បរាជ័យនៃការចរចាពាណិជ្ជកម្មរវាងកាណាដា និងសហភាពអឺរ៉ុប គឺជាសញ្ញាមួយទៀតនៃភាពជាប់គាំងនៃសកលភាវូបនីយកម្មផ្នែកសេដ្ឋកិច្ច។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
បើតាម AFP ទោះបីជាមានការជជែកគ្នារវាងក្រុងអូតាវ៉ា និងក្រុងប៊្រុចសែលអស់រយៈពេល ៧ឆ្នាំហើយក្ដី ប៉ុន្តែ កិច្ចព្រមព្រៀងពាណិជ្ជកម្មកាណាដា-អឺរ៉ុប បានខិតដល់ភាពទាល់ច្រកទៀតហើយកាលពីថ្ងៃសុក្រកន្លងមកនេះ បន្ទាប់ពីតំបន់ Wallonia របស់ប្រទេសប៊ែលហ្ស៊ិក បានច្រានចោល ដែលធ្វើឲ្យអឺរ៉ុបពិបាកអនុម័តកិច្ចព្រមព្រៀងនេះ។
នេះគឺជាសញ្ញារាំងស្ទះមួយសម្រាប់កិច្ចព្រមព្រៀងមួយទៀត គឺដៃគូវិនិយោគ និងពាណិជ្ជកម្មកាត់មហាសមុទ្រអាត្លង់ទិក រវាងសហរដ្ឋអាមេរិក និងសហភាពអឺរ៉ុប ដែលប្រឈមមុខនឹងការជំទាស់ពីភាគីទាំងសងខាង៕
ដៃគូពាណិជ្ជកម្មមហាសមុទ្រប៉ាស៊ីហ្វិក ដែលជាកិច្ចព្រមព្រៀមដ៏ធំមួយបានជាប់គាំងរួចទៅហើយរវាងសហរដ្ឋអាមេរិក និងបណ្ដាប្រទេសតំបន់ប៉ាស៊ីហ្វិក ១១ទៀតនោះ ក៏នឹងបរាជ័យផងដែរ ដោយសារសភាអាមេរិកបដិសេធអនុម័តយល់ព្រម៕