មន្រ្តីជាន់ខ្ពស់គណបក្សភ្លើងទៀន ទទួលស្គាល់ថា អ្វីដែលមាននៅក្នុងសេចក្តីថ្លែងការណ៍របស់គណបក្ស កាលពីថ្ងៃម្សិលមិញ គឺជារឿងដែលឆ្គាំឆ្គង និងមិនគួរឱ្យកើតមានទៀតនោះទេ ហើយផ្ទៃក្នុងគណបក្សនឹងដកខ្លឹមសារដូចដែលមាននៅក្នុងសេចក្ដីថ្លែងការណ៍នោះចេញជាបន្ទាន់ផងដែរ ក្នុងន័យដើម្បីសម្រួលស្ថានការណ៍នេះឱ្យមានភាពប្រក្រតីឡើងវិញ។
លោកនាយករដ្ឋមន្ត្រី ហ៊ុន សែន បានព្រមានប្ដឹងគណបក្សភ្លើងទៀនទៅតុលាការ ក្រោយពីពិនិត្យឃើញថា គណបក្សក្រៅរដ្ឋាភិបាលមួយនេះចោទប្រកាន់បក្សកាន់អំណាចថាបានបន្តប្រើប្រាស់ឥទ្ធិពលរបស់ខ្លួន ដាក់ការគាបសង្កត់ទៅលើដៃគូប្រកួតនៅមុនការបោះឆ្នោតថ្នាក់ជាតិមកដល់។
វិធានការចាប់ឃុំខ្លួន និងចោទប្រកាន់ក្បាលម៉ាស៊ីនដឹកនាំគណបក្សជំទាស់ជាបន្តបន្ទាប់តាមផ្លូវតុលាការ លើសង្វៀនប្រកួតនយោបាយ បានកក្រើកឡើងវិញនៅប៉ុន្មានសប្តាហ៍នេះ ស្របពេលរដូវបោះឆ្នោតដើម្បីដណ្ដើមតំណែងនាយករដ្ឋមន្ត្រីសម្រាប់ដឹកនាំប្រទេសអាណត្តិថ្មី កាន់តែខិតជិតមកដល់។
មេធាវីការពារសិទ្ធិឱ្យលោក ថាច់ សេដ្ឋា ចាត់ទុកការសើរើរឿងសំណុំរឿងចាស់ដែលកូនក្តីរបស់ខ្លួនធ្លាប់ទទួលបានយុត្តិធម៌ម្តងរួចមកហើយ ក្រោមបទចោទឆបោកលុយ ដូចអង្គហេតុដែលកំពុងកើតឡើងនេះ ថាជាការចោទប្រកាន់ឱ្យមានការភ័ន្តច្រឡំទាំងទៅលើអង្គហេតុផង និងអង្គច្បាប់ផង ទាក់ទងបំណុលដែលកូនក្តីរបស់ខ្លួនជំពាក់ក្រុមហ៊ុនមួយប្រមាណ ២ម៉ឺនដុល្លារអាមេរិក។
មេធាវីដែលការពារក្ដីឱ្យអនុប្រធានបក្សភ្លើងទៀន លោក ថាច់ សេដ្ឋា បញ្ជាក់ថា សេចក្តីថ្លែងការណ៍ដែលផ្សព្វផ្សាយថា «ការចាប់ខ្លួនលោក ថាច់ សេដ្ឋា គឺជារឿងត្រឹមត្រូវតាមនីតិវិធីច្បាប់នៅកម្ពុជា មិនពាក់ព័ន្ធរឿងនយោបាយ» នោះ គឺជាលិខិតក្លែងក្លាយ ដែលត្រូវគេបង្កើតដើម្បីបង្កការភ្ញាក់ផ្អើល និងចលាចលផ្ទៃក្នុងគណបក្សភ្លើងទៀន។
