នៅថ្ងៃសុក្រនេះ បុគ្គលដែលស្និទ្ធនឹងលោក ពូទីន បានស្នើឱ្យរឹបអូសយកទ្រព្យសម្បត្តិរបស់ពលរដ្ឋរុស្ស៊ីដែលបង្ខូចកេរ្តិ៍ឈ្មោះកងកម្លាំងប្រដាប់អាវុធរុស្ស៊ី និងប្រឆាំងនឹងសង្គ្រាមនៅអ៊ុយក្រែន។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១៣ ខែមករា ឆ្នាំ២០២៣ នេះ។
លោក វីយ៉ាឆេស្លាវ វ៉ូឡូឌីន (Vyacheslav Volodin) អ្នកនាំពាក្យសភា Duma របស់រុស្ស៊ី បាននិយាយថា វិធានការបច្ចុប្បន្ន ដូចជា ការផាកពិន័យសម្រាប់អ្នកដែលនិយាយប្រឆាំងនឹងអ្វីដែលទីក្រុងម៉ូស្គូហៅថាជា «ប្រតិបត្តិការយោធាពិសេស» នៅអ៊ុយក្រែន គឺមិនមានភាពតឹងរ៉ឹងគ្រប់គ្រាន់នោះទេ។
កន្លងមក រុស្ស៊ីធ្លាប់បានផាកពិន័យបុគ្គលមួយចំនួនដែលហ៊ានរិះគន់លោក ពូទីន និងការឈ្លានពានរបស់រុស្ស៊ីនៅអ៊ុយក្រែន ក្នុងនោះរួមមានទាំងតារាចម្រៀងដ៏ល្បីម្នាក់របស់រុស្ស៊ី ដែលបានរងនូវការផាកពិន័យក្នុងចំនួនទឹកប្រាក់ប្រមាណ៨០០ដុល្លារ។
កាលពីថ្ងៃទី៤ ខែមីនា ឆ្នាំ២០២២ សភារុស្ស៊ីបានអនុម័តច្បាប់ស្តីពីការហាមប្រាមការ «បង្ខូចកេរ្តិ៍ឈ្មោះ» កងទ័ពរុស្ស៊ី និងហាមឃាត់ការផ្សព្វផ្សាយព័ត៌មានមិនពិត ឬ «ការផ្សព្វផ្សាយជាសាធារណៈនូវព័ត៌មានមិនពិតដោយចេតនា អំពីការប្រើប្រាស់កងកម្លាំងប្រដាប់អាវុធនៃសហព័ន្ធរុស្ស៊ី»។
ការឈ្លានពានរបស់រុស្ស៊ីលើអ៊ុយក្រែន គិតរហូតមកដល់ពេលនេះ បានឈានចូលមកដល់ខែទី១០ហើយ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត និងតំបន់ទីក្រុងជាច្រើនប្រែក្លាយទៅជាគំនរបាក់បែក ខណៈលោក ហ្សេលេនស្គី ក៏ធ្លាប់បានចោទប្រទេសរុស្ស៊ីថាកំពុងតែព្យាយាមកម្ចាត់ប្រទេសរបស់លោកចេញពីពិភពលោកផងដែរ៕
