ធនាគារជាតិនៃកម្ពុជា និងសមត្ថកិច្ច ប្រកាសចាត់វិធានការច្បាប់ទៅលើអ្នកផ្ដល់កម្ចីខុសច្បាប់ដែលយកអត្រាការប្រាក់ខ្ពស់ និងការផ្សព្វផ្សាយនានាពាក់ព័ន្ធនឹងការផ្តល់សេវាហិរញ្ញវត្ថុដោយគ្មានច្បាប់អនុញ្ញាត។
សេចក្តីថ្លែងការណ៍រួមរវាងធនាគារជាតិនៃកម្ពុជា និងអគ្គស្នងការដ្ឋាននគរបាលជាតិ នៅថ្ងៃទី២៧ ខែមករា ឆ្នាំ២០២៣ និងត្រូវបានផ្សព្វផ្សាយនៅថ្ងៃទី២ ខែកុម្ភៈនេះ បានលើកឡើងថា នាពេលថ្មីៗនេះ មានសកម្មភាពផ្សព្វផ្សាយ និងផ្តល់សេវាហិរញ្ញវត្ថុក្រៅផ្លូវការ ជាពិសេសសេវាឥណទានតាមរយៈទូរសព្ទ បណ្ដាញសង្គម និងអនឡាញ យ៉ាងអនាធិបតេយ្យដោយគ្មានច្បាប់អនុញ្ញាតត្រឹមត្រូវពីធនាគារជាតិនៃកម្ពុជា ដែលបានធ្វើឱ្យសាធារណជនមានការភ័ន្តច្រឡំ។
សេចក្តីថ្លែងការណ៍ដដែលបន្តថា ករណីនេះក៏បានបង្កផលវិបាកជាច្រើនទៅលើសេដ្ឋកិច្ច និងសង្គម ដោយសារតែជនទាំងនោះបានយកអត្រាការប្រាក់ខ្ពស់ហួសហេតុ ការគំរាមកំហែងបំភិតបំភ័យ ការអនុវត្តកិច្ចសន្យាមិនសុចរិតដោយបង្កប់នូវការកេងចំណេញហួសហេតុពីអ្នកខ្ចីប្រាក់ ដែលបណ្តាលឱ្យប៉ះពាល់ដល់ជីវភាពរស់នៅរបស់ប្រជាពលរដ្ឋ និងធ្វើឱ្យធ្លាក់ក្នុងបំណុលច្រើនលើសលុប និងបាត់បង់ទំនុកចិត្តលើស្ថាប័នធនាគារនៅកម្ពុជាផងដែរ។
ករណីនេះ ធនាគារជាតិនៃកម្ពុជា និងអគ្គស្នងការដ្ឋាននគរបាលជាតិ ប្រកាសថានឹងចាត់វិធានការតឹងរ៉ឹងតាមផ្លូវច្បាប់ដល់ការផ្តល់ឥណទានខុសច្បាប់ និងការផ្សព្វផ្សាយនានាតាមគ្រប់រូបភាពពាក់ព័ន្ធនឹងការផ្តល់សេវាហិរញ្ញវត្ថុដោយគ្មានច្បាប់អនុញ្ញាត។
សេចក្តីថ្លែងការណ៍រួម បានលើកឡើងថា៖ «ធនាគារជាតិនៃកម្ពុជា និងអគ្គស្នងការដ្ឋាននគរបាលជាតិ សូមសំណូមពរដល់ប្រជាពលរដ្ឋ ត្រូវចៀសវាងដាច់ខាតចំពោះការខ្ចីប្រាក់ពីអ្នកផ្តល់សេវាហិរញ្ញវត្ថុក្រៅផ្លូវការ ដែលពុំមានការអនុញ្ញាតពីធនាគារជាតិនៃកម្ពុជា»។
ធនាគារជាតិនៃកម្ពុជា និងអគ្គស្នងការដ្ឋាននគរបាលជាតិ ក៏បានស្នើដល់ប្រជាពលរដ្ឋប្រើប្រាស់សេវាហិរញ្ញវត្ថុផ្លូវការដែលផ្ដល់ដោយគ្រឹះស្ថានធនាគារ និងហិរញ្ញវត្ថុដែលទទួលបានអាជ្ញាបណ្ណប្រកបអាជីវកម្មពីធនាគារជាតិនៃកម្ពុជាផងដែរ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានលើកឡើងថា កន្លងមក សមត្ថកិច្ចបានចាត់វិធានការតាមផ្លូវចាប់លើអ្នកផ្ដល់ប្រាក់កម្ចីខុសច្បាប់នោះ តែក្រោយពីមានការកើនឡើងពីសកម្មភាពផ្ដល់ប្រាក់កម្ចីខុសច្បាប់នេះ សមត្ថកិច្ចនឹងបន្តចាត់វិធានការបន្ថែមទៀត។
