តុលាការភ្នំពេញ​ដាក់ស្ត្រី​សកម្មជនដីធ្លីបឹងកក់ម្នាក់ទៀត​​ក្រោមការត្រួតពិនិត្យ

សកម្មជនដីធ្លីសហគមន៍បឹងកក់ម្នាក់ត្រូវបានសាលាដំបូងរាជធានីភ្នំពេញដាក់ឱ្យស្ថិតក្រោមការត្រួតពិនិត្យតាមផ្លូវតុលាការដែលត្រូវបានដកសិទ្ធិមួយចំនួនក្នុងនាមជាពលរដ្ឋ ពាក់ព័ន្ធនឹងរឿងរាវកាលពីបីឆ្នាំមុន។

ដីការបស់សាលាដំបូងរាជធានីភ្នំពេញចុះថ្ងៃទី ០៤ ខែវិច្ឆកានេះ បានសម្រេចដាក់អ្នកស្រី ង៉ែត ឃុន សកម្មជនដីដ្លីនៅតំបន់បឹងកក់ឱ្យស្ថិតក្រោមការត្រួតពិនិត្យតាមផ្លូវតុលាការ ពីបទជេរប្រមាថជាសាធារណៈ និងគំរាមសម្លាប់ពលរដ្ឋក្នុងតំបន់ជាមួយគ្នាដែលប្រព្រឹត្តទៅកាលពីថ្ងៃទី ២០ ខែ មីនា ឆ្នាំ ២០១២។

យោងតាមដីកានេះបានសម្រេចឱ្យអ្នកស្រី ង៉ែត ឃុន មិនត្រូវផ្លាស់ប្តូរទីលំនៅដោយគ្មានការអនុញ្ញាតពីចៅក្រមស៊ើបសួរ ត្រូវបង្ហាញខ្លួននៅពេលមានការកោះហៅរបស់ចៅក្រមស៊ើបសួរ  និងត្រូវបង្ហាញខ្លួននៅប៉ុស្តិ៍នគរបាលរដ្ឋបាល សង្កាត់ស្រះចក ក្នុង ១ ខែម្តង នៅរៀងរាល់ដើមសប្តាហ៍ទី១ នៃខែនីមួយៗ។

កាលពីថ្ងៃទី២០ ខែមីនា ឆ្នាំ ២០១២ អ្នកស្រីង៉ែត ឃុន បានដឹកនាំប្រជាពលរដ្ឋបឹងកក់មួយក្រុមទៅទាមទារប្លង់ដីដែលសាលារាជធានីភ្នំពេញថា ផ្តល់ឱ្យពួកគាត់ពី អ្នកស្រី លី មុំ អតីតតំណាងសហគមន៍បឹងកក់។  ទោះយ៉ាងណា អ្នកស្រី ង៉ែន ឃុន បានបញ្ជាក់ថា គាត់មិនបានជេរប្រមាថ និង គំរាមសម្លាប់នោះទេ ព្រោះថ្ងៃនោះ ពេលក្រុមឃាត់ទៅដល់ អ្នកស្រី លី មុំ បានបិទទ្វារផ្ទះមិនបានជជែកអ្វីជាមួយពួកគាត់។

ដោយលោក ពៅ មេត្តា និងកញ្ញា គឹម វិច្ចនី