អាជ្ញាធរសុខាភិបាលសិង្ហបុរី បានប្រកាសថា ករណីឆ្លងវីរុសហ្ស៊ីកា ១៤ករណីថ្មីទៀត ត្រូវបានគេរកឃើញកាលពីថ្ងៃសៅរ៍ម្សិលមិញ ដែលនាំឲ្យចំនួននៃការឆ្លងវីរុសនេះ កើនឡើងដល់ ៣១៨ករណី នៅក្នុងប្រទេសនេះ។
សារព័ត៌មាន Channel News Asia របស់សិង្ហបុរី បានផ្សាយថា ក្រសួងសុខាភិបាល និងទីភ្នាក់ងារបរិស្ថានជាតិ បាននិយាយក្នុងសេចក្ដីប្រកាសរួមមួយថា ករណីឆ្លងវីរុសហ្ស៊ីកា ១៤ករណីថ្មីទៀតនេះ មានជាប់ពាក់ព័ន្ធទៅនឹងទីកន្លែងដែលធ្លាប់រងការឆ្លងវីរុសនេះ។
អាជ្ញាធរសុខាភិបាលសិង្ហបុរី បានជំរុញទៅប្រជាជនឲ្យចូលរួមប្រយុទ្ធប្រឆាំងនឹងជំងឺ Zika តាមរយៈការកម្ចាត់មូសខ្លាញី និងការលុបបំបាត់ទឹកដកដែលជំរុញទៅដល់កំណកំណើតសត្វមូស។
នេះក៏ជាសារព្រមានទៅដល់ប្រជាពលរដ្ឋកម្ពុជាយើងផងដែរ ឲ្យប្រុងប្រយ័ត្នខ្ពស់ចំពោះការធ្វើដំណើរទៅកាន់ប្រទេសសិង្ហបុរី ខណៈដែលប្រទេសនេះកំពុងប្រឈមមុខនឹងការរីករាលដាលនៃការឆ្លងវីរុស Zika៕
