រដ្ឋបាលប្រធានាធិបតី លោក ដូណាល់ ត្រាំ កាលពីថ្ងៃម្សិលមិញនេះ បានប្រកាសដាក់ទណ្ឌកម្មទៅលើប្រទេសអ៊ីរ៉ង់ បន្ទាប់ពីប្រទេសនេះ បានបាញ់សាកល្បងគ្រាប់មីស៊ីលបាលីស្ទីកនាពេលថ្មីៗនេះ។ នេះដោយយោងតាមការផ្សាយរបស់សារព័ត៌មាន BBC។
បើតាម BBC ដដែល ទណ្ឌកម្មនេះ បានដៅទៅលើមនុស្ស ១៣នាក់ និងក្រុមហ៊ុនចំនួន ១២ ក្នុងនោះមានទាំងក្រុមហ៊ុននៅក្នុងប្រទេសចិន លីបង់ និងប្រទេសអារ៉ាប់រួមផងដែរ។
លោក ត្រាំ បានបង្ហោះសារនៅលើ Twitter ថា អ៊ីរ៉ង់កំពុងប្រលែងលេងជាមួយភ្លើង ពួកគេមិនអរគុណចំពោះទឹកចិត្តល្អរបស់ប្រធានាធិបតី អូបាម៉ា ដែលបានធ្វើទៅលើពួកគេនោះទេ។ ប៉ុន្តែ មិនរូបលោកនោះឡើយ។
អ៊ីរ៉ង់បានចាត់ទុកការគំរាមពីបុគ្គលគ្មានបទពិសោធន៍ម្នាក់ថាជារឿងឥតប្រយោជន៍ ដោយសន្យាដាក់ចេញនូវវិធានការនានាទាក់ទងនឹងប្រទេសទាំងពីរ។
ប្រមុខទណ្ឌកម្មស្ដីទីនៃក្រសួងរតនាគារអាមេរិក លោក John Smith បានរៀបរាប់ក្នុងសេចក្ដីថ្លែងការណ៍មួយកាលពីថ្ងៃម្សិលមិញថា ការបន្តគាំទ្រដល់ក្រុមភេរវកម្មពីសំណាក់ប្រទេសអ៊ីរ៉ង់ និងការអភិវឌ្ឍកម្មវិធីគ្រាប់មីស៊ីលរបស់ប្រទេសនេះ បានបង្កការគំរាមកំហែងដល់តំបន់ ប្រទេសជាដៃគូអាមេរិកនៅលើពិភពលោក និងគំរាមកំហែងដល់អាមេរិក៕
