ប្រទេសកម្ពុជាមានប្រជាជនវ័យក្មេងច្រើន បើធៀបបណ្ដាប្រទេសក្នុងតំបន់អាស៊ីអាគ្នេយ៍ ហើយភាគច្រើននៃប្រជាជនវ័យក្មេងទាំងនេះសុទ្ធតែប្រើប្រាស់ប្រព័ន្ធអ៊ីនធឺណិត ខណៈការទំនាក់ទំនងគ្នាតាមរយៈទូរសព្ទស្មាតហ្វូនកំពុងតែពេញនិយមបំផុត ដែលក្នុងនោះបណ្ដាញសង្គមហ្វេសប៊ុកជាជម្រើសដ៏សំខាន់ជាងគេ។
យោងតាមព្រឹត្តិបត្ររបស់អង្គការយូនីសេហ្វ (UNICEF) ដែលចេញផ្សាយក្នុងពេលកន្លងទៅ នៅលើគេហទំព័ររបស់ខ្លួន ឱ្យដឹងថា ប្រជាពលរដ្ឋមួយភាគបីនៃពលរដ្ឋកម្ពុជាដែលមានអាយុក្រោម១៥ឆ្នាំ គឺជាប្រទេសមួយដែលមានប្រជាជនក្មេងជាងគេនៅតំបន់អាស៊ីអាគ្នេយ៍។
ពាក់ព័ន្ធនឹងការប្រើប្រាស់ប្រព័ន្ធឌីជីថលនៅកម្ពុជាបច្ចុប្បន្ន និសិត្សឆ្នាំទី៣ ផ្នែកទំនាក់ទំនងអន្តរជាតិ យុវជន ស៊ឹម ចាន់សំណាង បានលើកឡើងថា យុវជនកម្ពុជាដែលប្រើប្រាស់ប្រព័ន្ធឌីជីថលមានប្រមាណ ២ភាគ៣ នៃប្រជាជនសរុបក្នុងប្រទេស ប៉ុន្តែមើលទៅអ្នកប្រើប្រាស់ទាំងនោះហាក់ដូចជាមិនសូវចេះប្រើឱ្យមានសុវតិ្ថភាពនោះទេ។
លោកនិយាយថា៖ «ជាក់ស្ដែង ខ្ញុំសង្កេតឃើញមានករណីជាច្រើនលើការលួចទិន្នន័យផ្សេងៗតាមរយៈបណ្ដាញសង្គម មូលហេតុទាំងអស់នេះគឺមកពីកង្វះចំណេះដឹងអំពីអក្ខរកម្មប្រព័ន្ធផ្សព្វផ្សាយ។ ដូច្នេះពេលខ្លះគាត់ចេះប្រើប្រាស់វា តែមិនដឹងធ្វើយ៉ាងម៉េចឱ្យមានសុវតិ្ថភាពអ៊ីចឹងទៅ»។
មួយវិញទៀត និសិ្សតរូបនេះបន្ថែមថា នៅលើប្រព័ន្ធឌីជីថលមានជនអនាមិកជាច្រើន ដែលពួកគេព្យាយាមរិះរកវិធីផ្សេងៗដើម្បីធ្វើយ៉ាងណាអាចចូលលួចទិន្នន័យក្នុងគណនីបណ្តាញសង្គម តាមរយៈការផ្ញើតំណភ្ជាប់ (Link) ឬបន្លំគណនី ជាដើម។ ដូច្នេះ ជម្រើសដែលអាចជួយឱ្យគេចផុតពីបញ្ហាទាំងអស់នេះ គឺយល់ដឹងពីអក្ខរកម្មផ្សព្វផ្សាយ ដើម្បីទទួលបានការចេះគិតស៊ីជម្រៅមុននឹងជឿទៅលើអ្វីមួយ។
លោកបន្តថា៖ «ព័ត៌មានជាច្រើនបានបន្តចែកចាយលើប្រព័ន្ធឌីជីថល ប៉ុន្តែព័ត៌មានសព្វថ្ងៃហ្នឹងសម្បូរព័ត៌មានមិនពិតច្រើនពេក។ អ៊ីចឹងយុវជនអាចនឹងងាយប្រឈមពីបញ្ហាទាំងអស់នោះ ទាំងដែលពេលខ្លះគាត់ចែកចាយបន្តទៅអ្នកដទៃ ហ្នឹងវារឹតតែបង្កផលប៉ះពាល់ថែមទៀតហើយ»។
