នាយករដ្ឋមន្ត្រីសិង្ហបុរី លោក Lee Hsien Loong ថ្លែងនៅថ្ងៃសុក្រម្សិលមិញ ក្នុងវេទិកាមួយរៀបចំដោយ EDB Society និង Straits Timesថា អត្រាកំណើនសេដ្ឋកិច្ច ប្រទេសនេះ រីកម្រើនតិចតួចប៉ុន្តែមានស្ថិរភាពមិនមានអ្វីគួរឲ្យព្រួយបារម្ភនោះទេ។
ឆ្លើយតបនឹងសំនួរថា សិង្ហបុរី មានអត្រាកំណើនសេដ្ឋកិច្ចប៉ុន្មានប្រចាំឆ្នាំ? លោក Lee ថ្លែងថា រដ្ឋាភិបាលមិនមានអ្វីអន្ទះសារ ឬបារម្ភ ចំពោះស្ថានភាពសេដ្ឋកិច្ចទេ ប៉ុន្តែកំពុងតែតាមដាន និង យកចិត្តទុកដាក់យ៉ាងប្រុងប្រយ័ត្នបំផុតចំពោះគោលដៅដែលត្រូវទៅ។
លោកថ្លែងថា អត្រាកំណើនសេដ្ឋកិច្ច ១,៨ ភាគរយ កាលពីឆ្នាំមុន គឺតិចជាងអ្វីដែល ពួក គេសង្ឃឹម ប៉ុន្តែពួកគេអាចទទួលយកបាន។ លោកថា ឆ្នាំនេះនឹងធ្វើឲ្យប្រសើរឡើង គឺប្រសើរ ជាងបួនត្រីមាសកាលពីឆ្នាំមុន។
លោក Leeថ្លែងថា ប្រសិនជា អាចធ្វើឲ្យមានអត្រាកំណើនសេដ្ឋកិច្ច ២ទៅ៣ ភាគរយ ប្រហែល១០ឆ្នាំជាប់ៗគ្នានោះ គឺជារឿងល្អហើយ ដែលលោកថា អាចមានស្ថិរភាពរយៈពេលវែង ក្នុងការធ្វើឲ្យការរស់នៅមានស្តង់ដារ សម្រាប់ប្រជាជន។
ប៉ុន្តែលោកថា ក្នុងរយៈពេលខ្លីនេះ លោកគ្រាន់តែចង់ធ្វើឲ្យច្បាស់ថា វាកំពុងធ្លាក់ចុះឬ កើនឡើង ដើម្បីគ្រប់គ្រង បើធ្លាក់់ចុះគឺ កុំឲ្យធ្លាក់ចុះខ្លាំងពេក គឺឲ្យសេដ្ឋកិច្ចមានភាពល្អប្រសើរ។