វិមានក្រឹមឡាំង (Kremlin) បានឱ្យដឹងនៅថ្ងៃចន្ទម្សិលមិញថា រថក្រោះដែលអង់គ្លេសគ្រោងនឹងបញ្ជូនទៅកាន់អ៊ុយក្រែន នឹងត្រូវបានកម្ទេចដោយកងទ័ពរុស្ស៊ី ដោយខ្លួនក៏បានព្រមានលោកខាងលិចថា ការផ្គត់ផ្គង់អាវុធទំនើបបន្ថែមទៀតដល់អ៊ុយក្រែននឹងមិនអាចផ្លាស់ប្តូរលទ្ធផលនៃសង្គ្រាមនោះទេ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៦ ខែមករា ឆ្នាំ២០២៣។
គិតចាប់តាំងពីប្រធានាធិបតីរុស្ស៊ី លោក វ្លាឌីមៀរ ពូទីន បានបញ្ជាកងទ័ពរបស់ខ្លួនឱ្យចូលឈ្លានពានក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំមុនមក សហរដ្ឋអាមេរិក និងសម្ពន្ធមិត្តនានាបានផ្តល់អាវុធក្នុងទំហំទឹកប្រាក់រាប់សិបពាន់លានដុល្លារ ដែលក្នុងនោះរួមមានទាំងប្រព័ន្ធរ៉ុក្កែត យន្តហោះគ្មានមនុស្សបើក រថពាសដែក និងប្រព័ន្ធទំនាក់ទំនងផងដែរ។
ជាមួយគ្នានេះ ចក្រភពអង់គ្លេស កាលពីថ្ងៃសៅរ៍កន្លងទៅ ក៏បានលើកឡើងដែរថា ខ្លួននឹងបញ្ជូនរថក្រោះប្រយុទ្ធប្រភេទ Challenger 2 ចំនួន១៤គ្រឿង ក៏ដូចជាកាំភ្លើងធំទំនើបផ្សេងៗទៀតដល់អ៊ុយក្រែន នៅក្នុងសប្តាហ៍ខាងមុខនេះផងដែរ។
ទោះជាយ៉ាងណា ទាក់ទិននឹងសំណួរជុំវិញការផ្ដល់ជូនរថក្រោះអង់គ្លេសទាំងនេះ អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បានលើកឡើងថា៖ «ពួកគេកំពុងតែប្រើប្រាស់ប្រទេសនេះ [អ៊ុយក្រែន] ជាឧបករណ៍មួយដើម្បីសម្រេចបាននូវគោលដៅរបស់ពួកគេក្នុងការប្រឆាំងនឹងរុស្ស៊ី»។
អ្នកនាំពាក្យវិមានក្រឹមឡាំង បន្ថែមថា៖ «រថក្រោះទាំងអស់នេះនឹងត្រូវបានកម្ទេចចោល ដូចទៅនឹងរថក្រោះផ្សេងទៀតដែលយើងបានកម្ទេចកាលពីពេលកន្លងទៅផងដែរ»។
លោក ឌីមីទ្រី ប៉េស្កូវ បន្តឱ្យដឹងថា ការផ្គត់ផ្គង់ផ្នែកយោធាថ្មីៗពីប្រទេសទាំងឡាយ ដែលមានដូចជាអង់គ្លេស និងប៉ូឡូញ គឺនឹងមិនអាចផ្លាស់ប្តូរស្ថានភាពសង្គ្រាមនោះទេ ប៉ុន្តែផ្ទុយទៅវិញ វានឹងធ្វើឱ្យសង្គ្រាមកាន់តែអូសបន្លាយរយៈពេលយូរបន្ថែមទៀត ដែលចុងក្រោយ វានឹងមិនផ្ដល់អ្វីក្រៅតែពីការនាំមកនូវបញ្ហាកាន់តែច្រើនដល់អ៊ុយក្រែននោះទេ។
គួរបញ្ជាក់ថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែន តាមផ្លូវគោក ផ្លូវអាកាស និងសមុទ្រកាលពីខែកុម្ភៈ ឆ្នាំមុន ដែលបានបង្កឱ្យជនស៊ីវិលរាប់ពាន់នាក់បានស្លាប់ តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង។
ទាក់ទិននឹងករណីនេះ ចក្រភពអង់គ្លេស សហរដ្ឋអាមេរិក និងសម្ពន្ធមិត្តនានា ក៏បានថ្កោលទោសការឈ្លានពានរបស់រុស្ស៊ីលើទឹកដីអ៊ុយក្រែននេះផងដែរ ស្របពេលដែលអ៊ុយក្រែនបានប្តេជ្ញាប្រយុទ្ធរហូតដល់ទាហានរុស្ស៊ីចុងក្រោយត្រូវបានបណ្តេញចេញពីទឹកដីរបស់ខ្លួន៕