ការចាប់ខ្លួនលោក ថាច់ សេដ្ឋា នៅពេលនេះ ដែលតុលាការសំអាងហេតុថាធ្វើឡើងដោយផ្អែកលើភស្តុតាងដាក់បន្ទុកត្រឹមត្រូវតាមនីតិវិធីច្បាប់ ក្នុងពេលអ្នកនយោបាយនៅក្រៅរដ្ឋាភិបាលដាក់មន្ទិលសង្ស័យទៅលើការអនុវត្តនីតិវិធីនេះ ដែលចាត់ទុកទំនងអាចជាការចាប់ខ្លួនក្រោមហេតុផលនយោបាយច្រើនជាង ព្រោះបើគេពិនិត្យអំពីពេលវេលានៃបទល្មើស លោក ថាច់ សេដ្ឋា គួរណាស់ត្រូវបានចាប់ខ្លួនភ្លាមៗតាំងពីមានបណ្ដឹងប្រឆាំងការចេញសែកស្អុយមកម៉្លេះ។
គណបក្សភ្លើងទៀន អះអាងថា បក្សក្រៅរដ្ឋាភិបាលមួយនេះកំពុងស្វែងរកការចរចាជាមួយបក្សកាន់អំណាច ដើម្បីដោះស្រាយបញ្ហាកម្ដៅនយោបាយនៅពេលបច្ចុប្បន្ន ក្រោយពីមានការចាប់ឃុំខ្លួនអនុប្រធានគណបក្សរបស់ខ្លួន គឺលោក ថាច់ សេដ្ឋា។
គណបក្សភ្លើងទៀន បានចេញមុខថ្កោលទោសការចាប់ឃុំខ្លួនលោក ថាច់ សេដ្ឋា និងទាមទារទៅរដ្ឋាភិបាល និងតុលាការឱ្យដោះលែងជាបន្ទាន់ដោយឥតលក្ខខណ្ឌ ព្រមទាំងបញ្ឈប់ការចាប់ឃុំខ្លួន រួមទាំងការគំរាមកំហែងតាមគ្រប់រូបភាពលើថ្នាក់ដឹកនាំ និងសកម្មជនរបស់ខ្លួនបន្តទៀត ដើម្បីធានាដំណើរការបោះឆ្នោតខាងមុខប្រព្រឹត្តទៅដោយសេរី ត្រឹមត្រូវ និងយុត្តិធម៌។
អនុប្រធានគណបក្សភ្លើងទៀន លោក ថាច់ សេដ្ឋា ត្រូវបានសមត្ថកិច្ចចាប់ខ្លួន នៅល្ងាចថ្ងៃទី១៦ ខែមករា ឆ្នាំ២០២៣ នេះ។
គណបក្សភ្លើងទៀន បានព្រមានធ្វើពហិការមិនចូលរួមក្នុងការបោះឆ្នោតជ្រើសតាំងតំណាងរាស្ត្រដែលនឹងប្រព្រឹត្តទៅនាខែកក្កដា ឆ្នាំ២០២៣ ខាងមុខនេះទេ ប្រសិនបើបរិយាកាសនយោបាយនៅតែបន្តមានភាពអាប់អួដូចសព្វថ្ងៃនេះ ប៉ុន្តែគណបក្សកាន់អំណាចវិញបានចាត់ទុកសារនយោបាយរបស់គណបក្សក្រៅរដ្ឋាភិបាលមួយនេះថា វាគឺជាផ្នែកមួយនៃការគំរាមកំហែងខាងនយោបាយ។
VOD គឺជាស្ថាប័នព័ត៌មានឯករាជ្យដែលផ្តល់ព័ត៌មាន ផលិតកម្មវិធីវិទ្យុ និងការផ្សព្វផ្សាយតាមរយៈគេហទំព័រអ៊ីនធើណេត។
© ២០២២ រក្សាសិទ្ធិគ្រប់យ៉ាងដោយ ស៊ីស៊ីអាយអឹម
