ប្រធានប៉ូលិសជាតិអ៊ុយក្រែន បានឱ្យដឹងថា មនុស្សចំនួន១៨នាក់ ដែលក្នុងនោះរួមមានរដ្ឋមន្ត្រីមហាផ្ទៃអ៊ុយក្រែន និងមន្ត្រីជាន់ខ្ពស់ផ្សេងទៀត បានស្លាប់នៅថ្ងៃពុធនេះ ក្នុងហេតុការណ៍ធ្លាក់ឧទ្ធម្ភាគចក្រមួយនៅតំបន់ជាយក្រុងខាងក្រៅទីក្រុងកៀវ (Kyiv)។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៨ ខែមករា ឆ្នាំ២០២៣។
យោងតាមការបញ្ជាក់ពីមន្រ្តី ឧទ្ធម្ភាគចក្រនោះបានធ្លាក់នៅជិតទីតាំងទារកដ្ឋានមួយកន្លែងក្នុងទីក្រុង Brovary នៅជាយក្រុងភាគខាងកើតនៃរដ្ឋធានីកៀវ ដោយក្នុងចំណោមអ្នកស្លាប់ ក្នុងនោះមានក្មេងចំនួន៣នាក់ ខណៈមនុស្សជាច្រើននាក់ផ្សេងទៀតក៏បានរងរបួស និងត្រូវបានបញ្ជូនទៅកាន់មន្ទីរពេទ្យផងដែរ។
ទោះជាយ៉ាងណា ក្រុមមន្ត្រីមិនបានបញ្ជាក់ភ្លាមៗអំពីមូលហេតុនៃការធ្លាក់ឧទ្ធម្ភាគចក្រនោះទេ ដោយខាងរុស្ស៊ីក៏មិនមានជាការអត្ថាធិប្បាយអ្វីភ្លាមៗផងដែរ។
គួរបញ្ជាក់ថា រដ្ឋមន្ត្រីមហាផ្ទៃ លោក Denys Monastyrsky គឺជាមន្ត្រីជាន់ខ្ពស់បំផុតរបស់អ៊ុយក្រែន ដែលបានស្លាប់ គិតចាប់តាំងពីរុស្ស៊ីបើកការឈ្លានពានអ៊ុយក្រែនក្នុងខែកុម្ភៈឆ្នាំមុនមក។
យោងតាមប្រធានប៉ូលិសជាតិអ៊ុយក្រែន លោក Igor Klymenko ហេតុការណ៍នេះក៏បានសម្លាប់មន្ត្រីជាន់ខ្ពស់ក្រសួងមហាផ្ទៃផ្សេងទៀតផងដែរ។
ជាមួយគ្នានេះ អភិបាលតំបន់កៀវ លោក អូឡិចស៊ី គូលេបា (Oleksiy Kuleba) ក៏បានឱ្យដឹងតាមរយៈប្រព័ន្ធតេឡេក្រាម (Telegram) ថា៖ «សោកនាដកម្មនេះក៏បូករួមទាំងកុមារ និងបុគ្គលិកនៅក្នុងទារកដ្ឋានផងដែរ។ បច្ចុប្បន្ន មនុស្សគ្រប់គ្នាត្រូវបានជម្លៀសចេញ»។
ទាក់ទិននឹងករណីនេះ អនុប្រធានការិយាល័យប្រធានាធិបតីអ៊ុយក្រែន លោក Kyrylo Tymoshenko បានបន្ថែមថា៖ «បច្ចុប្បន្ន យើងកំពុងតែប្រមូលព័ត៌មានអំពីករណីស្លាប់ និងរបួសបន្ថែមទៀត ក៏ដូចជាស្ថានការណ៍នៅក្នុងទីតាំងកើតហេតុផងដែរ»៕