លោកថា៖ «មិនមែនទើបពេលនេះទេ មានយូរហើយ នេះគ្រាន់តែជាការចេញ[សេចក្តីថ្លែងការណ៍]រួមមួយ ដែលកន្លងមក ក៏មានវិធានការនៃការស្រាវជ្រាវដែរ គ្រប់អង្គភាពគឺគេធ្វើការងារហ្នឹងយូរហើយ»។
នាយកទទួលបន្ទុកកិច្ចការទូទៅ អង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា កន្លងទៅ សង្គមស៊ីវិលបានរកឃើញពីការផ្ដល់ប្រាក់កម្ចីខុសច្បាប់ ដូចអ្វីដែលធនាគារជាតិនៃកម្ពុជា និងអគ្គស្នងការដ្ឋាននគរបាលជាតិ បានលើកឡើង ហើយកម្ចីខ្លះក៏មានការបៀតបៀនលើស្រ្តី តាមរយៈការតម្រូវឱ្យអ្នកខ្ចីប្រាក់ជាស្ត្រី ផ្ញើរូបភាពអាក្រាតទៅកាន់អ្នកដែលផ្តល់កម្ចី និងមានការបង្ហោះតាមបណ្ដាញសង្គម ដែលធ្វើឱ្យជនរងគ្រោះមួយចំនួនឈានដល់ការធ្វើអត្តឃាតផងដែរ។
លោកថា៖ «បញ្ហាទាំងអស់នេះកើតឡើងយូរមកហើយ មិនគួរបណ្ដែតបណ្ដោយឱ្យរីករាលដាលធំ ដែលប៉ះពាល់ធ្ងន់ធ្ងរណាស់។ បើយើងនិយាយទៅ សន្តិសុខតាមប្រព័ន្ធផ្សព្វផ្សាយ ជាពិសេសទាក់ទងនឹងការខ្ចីលុយ ដែលប៉ះពាល់ដល់សេដ្ឋកិច្ច ទៅដល់ជីវភាពរស់នៅ អ្នកខ្លះសុខចិត្តធ្វើអត្តឃាតដោយសារអាម៉ាស់ខ្លាំង»។
ប្រធានផ្នែកទំនាក់ទំនង នៃសមាគមមីក្រូហិរញ្ញវត្ថុកម្ពុជា (CMA) លោក កាំង តុងងី បានគាំទ្រឱ្យមានវិធានការផ្លូវច្បាប់ទៅលើបុគ្គល ឬស្ថាប័នដែលផ្តល់ប្រាក់កម្ចីខុសច្បាប់ទាំងនោះ។ លោកថា អ្នកផ្ដល់ហិរញ្ញវត្ថុដោយខុសច្បាប់ទាំងនោះ មានទាំងអ្នកចងការប្រាក់នៅតាមភូមិ តាមស្រុក ក្នុងនោះមានទាំងជនជាតិបរទេសទៀតផង ហើយពួកគេបានបង្កផលប៉ះពាល់ដល់សេដ្ឋកិច្ចរបស់ពលរដ្ឋជាខ្លាំង ដោយសារតែការយកអត្រាការប្រាក់ខ្ពស់ និងធ្វើឱ្យពលរដ្ឋយល់ច្រឡំថាអ្នកផ្ដល់សេវាប្រាក់កម្ចីទាំងនោះគឺជាគ្រឹះស្ថានហិរញ្ញវត្ថុដែលទទួលស្គាល់ដោយធនាគារជាតិថែមទៀតផង។
លោកថា៖ «បញ្ហាធំមុនគេ គឺអតិថិជនខ្លួនឯង ដោយសារឥណទានទាំងអស់ហ្នឹង ការប្រាក់ថ្លៃៗណាស់ មួយចំនួនការប្រាក់ដល់១០ភាគរយ ២០ភាគរយក្នុងមួយថ្ងៃ។ ហើយទន្ទឹមនឹងហ្នឹង ហើយពួកគាត់មិនមានក្រមសីលធម៌អីទេ គឺធ្វើការគំរាមកំហែងដាក់សម្ពាធអតិថិជន គាត់តេទៅរំខានអ្នកពាក់ព័ន្ធជុំវិញ»។
ក្នុងរបាយការណ៍របស់អង្គការលីកាដូ កាលពីថ្ងៃទី០១ ខែសីហា ឆ្នាំ២០២២ បានរកឃើញថា នៅក្នុងឆ្នាំ២០២១ មានការផ្ដល់ប្រាក់កម្ចីមិនផ្លូវការ កំពុងដាក់គោលដៅលើស្រ្តីខ្មែរនៅលើបណ្ដាញសង្គមហ្វេសប៊ុក និងតេឡេក្រាម ហើយការប្រើប្រាស់កម្ចីអនឡាញនេះអាចទាញស្ដ្រីទាំងនោះឱ្យធ្លាក់ក្នុងបំណុលវ័ណ្ឌក និងការជំរិតទារប្រាក់តាមរយៈការប្រើប្រាស់រូបភាព និងវីដេអូអាក្រាតរបស់ជនរងគ្រោះ៕