ពលរដ្ឋមួយក្រុមដែលរងផលប៉ះពាល់ពីគម្រោងអភិវឌ្ឍន៍ផ្លូវដែក នៅរាជធានីភ្នំពេញ ស្នើជាថ្មីទៀតទៅរដ្ឋបាលរាជធានីភ្នំពេញ ពន្លឿនការដោះស្រាយបញ្ហាដីធ្លីជូនពួកគេឱ្យបានឆាប់ ខណៈពួកគាត់បារម្ភពីការបណ្តេញចេញដោយបង្ខំ និងមិនទទួលបានសំណងសមរម្យ ដោយសារអាជ្ញាធរនៅតែចង្អុលបង្ហាញឱ្យពួកគេទទួលយកដីនៅក្រុមហ៊ុន7NG ស្ថិតនៅខេត្តកណ្ដាល។
ប្រជាពលរដ្ឋរស់នៅភូមិ១៦ សង្កាត់ទឹកល្អក់១ ខណ្ឌទួលគោក លោក គា ភារ៉ា ដែលអះអាងថា រងផលប៉ះពាល់ពីគម្រោងអភិវឌ្ឍន៍ផ្លូវដែក នៅរាជធានីភ្នំពេញ បានឱ្យវីអូឌីដឹងនៅថ្ងៃព្រហស្បតិ៍នេះថា កាលពីរសៀលថ្ងៃពុធម្សិលមិញ មន្ត្រីរដ្ឋបាលរាជធានីភ្នំពេញ បានណាត់ជួបប្រជាពលរដ្ឋដែលរងផលប៉ះពាល់ អាជ្ញាធរមូលដ្ឋាន និងមន្ត្រីមន្ទីររៀបចំដែនដី នគរូបនីយកម្ម និងសំណង់ ដើម្បីជជែកគ្នារកដំណោះស្រាយ។ លោកបន្តថា ក្រោយពីជួបជជែកគ្នា មន្ត្រីពាក់ព័ន្ធទាំងនោះនៅតែប្រាប់ពួកគាត់ឱ្យទទួលយកដីនៅតំបន់អភិវឌ្ឍន៍របស់ក្រុមហ៊ុន 7NG ស្ថិតនៅខេត្តកណ្ដាល និងតំបន់គោកខ្សាច់ ដែលមានចម្ងាយប្រមាណ ៥ ទៅ ៦គីឡូម៉ែត្រ ពីរាជធានីភ្នំពេញ ដោយថា នៅតំបន់នោះកំពុងធ្វើការអភិវឌ្ឍ មានផ្លូវ ទឹក ភ្លើង ផ្សារ និងរោងចក្រ ក្បែរនោះថែមទៀតផង។
យ៉ាងណា លោកថា ពួកគាត់មិនព្រមទទួលយកដីនៅតំបន់អភិវឌ្ឍន៍របស់ក្រុមហ៊ុន 7NG នោះទេ ហើយពួកគេនៅតែទទូចទៅអាជ្ញាធរផ្តល់ដីនៅក្បែរ «វត្តទួលអស់លោក» ឬដីក្នុងខណ្ឌទួលគោក ដែលស្ថិតនៅក្បែរទីប្រជុំជន ដើម្បីឱ្យពួកគាត់ងាយស្រួលរកប្រាក់ទ្រទ្រង់ជីវភាពគ្រួសារ និងងាយស្រួលកូនៗទៅសិក្សា ជាដើម។
លោកនិយាយថា៖ «យើងសួរបងប្អូនប៉ុន្មានគ្រួសារហ្នឹង គាត់ចង់បានដីនៅក្បែរវត្តទួលអស់លោក ដោយសារដីនៅតំបន់នោះ វាមានការអភិវឌ្ឍខ្លាំងជាងតំបន់ផ្សេងៗ ពីព្រោះកន្លែងនោះ វាមានសាលារៀន មានមន្ទីរពេទ្យ ជិតហ្នឹងទាំងអស់! ហើយដូចនៅ 7NG តំបន់មិនទាន់អភិវឌ្ឍ មានប្រជាពលរដ្ឋជាច្រើនដែលគាត់បានចាកចេញទៅទីនោះ គាត់ថាអត់ទាន់មានទឹក មានភ្លើង ក៏អត់ទាន់មានការអភិវឌ្ឍទេ»។
ប្រជាពលរដ្ឋដែលរងផលប៉ះពាល់ម្នាក់ទៀត អ្នកស្រី មាស ស្រីភាព រស់នៅភូមិ១៦ សង្កាត់ទឹកល្អក់១ បានឱ្យដឹងថា ពួកគេមិនជំទាស់នឹងគម្រោងអភិវឌ្ឍន៍ផ្លូវដែក នៅរាជធានីភ្នំពេញនោះទេ ប៉ុន្តែពួកគាត់ចង់បានសំណងសមរម្យ ដូចពលរដ្ឋដែលរងផលប៉ះពាល់ដូចគ្នា ពីព្រោះអ្នកដែលរងផលប៉ះពាល់នៅផ្លូវដែកនោះដូចគ្នា បែរជាអ្នកខ្លះទទួលបានដីនៅក្បែរ «វត្តទួលអស់លោក» ឬដីក្នុងខណ្ឌទួលគោក ដែលស្ថិតនៅក្បែរទីប្រជុំជន ខណៈពួកគេបែរជាអាជ្ញាធរផ្តល់ឱ្យទៅតំបន់អភិវឌ្ឍន៍របស់ក្រុមហ៊ុន 7NG ទៅវិញ។
