី វ្លាឌីមៀរ ពូទីន ធ្លាប់បានលើកឡើងកាលពីពេលកន្លងទៅថា ក្រុមនេះមិនមែនតំណាងឱ្យប្រទេសរុស្ស៊ីឡើយ ដោយពួកគេគ្រាន់តែដើរតួជាក្រុមហ៊ុនយោធាឯកជនប៉ុណ្ណោះ៕
