អាជ្ញាធរតួកគីគ្រោងនឹងបញ្ជូនជនជាតិឥណ្ឌូនេស៊ីប្រហែល ១០០០នាក់ ដែលគេសង្ស័យថា ព្យាយាមចូលរួមជាមួយក្រុមបះបោររដ្ឋឥស្លាមនៅក្នុងប្រទេសស៊ីរី។ នេះដោយយោងតាមការចុះផ្សាយរបស់សារព័ត៌មាន Channel News Asia ដែលបានដកស្រង់សម្ដីប៉ូលិសឥណ្ឌូនេស៊ី។
អ្នកនាំពាក្យប៉ូលិសឥណ្ឌូនេស៊ី លោក Rikwanto បានថ្លែងប្រាប់សារព័ត៌មានថា អ្វីដែលប៉ូលិសឥណ្ឌូនេស៊ីទទួលបានពីតួកគី គឺថា ពលរដ្ឋឥណ្ឌូនេស៊ីជិត ១០០០នាក់ នឹងត្រូវបញ្ជូនត្រឡប់មកវិញ។ ពលរដ្ឋទាំងនោះ មកពីតំបន់នានាក្នុងប្រទេសឥណ្ឌូនេស៊ី។
លោកបន្ថែមថា ពលរដ្ឋឥណ្ឌូនេស៊ីទាំងនោះ សព្វថ្ងៃនេះ កំពុងស្ថិតក្រោមការឃុំខ្លួន និងស៊ើបអង្កេតរបស់អាជ្ញាធរតួកគី។
បើតាមអ្នកនាំពាក្យប៉ូលិសឥណ្ឌូនេស៊ី នៅពេលការស៊ើបអង្កេតធ្វើឡើងចប់សព្វគ្រប់ ពលរដ្ឋទាំងនោះនឹងត្រូវបញ្ជូនមកវិញ។
អាជ្ញាធរតួកគីបានបញ្ជូនជនជាតិឥណ្ឌូនេស៊ីត្រឡប់មកវិញជាបន្តបន្ទាប់ ដោយសង្ស័យថា ពួកគេមានបំណងទៅចូលរួមប្រយុទ្ធជាមួយក្រុមបះបោររដ្ឋឥស្លាមនៅក្នុងប្រទេសស៊ីរី៕
