ប្រទេសសិង្ហបុរី បានរាយការណ៍ពីការរកឃើញករណីដំបូងនៃជំងឺអុតស្វា លើអ្នកបម្រើការលើយន្តហោះជនជាតិអង់គ្លេសវ័យ៤២ឆ្នាំម្នាក់ ដោយបុរសរូបនេះបានស្ថិតនៅក្នុងប្រទេស អំឡុងថ្ងៃទី១៥ ទី១៧ និងទី១៩ ខែមិថុនា។ នេះបើតាមការឱ្យដឹងពីក្រសួងសុខាភិបាលនៃប្រទេសសិង្ហបុរី ដែលត្រូវបានយកមកចុះផ្សាយដោយសារព័ត៌មានសិង្ហបុរី CNA។
គួរបញ្ជាក់ថា កាលពីយប់ថ្ងៃទី១៩ ខែមិថុនា ឆ្នាំ២០២២ អ្នកជំងឺខាងលើនេះបានទៅជួបពិគ្រោះជាមួយវេជ្ជបណ្ឌិត បន្ទាប់ពីខ្លួនមានលេចចេញនូវអាការសង្ស័យមួយចំនួន ដូចជា ឈឺក្បាល ក្ដៅខ្លួន និងកន្ទួលក្រហមលើស្បែក។
នៅថ្ងៃទី២០ ខែមិថុនា បុរសរូបនោះក៏ត្រូវបានបញ្ជូនទៅពិនិត្យបន្ថែមទៀតនៅមជ្ឈមណ្ឌលជាតិប្រយុទ្ធនឹងជំងឺឆ្លងសិង្ហបុរី (NCID) ដែលលទ្ធផលតេស្តបានបញ្ជាក់ថា រូបលោកមានជំងឺអុតស្វាក្នុងកម្រិតស្រាល។
ទាក់ទងនឹងករណីនេះ ក្រសួងសុខាភិបាលសិង្ហបុរី បានឱ្យដឹងថា មនុស្សសរុបចំនួន១៣នាក់ដែលត្រូវបានរកឃើញថាជាប់ពាក់ព័ន្ធនឹងបុគ្គលរូបនេះ បច្ចុប្បន្នត្រូវបានដាក់ឱ្យនៅដាច់ដោយឡែកចំនួន២១ថ្ងៃ គិតចាប់ពីថ្ងៃដែលបានប៉ះពាល់ជាមួយអ្នកជំងឺ។
ក្នុងករណីសង្ស័យថាមានការឆ្លង ពួកគេនឹងត្រូវបញ្ជូនភ្លាមៗទៅកាន់មជ្ឈមណ្ឌលជាតិប្រយុទ្ធនឹងជំងឺឆ្លង ដើម្បីទទួលការព្យាបាល និងទប់ស្កាត់ការឆ្លងរាលដាលបន្តទៀតទៅកាន់អ្នកដទៃ។
គួរបញ្ជាក់ថា ជំងឺអុតស្វា (monkeypox) ត្រូវបានចាត់ថ្នាក់ជាវីរុសឆ្លងពីសត្វទៅមនុស្ស ដែលបង្ហាញរោគសញ្ញាស្រដៀងទៅនឹងជំងឺអុតស្វាយ ប៉ុន្តែមានលក្ខណៈធ្ងន់ធ្ងរជាង។ ការឆ្លងតាមផ្លូវដង្ហើមអាចកើតឡើងតាមរយៈទំនាក់ទំនងជិតស្និទ្ធជាមួយនឹងអ្នកជំងឺប៉ះពាល់ដំបៅលើស្បែកអ្នកជំងឺ ឬវត្ថុដែលជាប់មេរោគនេះ។
យោងតាមរបាយការណ៍របស់អង្គការសុខភាពពិភពលោក (WHO) គិតចាប់តាំងពីដើមឆ្នាំនេះ ការឆ្លងជំងឺអុតស្វានៅទូទាំងពិភពលោកត្រូវបានរាយការណ៍ថាមានចំនួន២១០៣ករណី ដែលត្រូវបានរកឃើញនៅក្នុងប្រទេសចំនួន៤២៕
