អង្គការសុខភាពពិភពលោក (WHO) បាននិយាយនៅថ្ងៃពុធម្សិលមិញថា ករណីកុមារស្លាប់រាប់សិបនាក់ នៅក្នុងប្រទេសហ្គាំប៊ី (Gambia) ដោយបញ្ហាតម្រងនោមធ្ងន់ធ្ងរ អាចពាក់ព័ន្ធនឹងស៊ីរ៉ូបំបាត់ក្អក និងផ្តាសាយ ដែលផលិតដោយក្រុមហ៊ុនផលិតឱសថនៅប្រទេសឥណ្ឌា។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៦ ខែតុលា ឆ្នាំ២០២២ នេះ។
ការប្រកាសដោយអគ្គនាយកអង្គការសុខភាពពិភពលោក Tedros Adhanom Ghebreyesus ធ្វើឡើងបន្ទាប់ការធ្វើតេស្តលើឱសថជាច្រើនជាប្រភេទស៊ីរ៉ូ ដែលត្រូវបានសង្ស័យថា បានបណ្តាលឱ្យកុមារចំនួន ៦៦នាក់ស្លាប់ នៅក្នុងប្រទេសហ្គាំប៊ី (Gambia) ដែលស្ថិតនៅអាហ្វ្រិកខាងលិច។
លោក Tedros បានប្រាប់អ្នករាយការណ៍ព័ត៌មានថា ទីភ្នាក់ងារអង្គការសហប្រជាជាតិកំពុងធ្វើការស៊ើបអង្កេតជាមួយនិយតករក្នុងប្រទេសឥណ្ឌា និងក្រុមហ៊ុនដែលផលិតឱសថជាប្រភេទស៊ីរ៉ូគឺក្រុមហ៊ុន Maiden Pharmaceuticals Ltd ដែលមានទីតាំងស្ថិតនៅទីក្រុងញូវដេលី ប្រទេសឥណ្ឌ។
ក្រុមហ៊ុន Maiden Pharmaceuticals Ltd បានបដិសេធធ្វើអត្ថាធិប្បាយ។ ក្រសួងសុខាភិបាលឥណ្ឌាក៏មិនបានឆ្លើយតបនឹងសំណើសុំការអត្ថាធិប្បាយដែរ។
នៅថ្ងៃពុធម្សិលមិញ អង្គការសុខភាពពិភពលោក បានចេញសេចក្តីជូនដំណឹងអំពីផលិតផលវេជ្ជសាស្រ្ដ ដោយស្នើឱ្យនិយតករដកឱសថដែលផលិតដោយក្រុមហ៊ុន Maiden Pharmaceuticals Ltd ចេញពីទីផ្សារ។
អង្គការសុខភាពពិភពលោក បានជូនដំណឹងថា ឱសថនោះ អាចត្រូវបានចែកចាយទៅកន្លែងផ្សេងទៀតតាមរយៈទីផ្សារក្រៅផ្លូវការ ប៉ុន្តែរហូតមកដល់ពេលនេះ ត្រូវបានរកឃើញតែនៅក្នុងប្រទេសហ្គាំប៊ី (Gambia) ប៉ុណ្ណោះ។
ការជូនដំណឹងនេះ សំដៅលើឱសថចំនួន៤ប្រភេទ រួមមាន Promethazine Oral Solution, Kofexmalin Baby Cough Syrup, Makoff Baby Cough Syrup និង Magrip N Cold Syrup។
អង្គការសុខភាពពិភពលោក បាននិយាយថា ការវិភាគពីមន្ទីរពិសោធន៍បានបញ្ជាក់ពីបរិមាណ diethylene glycol និង ethylene glycol លើសកម្រិតដែលអាចពុល និងបំផ្លាញតម្រងនោមធ្ងន់ធ្ងរ។
មន្ត្រីសុខាភិបាលក្នុងប្រទេស Gambia បានចេញសេចក្តីជូនដំណឹងកាលពីខែកក្កដា បន្ទាប់ពីកុមាររាប់សិបនាក់ ចាប់ផ្ដើមធ្លាក់ខ្លួនឈឺដោយមានបញ្ហាតម្រងនោម។ កុមារដែលមានអាយុតិចជាង៥ឆ្នាំ បានធ្លាក់ខ្លួនឈឺក្នុងរយៈពេល ៣ ទៅ ៥ថ្ងៃ បន្ទាប់ពីបានលេបថ្នាំប៉ារ៉ាសេតាមុលជាប្រភេទស៊ីរ៉ូដែលលក់នៅក្នុងតំបន់។
លោកមូស្តាផា ប៊ីតាយ៉េ (Mustapha Bittaye) នាយកសេវាសុខភាពរបស់ប្រទេសហ្គាំប៊ី បាននិយាយថា បញ្ហាស្រដៀងគ្នានេះ ត្រូវបានរកឃើញនៅក្នុងឱសថប្រភេទស៊ីរ៉ូផ្សេងទៀត ប៉ុន្តែក្រសួងកំពុងរង់ចាំការបញ្ជាក់ពីលទ្ធផល។
លោកបាននិយាយថា ចំនួនអ្នកស្លាប់បានថយចុះក្នុងប៉ុន្មានសប្តាហ៍ថ្មីៗនេះ ហើយការលក់ឱសថដែលផលិតដោយក្រុមហ៊ុន Maiden Pharmaceuticals Ltd ត្រូវបានហាមឃាត់។ លោកបន្តថា ទោះជាយ៉ាងណា រហូតមកដល់ពេលនេះ ឱសថប្រភេទជាស៊ីរ៉ូមួយចំនួន នៅតែមានលក់នៅគ្លីនិកឯកជន និងក្នុងមន្ទីរពេទ្យ។
ទីភ្នាក់ងារត្រួតពិនិត្យឱសថរបស់ប្រទេស Gambia បានផ្ញើលិខិតមួយកាលពីថ្ងៃទី៤ ខែតុលា ឆ្នាំ២០២២ ទៅកាន់អ្នកជំនាញសុខភាព ដែលបញ្ជាឱ្យពួកគេបញ្ឈប់ការលក់ឱសថទាំងឡាយណាដែលអង្គការសុខភាពពិភពលោកបានកំណត់។
គួរបញ្ជាក់ថា ក្រុមហ៊ុន Maiden Pharmaceuticals Ltd ផលិតឱសថ និងលក់នៅក្នុងប្រទេសឥណ្ឌា ក៏ដូចជានាំចេញទៅបណ្តាប្រទេសនៅអាស៊ី អាហ្វ្រិក និងអាមេរិកឡាទីន។ នេះបើយោងតាមគេហទំព័ររបស់ក្រុមហ៊ុន៕
