រដ្ឋាភិបាលណែនាំឲ្យអ្នកធ្វើអាជីវកម្មឧស្សាហកម្មទេសចរណ៍ត្រូវខិតខំពង្រឹងគុណភាពសេវាកម្មរបស់ខ្លួនដើម្បីធានាដល់សុខុមាលភាពភ្ញៀវទេសចរណ៍ក្នុងឱកាសបុណ្យចូលឆ្នាំថ្មីខាងមុខ។
ក្រសួងទេសចរណ៍បានចេញសេចក្ដីណែនាំចុះថ្ងៃទី០៧ ខែមេសា ដោយប្រាប់ឲ្យអ្នកប្រកបរបរវិស័យទេសចរណ៍នេះរៀបចំសោភ័ណភាព សណ្ដាប់ធ្នាប់ និងអនាម័យដល់ភ្ញៀវទេសចរណ៍ តាមរយៈការតុបតែងលម្អនិង រក្សាសណ្ដាប់ធ្នាប់នៃការចតយានយន្តកុំឲ្យប៉ះពាល់ដល់ចរាចរណ៍លើផ្លូវសាធារណៈ។
សេចក្តីណែនាំរបស់រដ្ឋាភិបាលនេះគឺធ្វើក្រោយពីមានការរិះគន់ថានៅពេលបុណ្យទានធំៗតម្លៃម្ហូបអាហារតែងតែឡើងថ្លៃនិងសេវាកម្មមិនសូវល្អ។
ទោះជាយ៉ាងណាក្រសួងក៏ណែនាំឲ្យអ្នកផ្ដល់សេវាកម្មទាំងអស់ដាក់តាំងនូវបញ្ជីរាយនាមសេវាកម្មយ៉ាងតិចពីរ ភាសានិងដាក់តម្លៃឲ្យបានជាក់លាក់។ ជាងនេះទៅទៀតរៀបចំប្រព័ន្ធគ្រប់គ្រងសំណល់ឲ្យបានត្រឹមត្រូវនិង រៀបចំបង្គន់អនាម័យឲ្យបានល្អជៀសវាងមានការភាយក្លិន។
ក្នុងសេចក្ដីណែនាំដដែលក្រសួងក៏បានណែនាំដល់អ្នកផ្ដល់សេវាកម្មដឹកជញ្ជូនឲ្យមានការយកចិត្តទុកដាក់រក្សាសុវត្ថិភាពក្នុងការដឹកជញ្ជូនភ្ញៀវទេសចរណ៍និងរក្សាតម្លៃមិនឲ្យលើសពីថ្ងៃធម្មតាឡើយ៕
