ពលរដ្ឋដែលរស់នៅជាប់ព្រែកថី ក្នុងសង្កាត់រកាខ្ពស់ ក្រុងតាខ្មៅ ខេត្តកណ្ដាល ចំនួនជិត១០០គ្រួសារ បង្ខំចិត្តរើផ្ទះសម្បែងចេញពីកន្លែងធ្លាប់រស់នៅ ក្រោយពីមានផ្ទះចំនួន៦ខ្នងបានបាក់ស្រុតចូលក្នុងព្រែក ខណៈពលរដ្ឋទាំងនោះស្នើឱ្យរដ្ឋាភិបាលផ្ដល់សំណងដីនិងផ្ទះដល់ពួកគេ។
បើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃទី១៧ ខែមករា ឆ្នាំ២០២៣ បង្ហាញថា មានពលរដ្ឋចំនួន ៦៥គ្រួសារ ស្មើ ៦១ខ្នងផ្ទះ ស្ថិតនៅភូមិព្រែកថី និងភូមិព្រែកសំរោង នៃសង្កាត់រកាខ្ពស់ ក្រុងតាខ្មៅ ខេត្តកណ្ដាល បានរងផលប៉ះពាល់ពីការបាក់ដី ដោយផ្ទះចំនួន៦ខ្នងបានបាក់ចូលទឹកព្រែក ហើយផ្ទះផ្សេងទៀតតម្រូវឱ្យរើចេញ។
នៅព្រឹកថ្ងៃអង្គារ អ្នករាយការណ៍ព័ត៌មាន វីអូឌី បានទៅដល់ទីតាំងបាក់ស្រុតនោះផ្ទាល់ ដោយបានឃើញផ្ទះពីរខ្នងបានបាក់ចូលទឹកភ្លាមៗ ដែលធ្វើឱ្យពលរដ្ឋដែលកំពុងរុះរើនោះ និងពលរដ្ឋផ្សេងទៀតផ្អើលឆោឡោមកមើលទិដ្ឋភាពបាក់ស្រុតនោះ។ ផ្ទះពលរដ្ឋដែលបានរុះរើទាន់ពេលវេលាខ្លះ បានលើកផ្ទះពួកគេមកដាក់លើថ្នល់ ហើយពលរដ្ឋខ្លះទៀតកំពុងព្យាយាមរុះរើផ្ទះរបស់ពួកគេ។
ពលរដ្ឋភូមិព្រែកថី លោក យ៉េន បាន អាយុ៥៣ឆ្នាំ បានលើកឡើងថា ផ្ទះរបស់គាត់ត្រូវបាក់ចូលព្រែក កាលពីយប់ថ្ងៃចន្ទ។ ពលរដ្ឋរូបនេះនៅតែមានចម្ងល់ថា មូលហេតុនៃការបាក់ផ្ទះចូលព្រែកនៅក្នុងខែប្រាំងនេះ អាចបណ្ដាលមកពីការបើកទឹកទំនប់ផ្នែកខាងលើ។
លោកបានបន្តថា គ្រួសារលោកមិនបានរើផ្ទះឱ្យបានទាន់ពេលវេលានោះទេ ហើយផ្ទះដែលបានសាងសង់អស់ទឹកប្រាក់ចំនួន១ម៉ឺនដុល្លានោះបានធ្លាក់ចូលក្នុងទឹកបាត់ទៅហើយ។
លោកបន្តថា៖ «ខ្ញុំដេកមិនលក់ ចាំមើលតែផ្ទះដែរហ្នឹង! ហើយជួយវាម៉េចកើតបើផ្ទះថ្មទៅអ៊ីចឹងហើយ? ពីរនាក់ប្ដីប្រពន្ធក៏ជួយអីមិនកើតផង យកអីវ៉ាន់អស់ហើយ នៅតែតួផ្ទះទេ។ មានអារម្មណ៍ភ័យខ្លាចអ៊ីចឹងទៅ ណាមួយគ្មានផ្ទះគ្មានអីនៅ រដ្ឋាភិបាលជួយកូនចៅ ឱ្យផ្ដល់សំណងឱ្យសាងសង់ផ្ទះសមរម្យផង»។
ពលរដ្ឋរូបនេះនិយាយថា ក្រោយផ្ទះរបស់លោកបាក់ចូលព្រែក អាជ្ញាធរខេត្តកណ្ដាល បានផ្ដល់ប្រាក់២សែនរៀល និងសម្ភារឧបត្ថម្ភបន្តិចបន្តួច ប៉ុន្តែលោកថាមិនអាចធ្វើឱ្យគ្រួសារលោកអាចកសាងជីវិតថ្មីបាននោះទេ។
លោកថា៖ «វាមិនគ្រប់ទេ យកអីបានប៉ុណ្ណឹង? យើងឥលូវហូបអីគ្រាន់ បើគ្រួសារយើងម្នាក់ៗបាក់[ផ្ទះចូលព្រែក] ប៉ុណ្ណឹងហូបមិនគ្រាន់ទេ..។ ទម្រាំបានទីជម្រកនៅ មិនដឹងថ្ងៃណាបានដីបានផ្ទះ វាពិបាកអ៊ីចឹង»។
