ខណៈដែលបណ្ដាប្រទេសជាច្រើនប្រារព្ធបុណ្យណូអែលនោះ ទីក្រុងនានាក្នុងទ្វីបអឺរ៉ុប បានរឹតបន្តឹងសន្តិសុខយ៉ាងខ្លាំង បន្ទាប់ពីកើតមានករណីបើករថយន្តបំបុកមនុស្សនៅទីក្រុងប៊ែរឡាំងនៅសប្ដាហ៍នេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បើតាម Reuters ដដែល នៅឯប្រទេសបារាំង អង់គ្លេស និងអាល្លឺម៉ង់ ដែលសុទ្ធតែធ្លាប់រងគ្រោះដោយសារការវាយប្រហាររបស់ក្រុមភេរវកម្មឥស្លាមនិយមជ្រុលនាពេលកន្លងមកនោះ ប៉ូលិសបានបង្កើនវត្តមានរបស់ពួកគេនៅតាមទីតាំងទេសចរណ៍នានា នៅតាមបណ្ដាទីក្រុងធំៗ និងតំបន់មានប្រជាជនច្រើនកុះករ។
ជនជាតិទុយណេស៊ី អានីស អាំរី អាយុ ២៤ឆ្នាំ គឺជាជនសង្ស័យនៃការបើកឡានធំបំបុកមនុស្សនៅទីក្រុងប៊ែរឡាំង ដែលបានសម្លាប់មនុស្ស ១២នាក់។ ជនសង្ស័យរូបនេះ ត្រូវបានប៉ូលិសអ៊ីតាលីបាញ់ស្លាប់នៅជិតទីក្រុងមីឡង់ កាលពីព្រឹកថ្ងៃសុក្រកន្លងមក បន្ទាប់ពីជននេះបានទាញ់កាំភ្លើងតម្រង់ដាក់ប៉ូលិសអំឡុងពេលត្រួតពិនិត្យ។
ជននេះ បានគេចខ្លួនចេញពីប្រទេសអាល្លឺម៉ង់ឆ្លងកាត់ប្រទេសបារាំងទៅដល់ប្រទេសអ៊ីតាលីដោយគ្មាននរណាដឹងនោះឡើយ នោះក៏ដោយសារតែអឺរ៉ុបបើកចំហរព្រំដែនរួមរបស់ពួកគេ៕