ក្រសួងការបរទេសកូរ៉េខាងជើង បានលើកឡើងនៅថ្ងៃព្រហស្បតិ៍នេះថា សមយុទ្ធរបស់សហរដ្ឋអាមេរិក និងសម្ពន្ធមិត្តរបស់ខ្លួន បានរុញច្រានស្ថានការណ៍ឱ្យធ្លាក់ចូលទៅក្នុង «បន្ទាត់ក្រហមខ្លាំង» និងថាវានឹងប្រែក្លាយឧបទ្វីបនេះទៅជា «ឃ្លាំងអាវុធសង្គ្រាមដ៏ធំ និងជាតំបន់សង្គ្រាមកាន់តែធ្ងន់ធ្ងរឡើង»។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២ ខែកុម្ភៈ ឆ្នាំ២០២៣នេះ។
សេចក្តីថ្លែងការណ៍ដែលធ្វើឡើងដោយទីភ្នាក់ងារសារព័ត៌មានរដ្ឋ KCNA បានលើកឡើងថា ទីក្រុងព្យុងយ៉ាងមិនចាប់អារម្មណ៍នឹងការសន្ទនាទេ ដរាបណាទីក្រុងវ៉ាស៊ីនតោន បន្តគោលនយោបាយអរិភាព។
អ្នកនាំពាក្យក្រសួងការពារជាតិកូរ៉េខាងជើង បាននិយាយក្នុងលក្ខខណ្ឌមិនបញ្ចេញឈ្មោះនៅក្នុងសេចក្តីថ្លែងការណ៍មួយថា៖ «ស្ថានភាពយោធា និងនយោបាយនៅលើឧបទ្វីបកូរ៉េ និងក្នុងតំបន់បានឈានដល់បន្ទាត់ក្រហមខ្លាំង ដោយសារតែការធ្វើសមយុទ្ធប្រឈមមុខដាក់គ្នាដោយយោធា និងអំពើអរិភាពរបស់សហរដ្ឋអាមេរិក»។
សេចក្តីថ្លែងការណ៍នេះ បានលើកឡើងពីដំណើរទស្សនកិច្ចទៅកាន់ទីក្រុងសេអ៊ូល ក្នុងសប្តាហ៍នេះ ដោយរដ្ឋមន្ត្រីការពារជាតិអាមេរិកលោក ឡយដ៍ អូស្ទីន (Lloyd Austin)។ កាលពីថ្ងៃអង្គារ លោក Austin និងសមភាគីកូរ៉េខាងត្បូង បានប្តេជ្ញាពង្រីកសមយុទ្ធយោធា និងដាក់ពង្រាយ «អាវុធយុទ្ធសាស្ត្រ» បន្ថែមទៀត ដូចជា នាវាផ្ទុកយន្តហោះ និងយន្តហោះទម្លាក់គ្រាប់បែករយៈចម្ងាយឆ្ងាយ ដើម្បីទប់ទល់នឹងការអភិវឌ្ឍអាវុធរបស់កូរ៉េខាងជើង និងទប់ស្កាត់សង្គ្រាម។
សេចក្តីថ្លែងការណ៍របស់កូរ៉េខាងជើង បានបន្តថា៖ «នេះគឺជាទង្វើប្រកបដោយគ្រោះថ្នាក់របស់សហរដ្ឋអាមេរិក ដែលនឹងប្រែក្លាយឧបទ្វីបកូរ៉េទៅជាឃ្លាំងអាវុធសង្រ្គាមដ៏ធំ និងជាតំបន់សង្រ្គាមកាន់តែធ្ងន់ធ្ងរឡើង»។
សេចក្តីថ្លែងការណ៍បន្ថែមថា កូរ៉េខាងជើង នឹងឆ្លើយតបទៅនឹងចលនាយោធាណាមួយដោយសហរដ្ឋអាមេរិក និងមានយុទ្ធសាស្ត្រខ្លាំងដើម្បីទប់ទល់ រួមទាំង «កម្លាំងនុយក្លេអ៊ែរដ៏លើសលប់បំផុត» ប្រសិនបើចាំបាច់។
នៅទីក្រុងញូវយ៉ក រដ្ឋមន្ត្រីការបរទេសកូរ៉េខាងត្បូង លោក ផាក ជីន (Park Jin) បានជួបជាមួយអគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតឺរ៉េស (Antonio Guterres) កាលពីថ្ងៃពុធ ហើយបានអំពាវនាវឱ្យអង្គការសហប្រជាជាតិ បន្តយកចិត្តទុកដាក់ចំពោះការបង្កហេតុ និងទង្វើនាពេលថ្មីៗនេះរបស់កូរ៉េខាងជើង ដើម្បីអនុវត្តទណ្ឌកម្មលើរបបមួយនេះ។
លោក Guterres បាននិយាយថា ការសាកល្បងនុយក្លេអ៊ែរបន្ថែមរបស់កូរ៉េខាងជើង នឹងបំផ្លាញដល់សន្តិសុខក្នុងតំបន់ និងអន្តរជាតិ ហើយបានអះអាងជាថ្មីនូវការគាំទ្រក្នុងការកសាងសន្តិភាពយូរអង្វែងនៅលើឧបទ្វីបកូរ៉េ។ នេះបើយោងតាមការិយាល័យរបស់លោក Park ។
លោក Park កំពុងបំពេញទស្សនកិច្ចទៅកាន់សហរដ្ឋអាមេរិក រយៈពេល៤ថ្ងៃ ដែលលោកក៏នឹងមានឱកាសជួបជាមួយរដ្ឋមន្ត្រីការបរទេសសហរដ្ឋអាមេរិកលោក អែនតូនី ប្លីងខិន (Antony Blinken) នៅក្នុងទីក្រុងវ៉ាស៊ីនតុន (Washington) នៅថ្ងៃសុក្រ។
កាលពីថ្ងៃពុធ សហរដ្ឋអាមេរិក និងកូរ៉េខាងត្បូង បានធ្វើសមយុទ្ធដែនអាកាសរួមគ្នាដោយប្រើយន្តហោះទម្លាក់គ្រាប់បែកធុនធ្ងន់ B-1B របស់អាមេរិក និងយន្តហោះចម្បាំងបំបាំងកាយ F-22 ក៏ដូចជាយន្តហោះចម្បាំង F-35 របស់ប្រទេសទាំង២។ នេះបើយោងតាមក្រសួងការពារជាតិកូរ៉េខាងត្បូង។
កាលពីឆ្នាំមុន កូរ៉េខាងជើង បានសាកល្បងមីស៊ីលបាលីស្ទីក (ballistic) ដែលត្រូវបានហាមប្រាមដោយសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ កូរ៉េខាងជើង ក៏ត្រូវបានសង្កេតឃើញផងដែរថា បានបើកទីតាំងសាកល្បងអាវុធនុយក្លេអ៊ែររបស់ខ្លួនឡើងវិញដែលត្រូវបានបិទ ដោយរំពឹងថានឹងសាកល្បងអាវុធក្លេអ៊ែរជាលើកដំបូងចាប់តាំងពីឆ្នាំ២០១៧ ។
គួរបញ្ជាក់ថា ទាហានអាមេរិកជាង ២៨ ៥០០នាក់ មានមូលដ្ឋាននៅប្រទេសកូរ៉េខាងត្បូងក្រោយសង្គ្រាមកូរ៉េឆ្នាំ១៩៥០-១៩៥៣៕