ពលរដ្ឋម្នាក់ទៀត អ្នកស្រី ម៉េត បឿន បានឱ្យដឹងថា ផ្ទះរបស់គាត់កំពុងរើចេញពីមាត់ព្រែក ដើម្បីចៀសវាងការបាក់ចូលក្នុងព្រែកបន្តទៀត។ អ្នកស្រីបន្ថែមថា ដើម្បីសាងសង់ផ្ទះបាន អ្នកស្រីបានខ្ចីបំណុលគ្រឹះស្ថានហិរញ្ញវត្ថុ ដោយមិនទាន់បានសងបំណុលនៅឡើយទេ ហើយអ្នកស្រីក៏មិនដឹងថាត្រូវរស់នៅទីណានោះដែរនៅពេលដែលរុះរើផ្ទះរួចរាល់។
អ្នកស្រីថា៖ «ផ្ទះហ្នឹង កូនយកលុយអង្គការមកធ្វើ មិនទាន់សងគេរួចផង! ដាក់៧ឆ្នាំ មិនទាន់សងគេរួចផង! មិនដឹងនៅឯណាទេនេះ បើអត់មានដីមានធ្លី អត់មានលុយទិញដីផង»។
អ្នកស្រីបន្ថែមថា មកទល់ពេលនេះ គាត់ទើបតែទទួលបានជំនួយឧបត្ថម្ភជាអង្ករ និងប្រាក់បន្តិចបន្តួចប៉ុណ្ណោះ ដោយអ្នកស្រីសង្ឃឹមថា រដ្ឋាភិបាលនឹងជួយដល់ពួកគាត់ក្នុងពេលឆាប់ៗនេះ។
អភិបាលខេត្តកណ្ដាល លោក គង់ សោភ័ណ្ឌ ដែលបានចុះទៅជួបពលរដ្ឋរងគ្រោះនៅព្រឹកថ្ងៃទី១៧ ខែមករា បានបដិសេធឆ្លើយតបជាមួយអ្នកសារព័ត៌មានវីអូឌី ដោយថា លោកកំពុងជាប់រវល់។
យ៉ាងណា ចៅសង្កាត់រកាខ្ពស់ លោក ឈឿង ធូ បានឱ្យដឹងថា មូលហេតុដែលធ្វើឱ្យមានការបាក់ស្រុតផ្ទះចូលព្រែកនេះ គឺបណ្តាលមកពីទឹកឡើងខ្លាំង ដែលមានប្រភពមកពីខេត្តកំពង់ស្ពឺ។ លោកបន្ថែមថា មានផ្ទះចំនួន៦០ខ្នងដែលបានរងផលប៉ះពាល់ ខណៈខាងអាជ្ញាធរពាក់ព័ន្ធកំពុងព្យាយាមជួយ និងផ្ដល់ជំនួយបឋមដល់ពលរដ្ឋដែលរងគ្រោះទាំងនោះ។
លោកបន្តថា៖ «ការសន្និដ្ឋានរបស់ខ្ញុំអត់ច្បាស់ទេ ឃើញក្រុមការងារក្រសួងហិរញ្ញ លោកចុះមកបង្ហោះដ្រូន ថាចុះវាស់វែងកន្លងមកហើយ តែមិនទាន់ដឹងថាម្នាក់ឱ្យប៉ុន្មាន អត់ច្បាស់ទេអូន»។
បើតាមការចុះផ្សាយរបស់អគ្គស្នងការដ្ឋាននគរបាលជាតិ កាលពីថ្ងៃទី១៥ ខែមករា ក៏បានលើកឡើងដែរថា កម្លាំងនគរបាលជាតិចុះជួយសង្គ្រោះប្រជាពលរដ្ឋដែលលិចផ្ទះដោយសារជំនន់ទឹកភ្លៀង នៅតាមសណ្ដស្ទឹងព្រែកត្នោត ចំនួន១០សង្កាត់ ក្នុងភូមិសាស្រ្តខណ្ឌដង្កោ ក្នុងនោះមាន២៩ភូមិ ដែលមាន ៩៥៣ខ្នងផ្ទះ និង ១ ០២៦គ្រួសារ ស្មើមនុស្ស ៤ ០៣៥នាក់។
បើតាមអគ្គស្នងការដ្ឋាននគរបាលជាតិដដែល សង្កាត់ដែលប៉ះពាល់នោះមាន សង្កាត់សាក់សំពៅ, សង្កាត់ស្ពានថ្ម, សង្កាត់ក្រាំងពង្រ, សង្កាត់គងនយ, សង្កាត់ទៀន, សង្កាត់ព្រែកកំពឹស, សង្កាត់ជើងឯក, សង្កាត់ព្រៃស, សង្កាត់ដង្កោ, និងសង្កាត់ព្រៃវែង៕