អង្គភាពប្រឆាំងអំពើពុករលួយ (ACU) ព្រមានផ្អាកជាបណ្ដោះអាសន្ននូវមុខងាររបស់អភិបាលស្រុកបសេដ្ឋ នៃខេត្តកំពង់ស្ពឺ ពាក់ព័ន្ធករណីទិញលក់ដីរដ្ឋដោយខុសច្បាប់។
លិខិតរបស់អង្គភាពប្រឆាំងអំពើពុករលួយ ផ្ញើទៅអភិបាលស្រុកបសេដ្ឋ លោក ឈឺន សុធន កាលពីថ្ងៃទី១៦ ខែមករា ឆ្នាំ២០២៣ ដែលវីអូឌីទើបទទួលបានថ្ងៃព្រហស្បតិ៍នេះ បានណែនាំទៅអភិបាលខេត្តរូបនេះ ផ្អាកសកម្មភាពដែលអនុញ្ញាតឱ្យអ្នកស្រី វន់ ឈើវិន គីអានសាយណាវ ក្នុងការប្រមូលទិញដីដោយខុសច្បាប់ ដោយមានលោក ស៊ិន សារុន នាយករដ្ឋបាលស្រុក ជាអ្នករៀបចំយកដីរបស់រដ្ឋ ដែលស្ថិតក្រោមការគ្រប់គ្រងរបស់មន្ទីរបរិស្ថានខេត្ត លក់ទៅឱ្យឈ្មួញ។
ACU បានឱ្យដឹងថា នាយករដ្ឋបាលស្រុកបសេដ្ឋ លោក ស៊ិន សារុន បានគប់គិតគ្នាយកដីក្នុងតំបន់ទំនប់មួយកន្លែង ស្ថិតក្នុងស្រុកបសេដ្ឋ លក់ទៅឱ្យឈ្មួញ និងបានចម្លងដៃម៉ារឺវេនបើកទំនប់ទឹកពីឆ្មាំយាមទំនប់ ហើយធ្វើឱ្យគោកទឹកក្នុងទំនប់នោះ ដើម្បីវាស់វែងយកដីលក់ផងដែរ។
ACU បានប្រាប់ទៅអភិបាលស្រុកបសេដ្ឋ លោក ឈឺន សុធន បញ្ជាឱ្យផ្អាកសកម្មភាពនេះជាបន្ទាន់ និងប្រគល់ដៃម៉ារឺវេនបើកទំនប់ទឹកនោះទៅឱ្យរដ្ឋបាលស្រុករក្សាទុកវិញ ដោយថា ទង្វើនេះបានប៉ះពាល់យ៉ាងខ្លាំងដល់ការស៊ើបអង្កេតរបស់អង្គភាពប្រឆាំងអំពើពុករលួយក្នុងករណីនេះ។
ACU ព្រមានថា ក្នុងករណីអភិបាលស្រុកបសេដ្ឋ លោក ឈឺន សុធន មិនព្រមបញ្ឈប់នូវសកម្មភាពទាំងនេះទេ អង្គភាពមួយនេះនឹងស្នើទៅអាជ្ញាធរផ្អាកជាបណ្តោះអាសន្ននូវមុខងាររបស់អភិបាលស្រុករូបនេះ។
វីអូឌី បានសាកសួរទៅអ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្ត ថាតើអភិបាលស្រុកបសេដ្ឋ លោក ឈឺន សុធន មានជាប់ពាក់ព័ន្ធករណីនេះទេ ប៉ុន្តែលោក សយ ច័ន្ទវិចិត្ត មិនទាន់អាចឆ្លើយបានទេ ដោយលោកថា ករណីនេះកំពុងស្ថិតក្រោមការស៊ើបអង្កេតរបស់ ACU នៅឡើយ។
វីអូឌី មិនអាចសុំការឆ្លើយតបពីអភិបាលស្រុកបសេដ្ឋ លោក ឈឺន សុធន បានទេ នៅថ្ងៃព្រហស្បតិ៍នេះ។
កាលពីថ្ងៃទី២៨ ខែធ្នូ ឆ្នាំ២០២២ ACU បានឱ្យប្រធានមន្ទីរបរិស្ថានខេត្តកណ្ដាល លោក ពៅ សោមាណាក់ ចូលឆ្លើយបំភ្លឺ និងដាក់ឯកសារពាក់ព័ន្ធមកអង្គភាពមួយនេះ ក្រោយទទួលបានបណ្តឹងជុំវិញភាពមិនប្រក្រតីមួយចំនួន ក្នុងពេលលោកធ្វើសកម្មភាពបំពេញតួនាទីភារកិច្ចរបស់ខ្លួន។