មុខវិជ្ជា «អក្ខរកម្មប្រព័ន្ធផ្សព្វផ្សាយ» ត្រូវបានដាក់បញ្ចូលជាផ្នែកមួយនៃកម្មវិធីសិក្សាបច្ចេកវិទ្យាព័ត៌មាន និងសារទូរគមនាគមន៍(ICT) សម្រាប់ថ្នាក់ទី១២ ចាប់តាំងពីឆ្នាំសិក្សា (២០១៦-២០១៧) រហូតដល់បច្ចុប្បន្ន ដោយមានការសហការជាមួយអង្គការ DW Akademie ដើម្បីបង្រៀនសិស្សអំពីប្រព័ន្ធទំនាក់ទំនងសង្គម។
ថ្លែងក្នុងកម្មវិធីសន្និសីទថ្នាក់ជាតិ ស្តីពី ការអភិវឌ្ឍប្រព័ន្ធផ្សព្វផ្សាយ នាថ្ងៃទី២៧ ខែតុលា ឆ្នាំ២០២២ នៅសណ្ឋាគារសុខាភ្នំពេញ អនុប្រធាននាយកដ្ឋានបច្ចេកវិទ្យាព័ត៌មាន នៃក្រសួងអប់រំ យុវជន និងកីឡា លោកស្រី សេង ស៊ីណែត ឱ្យដឹងថា បច្ចុប្បន្ននេះ ក្រៅពីអភិវឌ្ឍន៍សៀវភៅសិក្សាគោល ICT ថ្នាក់ទី១២ ឆ្នាំ២០២២នេះ គឺក្រសួងបានបង្កើតជាសៀវភៅអក្ខរកម្មឌីជីថលសម្រាប់បណ្តុះបណ្ដាលដល់គ្រឹះស្ថានបណ្ដុះបណ្ដាលគ្រូ នៅវិទ្យាស្ថានគរុកោសល្យ។
លោកស្រីថ្លែងថា៖ «យើងចាប់ផ្ដើមពីប្អូនៗសិស្សានុសិស្ស ដើម្បីឱ្យគាត់បានមូលដ្ឋានគ្រឹះស្វែងយល់ពី MIL។ ប៉ុន្តែជាជំហានបន្ទាប់ គឺធ្វើទៅលើការអប់រំគ្រូវិញម្តង»។
លោកស្រី សេង ស៊ីណែត បានបញ្ជាក់ថា គ្រូគ្រប់មុខវិជ្ជាទាំងអស់មានតួនាទីសំខាន់ក្នុងវិស័យអប់រំ ដូច្នេះបំណិនអក្ខរកម្មប្រព័ន្ធផ្សព្វផ្សាយមិនមែនសម្រាប់តែគ្រូ IT ទេដែលត្រូវរៀន ពោលគឺសម្រាប់គ្រូគ្រប់មុខវិជ្ជាតែម្ដង។
ដ្បិតប្រព័ន្ធបច្ចេកវិទ្យាក្នុងការទំនាក់ទំនងនៅកម្ពុជាមានការអភិវឌ្ឍឆាប់រហ័សក្ដី នៅមានរឿងជាច្រើនដែលត្រូវការឈ្វេងយល់អំពីភាពស្មុគស្មាញ និងផលប៉ះពាល់របស់វា។ ដូច្នេះមុខវិជ្ជា «អក្ខរកម្មប្រព័ន្ធផ្សព្វផ្សាយ» បានជួយដល់យុវជនកម្ពុជាអាចសិក្សាពីរបៀបប្រើប្រាស់មេឌៀ (Media) គ្រប់ទម្រង់ ដូចជា វិទ្យុ ទូរទស្សន៍ ការព្រីនឯកសារ ប្រព័ន្ធអ៊ីនធឺណិត និងបច្ចេកវិទ្យាទំនាក់ទំនងឌីជីថលថ្មីៗ ជាដើម។
អ្នកសម្របសម្រួលគម្រោងរបស់អង្គការ DW Akademie លោក សរ ចាន់ដារ៉ា បានលើកឡើងថា ប្រព័ន្ធផ្សព្វផ្សាយពិតជាមានសារៈសំខាន់សម្រាប់មនុស្សទូទៅ ហើយក្នុងនាមលោកជាអ្នកបណ្ដុះបណ្ដាលផ្នែកប្រព័ន្ធផ្សព្វផ្សាយ និងព័ត៌មានមួយរូប លោកចង់ឃើញអ្នកប្រើប្រាស់ប្រព័ន្ធឌីជីថលយល់ឱ្យបានស៊ីជម្រៅ និងមានសមត្ថភាពក្នុងការត្រិះរិះពិចារណាលើចរិតលក្ខណៈរបស់ប្រព័ន្ធផ្សព្វផ្សាយ។