ករណីនេះ អ្នកស្រីថា បើអាជ្ញាធរនៅតែមិនផ្តល់ដីនៅក្បែរ «វត្តទួលអស់លោក» ឬដីក្នុងខណ្ឌទួលគោកទេ នោះពួកគេនៅតែបន្តតវ៉ារហូតទទួលបានដំណោះស្រាយសមរម្យ។
អ្នកស្រីនិយាយដូច្នេះថា៖ «ពួកខ្ញុំប៉ះពាល់ផ្លូវដែកដូចគ្នា ឱ្យពួកខ្ញុំទៅនៅខាងគោកខ្សាច់ ខាងក្រុមហ៊ុន 7NG! អ៊ីចឹងវាខុសគ្នាឆ្ងាយមែនទែន ខ្ញុំអត់ទទួលយកទេ។ បើខ្ញុំសុំថាចង់បាននៅក្នុងខណ្ឌឫស្សីកែវ និងខណ្ឌទួលគោក។ បើអត់បាននៅក្នុងខណ្ឌហ្នឹង ខ្ញុំសុំឱ្យដូចខណ្ឌដែលគេចែកឱ្យអ្នកមុនមកក៏បានដែរ។ បើគេ[អាជ្ញាធរ]មិនព្រម យើងនឹងដាក់ញត្តិម្តងទៀត និងតវ៉ារហូតមានដំណោះស្រាយមួយសមរម្យដែលខ្ញុំទទួលយកបាន»។
វីអូឌី មិនអាចសុំការបញ្ជាក់ករណីនេះពីអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានទេ នៅថ្ងៃនេះ ។
អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត សង្កេតឃើញថា អាជ្ញាធរពាក់ព័ន្ធដែលដោះស្រាយបញ្ហាដីធ្លីជូនពលរដ្ឋដែលរងផលប៉ះពាល់ពីគម្រោងអភិវឌ្ឍន៍ផ្លូវដែកនេះ នៅមិនទាន់មានតម្លាភាពនៅឡើយ ដោយសារអ្នកខ្លះទទួលបានដីនៅក្នុងរាជធានីភ្នំពេញ និងខ្លះទៀតបែរជាអាជ្ញាធរបង្ខំឱ្យពួកគាត់ទៅយកនៅខេត្តកណ្តាលទៅវិញ។ ករណីនេះ លោកជំរុញទៅអាជ្ញាធរពាក់ព័ន្ធ ត្រូវធ្វើការដោះស្រាយដីធ្លីជូនពលរដ្ឋដែលរងផលប៉ះពាល់ ទទួលបានសំណងដូចគ្នា ឬប្រហាក់ប្រហែលគ្នា ដើម្បីកុំឱ្យមានការរិះគន់ពីមជ្ឈដ្ឋានជាតិ និងអន្តរជាតិ។
លោកមានប្រសាសន៍ថា៖ «យើងដឹងហើយថា កន្លងមក មានការដកការអនុគ្រោះពន្ធពីសហភាពអឺរ៉ុប ពីសហរដ្ឋអាមេរិក មកដល់ពេលបច្ចុប្បន្ននេះ ដោយសារតែគេចង់ជំរុញរដ្ឋយើងឱ្យធ្វើការដោះស្រាយជូនប្រជាពលរដ្ឋ រួមទាំងប្រជាពលរដ្ឋដែលរងប៉ះពាល់ដោយសារដីធ្លីឱ្យបានសមរម្យ ឱ្យគោរពសិទ្ធិមនុស្ស ស្តារឡើងវិញនូវលទ្ធិប្រជាធិបតេយ្យ គោរពសិទ្ធិមនុស្ស។ ប៉ុន្តែបើសិនជាយើងមិនបានអនុវត្ត ហើយនៅតែព្រងើយកន្តើយអនុសាសន៍របស់គេអ៊ីចឹង កិត្តិសព្ទរបស់រដ្ឋយើង នៅតែមានការវាយតម្លៃពីអន្តរជាតិ ថាប្រទេសយើងអន់ថយក្នុ្ងងការគោរពសិទ្ធិមនុស្ស និងលទ្ធិប្រជាធិបតេយ្យ»។
បើតាមការអះអាងរបស់តំណាងពលរដ្ឋ ពលរដ្ឋដែលរងផលប៉ះពាល់ពីគម្រោងផ្លូវដែកនេះមានប្រមាណ ៧០គ្រួសារ មកពីសហគមន៍ចំនួន៤ រួមមាន សហគមន៍អភិវឌ្ឍន៍ថ្មី សហគមន៍ភូមិ១៧ សហគមន៍ភូមិ២៣ ស្ថិតក្នុងខណ្ឌទួលគោក និងសហគមន៍ភូមិ២ ក្នុងខណ្ឌដូនពេញ។ ប៉ុន្តែរហូតមកដល់ពេលបច្ចុប្បន្ននេះ អាជ្ញាធរបានដោះស្រាយដីធ្លីជូនពលរដ្ឋដែលរងផលប៉ះពាល់ជាបណ្តើរខ្លះហើយ ខណៈនៅសេសសល់មួយចំនួនទៀតកំពុងបន្តតវ៉ាទាមទារដីធ្លីមកដល់បច្ចុប្បន្ន៕
