ក្រុមប្រឹក្សាជាតិកម្ពុជាដើម្បីកុមារ ថ្កោលទោសចំពោះករណីស្ត្រីម្នាក់បានប្រើអំពើហិង្សាយ៉ាងឃោរឃៅ និងអមនុស្សធម៌ ទៅលើកុមារីបម្រើតាមផ្ទះដែលមានអាយុទើប៥ឆ្នាំ ដោយស្ថាប័នមួយនេះ ចាត់ទុកទង្វើនេះថាជាការរំលោភបំពានយ៉ាងធ្ងន់ធ្ងរទៅលើសិទ្ធិកុមារ។
សេចក្តីថ្លែងការណ៍របស់ក្រុមប្រឹក្សាកម្ពុជាដើម្បីកុមារ ចុះថ្ងៃទី២៤ ខែឧសភា ឆ្នាំ២០២២នេះ បានលើកឡើងថា ស្ថាប័ននេះមិនអាចទទួលយកបានដាច់ខាតចំពោះការប្រព្រឹត្តអំពើហិង្សាដោយចេតនា យ៉ាងឃោរឃៅ ព្រៃផ្សៃ អមនុស្សធម៌ ដែលបង្កឡើងដោយស្ត្រីម្នាក់ឈ្មោះ ចាន់ ធីតា អាយុ៣៧ឆ្នាំ (មុខរបរលក់កាហ្វេ) ស្នាក់នៅសង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ ទៅលើកុមារីឈ្មោះ កេង ស្រីកា អាយុ៥ឆ្នាំ ជាកុមារបម្រើតាមផ្ទះ (មើលក្មេងអាយុ២ឆ្នាំ) កាលពីយប់ថ្ងៃទី២៣ ខែឧសភា ឆ្នាំ២០២២។
សេចក្តីថ្លែងការណ៍បន្តថា៖ «គណៈកម្មការការពារកុមារថ្នាក់ជាតិ នៃក្រុមប្រឹក្សាជាតិកម្ពុជាដើម្បីកុមារ ក៏ដូចជាសាធារណជនទូទៅ ពិតជាមានក្តីរន្ធត់ តក់ស្លុតឥតឧបមា និងមានការអាណិតអាសូរក្រៃលែងចំពោះកុមារីដ៏កំសត់នេះ ដែលទទួលរងគ្រោះដោយអំពើហិង្សាយ៉ាងព្រៃផ្សៃ អមនុស្សធម៌ ហើយយល់ឃើញថា អំពើនេះបានរំលោភបំពានយ៉ាងធ្ងន់ធ្ងរទៅលើសិទ្ធិកុមារ ពិសេសសិទ្ធិទទួលបាននូវកិច្ចការពារដែលប្រទេសកម្ពុជាបានផ្តល់សច្ចាប័ន និងមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា»។
បើតាមក្រុមប្រឹក្សាជាតិកម្ពុជាដើម្បីកុមារ ពាក់ព័ន្ធនឹងករណីហិង្សានេះ សមត្ថកិច្ចខណ្ឌទួលគោកបានធ្វើការឃាត់ខ្លួនជនសង្ស័យរួចហើយ ដើម្បីបន្តនីតិវិធីតាមផ្លូវច្បាប់។
តែយ៉ាងណា ក្រុមប្រឹក្សាជាតិកម្ពុជាដើម្បីកុមារ នៅតែអំពាវនាវនិងទទូចដល់សមត្ថកិច្ច អាជ្ញាធរពាក់ព័ន្ធ ជាពិសេសស្ថាប័នតុលាការ ចាត់វិធានការតាមនីតិវិធីច្បាប់ ដោយដាក់ទោសយ៉ាងតឹងរ៉ឹងចំពោះជនសង្ស័យ ដើម្បីកុំឱ្យអំពើដ៏អាក្រក់នេះកើតមានក្នុងសង្គមជាតិបន្តទៀត។
អធិការដ្ឋាននគរបាលខណ្ឌទួលគោក បានលើកឡើងក្នុងបណ្តាញសង្គមហ្វេសប៊ុករបស់ខ្លួននៅថ្ងៃនេះថា កាលពីយប់ថ្ងៃម្សិលមិញ សមត្ថកិច្ចបានឃាត់ខ្លួនជនសង្ស័យជាស្ត្រីដែលប្រើប្រាស់ហិង្សាទៅលើកុមារីអាយុ៥ឆ្នាំនោះហើយ ពីបទ «ទារុណកម្ម និងអំពើឃោរឃៅ» (ប្រើដៃវាយលើផ្ទៃមុខ និងប្រើដែកទំពួកសម្រាប់ព្យួរខោអាវ វាយទៅលើក្មេងស្រីរងគ្រោះ បណ្ដាលឱ្យរបួសធ្ងន់ធ្ងរ)។
អធិការដ្ឋាននគរបាលខណ្ឌ បន្តថា បច្ចុប្បន្ន សមត្ថកិច្ចបានប្រគល់ក្មេងស្រីរងគ្រោះ ជូនមន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានីភ្នំពេញ ហើយមន្ទីរសង្គមកិច្ច ក៏បានបញ្ជូនក្មេងស្រីរងគ្រោះទៅព្យាបាលនៅមន្ទីរពេទ្យបង្អែករាជធានីភ្នំពេញ ក្រោមការថែទាំជាបណ្ដោះអាសន្នរបស់អង្គការមិត្តសំឡាញ់។
ចំណែកឯជនសង្ស័យ ត្រូវបានបញ្ជូនទៅកាន់អធិការដ្ឋាននគរបាលខណ្ឌទួលគោក ដើម្បីធ្វើការសាកសួរ និងចាត់ការបន្តតាមនីតិវិធីច្បាប់៕