មួយទៀតនោះ កាលពីថ្ងៃទី១២ ខែមករា ឆ្នាំ២០២៣ សាលាដំបូងរាជធានីភ្នំពេញ បានឃុំខ្លួនមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក ឡាយ សំណាង ជាបណ្ដោះអាសន្ននៅពន្ធនាគារ PJ ដែលការឃុំនេះធ្វើឡើងក្រោយពី ACU ស្រាវជ្រាវរកឃើញថា លោកបានកិបកេងថវិការដ្ឋជាង ១ ៥០០លានរៀល ឬស្មើប្រមាណជាង ៣៨ម៉ឺនដុល្លារ។
ពាក់ព័ន្ធនឹងករណី ACU មានចំណាត់ការជាបន្តបន្ទាប់លើមន្ត្រីរដ្ឋដែលជាប់ពាក់ព័ន្ធអំពើពុករលួយនេះ នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី បានសាទរ ដោយថា ចំណាត់ការនេះនឹងជួយលុបបំបាត់បញ្ហាអំពើពុករលួយក្នុងសង្គមកម្ពុជា និងព្រមានដល់មន្ត្រីផ្សេងទៀតកុំឱ្យប្រព្រឹត្តអំពើបែបនេះតាម។
លោក ប៉ិច ពិសី លើកឡើងថា នេះជាការខិតខំប្រឹងប្រែងមួយរបស់អង្គភាពប្រឆាំងអំពើពុករលួយ ក្នុងការស្រាវជ្រាវ និងស៊ើបអង្កេត ក្រោយទទួលបានបណ្ដឹងពាក់ព័ន្ធបញ្ហាអំពើពុករលួយ។ លោកក៏ជំរុញឱ្យ ACU ធ្វើកិច្ចការងារនេះជាប្រព័ន្ធនៅតាមស្ថាប័នរដ្ឋផ្សេងទៀត ដើម្បីទប់ស្កាត់បញ្ហាអំពើពុករលួយ និងការខាតបង់ថវិកាជាតិ។
លោកបន្ថែមថា៖ «នេះជាសញ្ញាវិជ្ជមានមួយ។ ខ្ញុំគិតថា រដ្ឋាភិបាលក្តី អង្គភាពប្រឆាំងអំពើពុករលួយក្តី គួរតែធ្វើកិច្ចការនេះជាប្រព័ន្ធតែម្តង នៅគ្រប់ស្ថាប័នសាធារណៈ ដើម្បីកុំឱ្យមានការបាត់បង់ថវិកាជាតិ ដែលយើងមានតិចតួចហ្នឹង តាមរយៈការកិបកេង ការបន្លំ ការប្រព្រឹត្តអំពើពុករលួយរបស់មន្ត្រីសាធារណៈហ្នឹង»។
បើតាមសន្ទស្សន៍យល់ឃើញពីអំពើពុករលួយ ឆ្នាំ២០២១ ចេញផ្សាយដោយអង្គការតម្លាភាពអន្តរជាតិ (Transparency International) នៅថ្ងៃទី២៥ ខែមករា ឆ្នាំ២០២២ បង្ហាញថា កម្ពុជាជាប់ចំណាត់ថ្នាក់លេខ១៥៧ ក្នុងចំណោមប្រទេស និងដែនដីចំនួន១៨០ នៅលើពិភពលោក។ ចំណាត់ថ្នាក់នេះបង្ហាញថា កម្ពុជានៅតែជាប្រទេសមានកម្រិតពុករលួយអាក្រក់ជាងគេបំផុត ក្នុងចំណោមប្រទេសទាំង១០ នៃសមាជិកអាស៊ាន។
ច្បាប់ក្រមព្រហ្មទណ្ឌ ត្រង់មាត្រា៥៩៨ ចែងថា ជនដែលជាអ្នករាជការសាធារណៈ ឬពលរដ្ឋទទួលអាណត្តិសាធារណៈដោយការបោះឆ្នោត ប្រព្រឹត្តអំពើកេងយកផលប្រយោជន៍ដោយខុសច្បាប់ ត្រូវផ្តន្ទាទោសដាក់ពន្ធនាគារពី២ឆ្នាំ ទៅ៥ឆ្នាំ និងពិន័យជាប្រាក់ពី ៤លានរៀល ទៅ១០លានរៀល។
ចំណែកច្បាប់ស្តីពី «ការប្រឆាំងការសម្អាតប្រាក់ និងហិរញ្ញប្បទានភេរវកម្ម» ក្នុងមាត្រា៣៨ ចែងថា ជនដែលប្រព្រឹត្តបទល្មើសសម្អាតប្រាក់ ត្រូវផ្ដន្ទាទោសដាក់ពន្ធនាគារពី ២ឆ្នាំ ដល់ ៥ឆ្នាំ និងពិន័យជាប្រាក់ពី ១០០លានរៀល ទៅ ៥០០លានរៀល ដោយមិនទាន់គិតដល់ទោសបន្ថែមមានចែងក្នុងក្រមព្រហ្មទណ្ឌ៕
