អាជ្ញាធររាជធានីភ្នំពេញ បាន​ចាប់ខ្លួនកញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៅរសៀលនេះ នៅពេលនាងបានដើរទៅចូលរួមធ្វើកូដកម្មដោយសន្តិវិធីនៅទីតាំងមុខក្រុមហ៊ុនកាស៊ីណូណាហ្គាវើលដ៍។

តុលាការចេញដីកាបង្គាប់ឱ្យចាប់ខ្លួនមេដឹកនាំសហជីពចំនួន៣នាក់បន្ថែមទៀត ពាក់ព័ន្ធនឹងការញុះ​ញង់ និងរៀបចំការតវ៉ានៅមុខក្រុមហ៊ុនណាហ្គាវើលដ៍ ខណៈម​នុស្ស៦នាក់​ត្រូវបានតុលាការចោទប្រកាន់និងបង្គាប់ឱ្យឃុំ​ខ្លួន​នៅក្នុងពន្ធនាគារជាបណ្ដោះអាសន្ន។

មន្ត្រីសង្គមស៊ីវិលបានចាត់ទុកការចាប់ខ្លួនកូដករអហិង្សា១៤នាក់បន្ថែមទៀតដែលមានវិវាទការងារជាមួយ​​ក្រុមហ៊ុនណាហ្គាវើលដ៍ ជាការរំលោភសិទ្ធិជាមូលដ្ឋានរបស់កម្មករនិយោជិត និងគំរាមកំហែងធ្ងន់ធ្ងរដល់ការតស៊ូមតិដោយសន្តិវិធីនៅកម្ពុជា។  ​

មន្ត្រី​សង្គមស៊ីវិលដែលឃ្លាំមើលបញ្ហាសិទ្ធិមនុស្ស និងការងារ បានឱ្យដឹងថា មានមនុស្សចំនួន១៤នាក់បន្ថែមទៀតត្រូវបានសមត្ថកិច្ចរាជធានីភ្នំពេញចាប់ខ្លួននៅថ្ងៃចន្ទនេះ ពាក់ព័ន្ធសកម្មភាពកូដកម្មអហិង្សាករណីវិវាទការងារជាមួយក្រុមហ៊ុនណាហ្គាវើលដ៍ ខណៈថ្នាក់ដឹកនាំនិងសកម្មជនសហជីពក្រុមហ៊ុនល្បែងមួយនេះ៦នាក់ផ្សេងទៀតដែលបានចាប់ខ្លួនកាលពីយប់ឆ្លងឆ្នាំសកល ត្រូវបានបញ្ជូនឡើងតុលាការផងដែរ។

ក្រុមប្រតិភូចរចាវិវាទក្រុមហ៊ុនណាហ្គាវើលដ៍ ចាត់ទុកការចោទប្រកាន់របស់អាជ្ញាធរទៅលើក្រុមកម្មករដែលប្រមូលផ្តុំតវ៉ាអហិង្សា​ថា ធ្វើឱ្យប៉ះពាល់ដល់សន្តិសុខសណ្តាប់ធ្នាប់ និងអាជីវកម្មរបស់ថៅកែ ជាការលើកទឹកចិត្តឱ្យភាគីក្រុមហ៊ុនបន្តរំលោភច្បាប់​ ដែលនាំឱ្យប៉ះពាល់ដល់មុខមាត់រដ្ឋាភិបាលលើឆាកអន្តរជាតិ។

ក្រុមអង្គការសង្គមស៊ីវិល សហជីពមួយចំនួន បានចេញមុខថ្កោលទោសចំពោះការចាប់ខ្លួនថ្នាក់ដឹកនាំ និងសកម្មជនសហជីពដែលជាបុគ្គលិកក្រុមហ៊ុន​​ណាហ្គាវើលដ៍​៩នាក់ និងទទូចឱ្យសមត្ថកិច្ចដោះលែងពួកគេឱ្យមានសេរីភាពវិញជាបន្ទាន់ ​ ដោយថាការធ្វើកូដកម្មអហិង្សាទាមទារដំណោះស្រាយការងាររបស់បុគ្គលិកទាំងនោះមិនមែនជារឿងខុសច្បាប់ឡើយ។