លោកនិយាយថា៖ «យើងឃើញហើយ អ្នកប្រើប្រាស់សព្វថ្ងៃ គាត់ប្រើប្រាស់អត់ទទួលខុសត្រូវទេ។ ផ្សព្វផ្សាយអីមួយ គាត់អត់ដឹងថាប៉ះពាល់ដល់អីខ្លះ ប៉ះពាល់ដល់នរណាខ្លះទេ ហើយជួនកាលវាមានបញ្ហាច្រើន»។
អ្នកសម្របសម្រួលរបស់ DW Akademie រូបនេះថា គោលបំណងរួមនៃកិច្ចសហការជាមួយក្រសួងអប់រំ គឺចង់ឱ្យប្រើប្រាស់ប្រកបដោយសុវត្ថិភាព ហើយមានការទទួលខុសត្រូវខ្ពស់។ លោកថា គោលដៅបន្ទាប់នឹងមានការបញ្ជ្រាបមុខវិជ្ជានេះទៅកាន់ថ្នាក់ទី១១ ទី១០ និងទី៩ ជាបន្តបន្ទាប់នាពេលអនាគតផងដែរ។
ថ្លែងក្នុងជំនួបពិភាក្សាការងារជាមួយលោក ស ខេង រដ្ឋមន្រ្តីក្រសួងមហាផ្ទៃ នាថ្ងៃទី២៥ ខែតុលា ឆ្នាំ២០២២ នៅវិមានរដ្ឋសភា តំណាងអង្គការយូណេស្កូ (UNESCO) ប្រចាំនៅកម្ពុជា លោក សាដា អូម៉ា អាឡាម (Sardar Umar Alam) បានលើកឡើងថា បណ្ដាញសង្គមបច្ចុប្បន្ន បានផ្លាស់ប្ដូររបៀបទទួលព័ត៌មានរបស់សាធារណជន ហើយក៏បង្កើតជាបញ្ហាស្មុគស្មាញដល់អ្នកប្រើប្រាស់ និងរដ្ឋាភិបាលដែរ ដូចជា បទល្មើសបច្ចេកវិទ្យា ជាដើម។ មិនតែប៉ុណ្ណោះ បណ្ដាញសង្គមក៏បានបង្កើតឱកាសឱ្យជនខិលខូចបង្កើតជាបទល្មើសផ្សេងៗ ដូចជា ការឆបោក និងការលួចលុយតាមប្រព័ន្ធអនឡាញ។
ទន្ទឹមនឹងនោះ លោក ស ខេង ក៏បានអះអាងថា សព្វថ្ងៃ រដ្ឋាភិបាលកំពុងរៀបចំសេចក្ដីព្រាងច្បាប់បទល្មើសបច្ចេកវិទ្យា និងកំពុងស្ថិតក្នុងការពិភាក្សាជាមួយភាគីពាក់ព័ន្ធ ហើយក៏មានការចូលរួមពីមន្រ្តីជំនាញអាមេរិកដែរ។ យ៉ាងនេះក្តី សេចក្ដីព្រាងច្បាប់នេះនៅមិនទាន់មានលក្ខណៈពេញលេញនៅឡើយទេ ហើយទាមទារឱ្យមានការសិក្សាបន្ថែម។
អង្គការលីកាដូ កាលពីថ្ងៃទី១ ខែសីហា បានចេញរបាយការណ៍មួយស្តីពី «ត្រូវក្លាហាននិយាយពីប្រាក់កម្ចីអនឡាញ និងការជំរិតទារប្រាក់ខុសច្បាប់» ខណៈបណ្ដាញកម្ចីប្រាក់អនឡាញ កំពុងក្លាយជាគោលដៅលើស្រ្តីខ្មែរនៅលើបណ្ដាញសង្គម ដោយទាញអ្នកទាំងនោះឱ្យធ្លាក់ក្នុងបំណុលវ័ណ្ឌក និងការជំរិតទារប្រាក់ តាមរយៈការប្រើប្រាស់រូបភាព និងវីដេអូអាក្រាតរបស់ជនរងគ្រោះ៕
