យុវជនម្នាក់ដែលទើបចេញមុខបង្កើតគណបក្សថ្មីមួយបានឲ្យដឹងថាមន្រ្តីពន្ធនាគារបានរារាំងក្រុមលោកមិនឲ្យចូលជួបសួរសុខទុក្ខសកម្មជនគណបក្សសង្រ្គោះជាតិនៅថ្ងៃព្រហស្បតិ៍នេះទេបើទោះជាលោកមានលិខិតអនុញ្ញាតពីក្រសួងមហាផ្ទៃក៏ដោយ។
ប្រធានគណបក្សយុវជនកម្ពុជាលោក ពេជ្រ ស្រស់ បានប្រាប់VODថាលោកបានបំពេញនីតិវិធីតាមក្រសួងមហាផ្ទៃតម្រូវរួចហើយនិងមានលិខិតអនុញ្ញាតពីលោក ស ខេង ដើម្បីបានជួបសួរសុខទុក្ខសកម្មជនគណបក្សសង្រ្គោះជាតិទាំង១០រូបនោះ។ ប៉ុន្តែលោកថានៅពេលលោកទៅដល់ពន្ធនាគារព្រឹកនេះបែរជាមន្រ្តីពន្ធនាគារចេញមករារាំងដោយអះអាងថាថ្នាក់លើបានដូរគោលការណ៍ដោយមិនអនុញ្ញាតឲ្យចូលជួបសកម្មជនគណបក្សប្រឆាំងទេ។
លោកថា៖ “ល្ងាចមិញយើងទទួលបានលិខិតអនុញ្ញាតទៀតបានយើងហ៊ានទៅដល់នោះ…យើងទៅដល់ស្រាប់តែមន្រ្តីពន្ធនាគារប្រាប់ថាថ្នាក់លើខល (ទូរស័ព្ទ)មកប្រាប់ដូរគោលការណ៍។ ខ្ញុំថាគោលការណ៍ និងលិខិតអនុញ្ញាតហ្នឹង ស៊ីញ៉េនឹងដៃលុបនឹងជើង? មន្រ្តីក្រសួងមហាផ្ទៃធ្វើការរបៀបម៉េច?… មានន័យថាចេតនាមន្រ្តីរដ្ឋាភិបាលដែលដឹកនាំដោយគណបក្សប្រជាជនហ្នឹងមានចេតនារាំងស្ទះមិនឲ្យគណបក្សយុវជនចូលរួមដោយហេតុថាពលរដ្ឋអាចគិតថាគណបក្សយុវជនចិត្តទូលាយអាចបោះឲ្យគណបក្សយុវជនពួកគាត់[CPP]ចាញ់ឆ្នោតអាម៉ាស់ក្មេងៗ”។
VODមិនអាចទាក់ទងលោក ស្រ៊ុន លាង ប្រធានមណ្ឌលកែប្រែទី១បានទេ។ ចំណែកលោក គុយ ប៊ុនសន អគ្គនាយកពន្ធនាគារក៏VODមិនអាចទាក់ទងបានដែរ។ ទោះយ៉ាងណា អ្នកនាំពាក្យអគ្គនាយកដ្ឋានពន្ធនាគារ លោក នុត សវនា ត្រូវបានសារព័ត៌មាន Fresh News ដកស្រង់សម្ដីថា ការដែលមន្រ្តីពន្ធនាគារមិនអនុញ្ញាតឱ្យ លោក ពេជ្រ ស្រស់ ចូលសួរសុខទុក្ខសកម្មជនគណបក្សសង្រ្គោះជាតិនោះ ដោយសារលិខិតអនុញ្ញាតដែលបានចេញឲ្យកន្លងមកនោះ ត្រូវបានទុកជានិរាករណ៍ហើយ ដោយលោកអះអាងថា មកពីលិខិតនោះពុំបានកំណត់ពេលវេលាច្បាស់លាស់។
ក្នុងលិខិតរបស់ប្រធានគណបក្សយុវជនកម្ពុជាលោក ពេជ្រ ស្រស់ បានអះអាងប្រាប់លោក ស ខេង ថាមូលហេតុដែលលោកចង់ជួបសកម្មជនគណបក្សប្រឆាំងព្រោះថ្នាក់ដឹកនាំគណបក្សថ្មីនេះភាគច្រើនជាយុវជនហើយពួកគេចង់បង្ហាញថាពីកម្លាំងខ្លាំងក្លារបស់យុវជនដោយអះអាងថាដើម្បីស្វែងយល់ពីទឹកចិត្តអ្នកនយោបាយដូចគ្នា។
មន្រ្តីជាន់ខ្ពស់គណបក្សសង្រ្គោះជាតិលោក អេង ឆៃអ៊ាង បានស្វាគមន៍ចំពោះគម្រោងជួបសួរសុខទុក្ខសកម្មជនគណបក្សរបស់លោកនេះដោយលោកមិនបារម្ភថាគណបក្សថ្មីនេះអាចស្រូបយកសំឡេងពីគណបក្សសង្រ្គោះជាតិបាននោះទេ។
សូមបញ្ជាក់ថាគណបក្សយុវជនកម្ពុជាទើបតែដាក់ពាក្យសុំបង្កើតគណបក្សថ្មីនេះទៅក្រសួងមហាផ្ទៃហើយលោក ស ខេង ធ្លាប់បានឲ្យដឹងថាក្រសួងគ្រាន់តែទទួលពាក្យសុំបង្កើតគណបក្សនេះតែតម្រូវឲ្យបំពេញលក្ខខណ្ឌមួយចំនួនទៀត៕