ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានថ្លែងប្រាប់វេទិកាសេដ្ឋកិច្ចពិភពលោក (World Economic Forum) នៅថ្ងៃពុធម្សិលមិញថា ការផ្គត់ផ្គង់រថក្រោះ និងប្រព័ន្ធការពារដែនអាកាសរបស់បណ្ដាប្រទេសលោកខាងលិច គួរតែធ្វើឡើងឱ្យបានឆាប់រហ័ស និងបញ្ជូនទៅកាន់ប្រទេសអ៊ុយក្រែន ឱ្យបានមុនពេលដែលរុស្ស៊ីអាចរៀបចំការវាយប្រហារថ្មីណាមួយបាន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៩ ខែមករា ឆ្នាំ២០២៣។
ថ្លែងតាមរយៈប្រព័ន្ធវីដេអូ ប្រធានាធិបតីអ៊ុយក្រែនរូបនេះ បន្តថា៖ «ការផ្គត់ផ្គង់ប្រព័ន្ធការពារដែនអាកាសដល់អ៊ុយក្រែន ត្រូវតែធ្វើឡើងឱ្យបានមុនការវាយប្រហារមីស៊ីលបន្ទាប់របស់រុស្ស៊ី ហើយការផ្គត់ផ្គង់រថក្រោះរបស់លោកខាងលិចទៀតសោត ក៏ត្រូវតែធ្វើឡើងឱ្យបានមុនការឈ្លានពានផ្សេងទៀតផងដែរ»។
លោកបន្ថែមថា៖ «ការប្រយុទ្ធគ្នានៅតំបន់ភាគខាងកើត គឺកើតមានឡើងជារៀងរាល់ថ្ងៃ។ យើងកំពុងតែខិតខំប្រឹងប្រឹងដើម្បីតទល់នឹងស្ថានការណ៍ទាំងនេះ»។
មុនពេលថ្លែងសុន្ទរកថារបស់ខ្លួន លោក វ៉ូឡូឌីមៀ ហ្សេលេនស្គី ក៏បានស្នើឱ្យអ្នកចូលរួមវេទិកាទាំងឡាយរក្សាភាពស្ងៀមស្ងាត់ក្នុងរយៈពេលមួយនាទី ដើម្បីចូលរួមរំលែកទុក្ខដល់រដ្ឋមន្ត្រីមហាផ្ទៃអ៊ុយក្រែន មន្ត្រីជាន់ខ្ពស់ និងពលរដ្ឋមួយចំនួនផ្សេងទៀត ដែលបានស្លាប់នៅថ្ងៃពុធម្សិលមិញ ក្នុងហេតុការណ៍ធ្លាក់ឧទ្ធម្ភាគចក្រមួយនៅតំបន់ជាយក្រុង ខាងក្រៅទីក្រុងកៀវ (Kyiv) ផងដែរ។
ការឈ្លានពានរបស់រុស្ស៊ីលើអ៊ុយក្រែន គិតរហូតមកដល់ពេលនេះ បានកើតឡើងអស់រយៈពេលជិត១១ខែមកហើយ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត និងតំបន់ទីក្រុងជាច្រើនប្រែក្លាយទៅជាគំនរបាក់បែក ខណៈលោក ហ្សេលេនស្គី ក៏ធ្លាប់បានចោទប្រទេសរុស្ស៊ីថាកំពុងតែព្យាយាមកម្ចាត់ប្រទេសរបស់លោកចេញពីពិភពលោកផងដែរ។
ទាក់ទិននឹងករណីនេះ បណ្ដាប្រទេសលោកខាងលិច ក៏បានខិតខំធ្វើសកម្មភាពជាច្រើនក្នុងការឆ្លើយតបជាអន្តរជាតិ ចំពោះការលុកលុយរបស់រុស្ស៊ីលើអ៊ុយក្រែន ដែលក្នុងនោះរួមមានការផ្តល់ជំនួយផ្នែកយោធា ការជំរុញឱ្យមានការដាក់ទណ្ឌកម្មធ្ងន់ធ្ងរបន្ថែមទៀតលើរុស្ស៊ី និងផ្តល់ការគាំទ្រផ្នែកហិរញ្ញវត្ថុផងដែរ៕
