គណៈកម្មការរៀបចំបុណ្យ១០០ថ្ងៃលោក កែម ឡី អំពាវនាវឲ្យយុវជនចូលរួមស្ម័គ្រចិត្តជួយក្រុមការងារក្នុងការរៀបចំរោងបុណ្យនិងសម្ភារផ្សេងៗទៀត ខណៈពិធីបុណ្យចាប់ផ្តើមនៅថ្ងៃស្អែកនេះ ប៉ុន្តែការងារមួយចំនួននៅមិនទាន់រៀបចំហើយ។
សមាជិកគណៈកម្មការបុណ្យ ព្រះតេជគុណ ប៊ុត ប៊ុនតិញ មានសង្ឃដីកានៅកន្លែងរៀបចំរោងបុណ្យនៅព្រឹកនេះថា រោងបុណ្យទើបរៀបចំបានប្រមាណ៣០%។ ព្រះតេជគុណបន្តថា ចំណែកការរៀបចំផ្កាតុបតែងនិងជួយរៀបចំសម្ភារផ្សេងៗ ក៏ត្រូវការកម្លាំងយុវជនបន្ថែមដើម្បីរៀបចំផងដែរ។
បុណ្យគម្រប់ខួប១០០ថ្ងៃរបស់លោក កែម ឡី ធ្វើរយៈពេល៤ថ្ងៃ គឺចាប់ពីថ្ងៃទី១៤ដល់ថ្ងៃទី១៧ខែតុលា។ ចាប់ពីថ្ងៃទី១៤និង១៥ បុណ្យធ្វើនៅវត្តចាស់ក្នុងរាជធានីភ្នំពេញ ចំណែកនៅថ្ងៃទី១៦ចាប់ផ្តើមហែរូបសំណាកលោក កែម ឡី ទៅកាន់ខេត្តតាកែវ ហើយនៅថ្ងៃទី១៧ធ្វើបុណ្យនៅទីនោះមួយព្រឹកទៀត៕