សហរដ្ឋអាមេរិក នៅថ្ងៃព្រហស្បតិ៍ម្សិលមិញនេះ បានដាក់ទណ្ឌកម្មបន្ថែមលើក្រុមទាហានស៊ីឈ្នួលរុស្ស៊ីឈ្មោះ Wagner Group ដែលកំពុងប្រយុទ្ធនៅអ៊ុយក្រែន ដោយកំណត់ថាជាអង្គការឧក្រិដ្ឋកម្មឆ្លងដែន ដែលទទួលខុសត្រូវចំពោះការរំលោភសិទ្ធិមនុស្សធ្ងន់ធ្ងរ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៧ ខែមករា ឆ្នាំ២០២៣ នេះ។
Wagner Group បានប្រយុទ្ធដើម្បីដណ្តើមយកទីក្រុងបាមុត (Bakhmut) និងសូលីដា (Soledar) ក្នុងតំបន់ដូណេតស៍ (Donetsk) ភាគខាងកើតនៃប្រទេសអ៊ុយក្រែន ដែលមន្ត្រីលោកខាងលិច និងអ៊ុយក្រែន បាននិយាយថា រុស្ស៊ីកំពុងប្រើប្រាស់អ្នកទោសជាទាហានស៊ីឈ្នួល។
ទាក់ទិននឹងករណីនេះ ក្រសួងរតនាគារសហរដ្ឋអាមេរិក បាននិយាយថា ខ្លួនបានកំណត់ក្រុម Wagner Group ថាជា «អង្គការឧក្រិដ្ឋកម្មឆ្លងដែន»។
ក្រសួងនេះបានលើកឡើងនៅក្នុងសេចក្តីថ្លែងការណ៍មួយថា៖ «បុគ្គលិករបស់ Wagner Group បានចូលរួមសកម្មភាពឧក្រិដ្ឋកម្មធ្ងន់ធ្ងរ រួមទាំងការសម្លាប់រង្គាល ការរំលោភសេពសន្ថវៈ ការចាប់ពង្រាត់កុមារ និងការរំលោភបំពានលើរាងកាយនៅក្នុងសាធារណរដ្ឋអាហ្វ្រិកកណ្តាល [CAR] និងប្រទេសម៉ាលី»។
ពាក់ព័ន្ធនឹងករណីនេះ ស្ថានទូតរុស្ស៊ីប្រចាំនៅទីក្រុងវ៉ាស៊ីនតោន មិនបានឆ្លើយតបចំពោះសំណើសុំការអត្ថាធិប្បាយឡើយ។
ទីក្រុងវ៉ាស៊ីនតោន ក៏បានដាក់ទណ្ឌកម្មលើអង្គភាពផ្សេងទៀត ដែលខ្លួនបានចោទប្រកាន់ថាបានផ្គត់ផ្គង់ដល់ប្រតិបត្តិការយោធារបស់ Wagner Group រួមមាន ក្រុមហ៊ុនបច្ចេកវិទ្យាដែលមានមូលដ្ឋាននៅរុស្ស៊ីឈ្មោះ Joint Stock Company Terra Tech (Terra Tech) រួមទាំងឧស្សាហកម្មការពារជាតិរបស់រុស្ស៊ីផងដែរ។
រដ្ឋមន្ត្រីក្រសួងរតនាគារអាមេរិក លោកស្រី ចាណែត យ៉េឡែន (Janet Yellen) បាននិយាយនៅក្នុងសេចក្តីថ្លែងការណ៍ថា៖ «ទណ្ឌកម្មបន្ថែមលើ Wagner នៅថ្ងៃនេះ […] នឹងរារាំងបន្ថែមទៀតចំពោះសមត្ថភាពរបស់លោក ពូទីន ការពាក់អាវុធសម្រាប់ធ្វើសង្គ្រាម»។
អ្នកនាំពាក្យសន្តិសុខជាតិរបស់សេតវិមាន លោក ចន ឃឺប៊ី (John Kirby) កាលពីសប្តាហ៍មុន បាននិយាយថា លោក Putin បាននិងកំពុងងាកទៅរក Wagner Group កាន់តែខ្លាំងឡើងសម្រាប់ការគាំទ្រផ្នែកយោធា ដែលបណ្តាលឱ្យមានភាពតានតឹងមួយចំនួននៅក្នុងទីក្រុងម៉ូស្គូ។
ក្រៅពីនេះ ក្រសួងការបរទេសអាមេរិក ក៏បានដាក់ទណ្ឌកម្មលើអង្គភាព និងបុគ្គលដែលមានទំនាក់ទំនងជាមួយ Wagner Group និងមេដឹកនាំរបស់ក្រុមនេះឈ្មោះ យ៉េវហ្គេនី ព្រីហ្គោហ្ស៊ីន (Yevgeny Prigozhin)។
កាលពីខែមុន សេតវិមានបាននិយាយថា Wagner Group បានទទួលអាវុធពីកូរ៉េខាងជើង ដើម្បីជួយដល់កងកម្លាំងរុស្ស៊ីក្នុងប្រទេសអ៊ុយក្រែន ដែលជាសញ្ញានៃការពង្រីកតួនាទីរបស់ក្រុមនេះនៅក្នុងសង្គ្រាមអ៊ុយក្រែន។
ក្រសួងការបរទេសកូរ៉េខាងជើង បានហៅរបាយការណ៍នេះថាគ្មានមូលដ្ឋាន ខណៈមេដឹកនាំក្រុម Wagner Group លោក Yevgeny Prigozhin បានបដិសេធមិនទទួលអាវុធពីកូរ៉េខាងជើងឡើយ។
សហរដ្ឋអាមេរិក ប៉ាន់ប្រមាណថា Wagner Group មានបុគ្គលិកប្រហែល ៥០ ០០០នាក់ ត្រូវបានដាក់ពង្រាយនៅអ៊ុយក្រែន ក្នុងនោះមានអ្នកទោសចំនួន ៤០ ០០០នាក់ ដែលត្រូវបានជ្រើសរើសពីពន្ធនាគាររុស្ស៊ី។
ទណ្ឌកម្មរបស់សហរដ្ឋអាមេរិក កាលពីថ្ងៃព្រហស្បតិ៍ម្សិលមិញនេះ គឺជាទណ្ឌកម្មចុងក្រោយលើរុស្ស៊ី ជុំវិញការឈ្លានពានរបស់ខ្លួនលើអ៊ុយក្រែន ដែលបានធ្វើឱ្យមនុស្សរាប់ពាន់នាក់ស្លាប់ និងរបួស និងធ្វើឱ្យទីក្រុងនានាក្លាយទៅជាគំនរបាក់បែក៕