វិមានក្រឹមឡាំង បានលើកឡើងកាលពីថ្ងៃពុធថា ប្រព័ន្ធការពារមីស៊ីល Patriot របស់អាមេរិក នឹងក្លាយជាគោលដៅស្របច្បាប់សម្រាប់ការវាយប្រហាររបស់រុស្ស៊ីលើអ៊ុយក្រែន ប្រសិនបើអាមេរិកហ៊ានបញ្ជូនប្រព័ន្ធការពារមីស៊ីលប្រភេទនេះទៅកាន់ទីក្រុងកៀវ (Kyiv)។
មន្ត្រីអាមេរិកបានប្រាប់ទីភ្នាក់ងារសារព័ត៌មាន Reuters កាលពីថ្ងៃអង្គារ និងត្រូវបានចុះផ្សាយនៅថ្ងៃនេះថា ទីក្រុងវ៉ាស៊ីនតោន កំពុងធ្វើសេចក្តីសម្រេចចុងក្រោយនៃផែនការបញ្ជូនប្រព័ន្ធការពារមីស៊ីល Patriot ទៅកាន់ប្រទេសអ៊ុយក្រែន ដែលអាចនឹងប្រកាសជាផ្លូវការក្នុងអំឡុងសប្តាហ៍នេះ។
អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បាននិយាយថា ប្រព័ន្ធការពារមីស៊ីល Patriots របស់អាមេរិក ប្រាកដណាស់នឹងក្លាយជាគោលដៅវាយប្រហាររបស់រុស្ស៊ី។
ប្រព័ន្ធការពារមីស៊ីល Patriot ត្រូវបានគេចាត់ទុកថាជាប្រព័ន្ធការពារដែនអាកាសដ៏ទំនើបបំផុតរបស់អាមេរិក។ វាមានសមត្ថភាពប្រឆាំងនឹងយន្តហោះ ស៊ីស៊ីលបណ្ដែត (cruise missiles) និងមីស៊ីលផ្លោង (ballistic missiles)។
ស្ថានទូតរុស្ស៊ីប្រចាំទីក្រុងវ៉ាស៊ីនតោន បាននិយាយថា ការបញ្ជូនប្រព័ន្ធការពារមីស៊ីល Patriot របស់អាមេរិក ទៅកាន់អ៊ុយក្រែន គឺជាការបង្កហេតុ ហើយអាចនាំឱ្យមានផលវិបាកដែលមិនអាចទាយទុកជាមុនបាន។
យោងតាមសារបង្ហោះនៅលើប្រព័ន្ធតេឡេក្រាមរបស់ស្ថានទូតរុស្ស៊ី បានឱ្យដឹងថា «បើទោះបីជាអាមេរិកមិនបានផ្តល់ប្រព័ន្ធការពារមីស៊ីល Patriots ទៅឱ្យអ៊ុយក្រែនក៏ដោយ ក៏អាមេរិកកំពុងផុងកាន់តែជ្រៅទៅក្នុងជម្លោះជាមួយរុស្ស៊ី»។
សារនោះបន្តថា៖ «អាមេរិក ជាអ្នកទទួលខុសត្រូវចំពោះសង្គ្រាមដែលកំពុងអូសបន្លាយ និងកាន់តែមានភាពតានតឹងខ្លាំងឡើង»។
មន្ទីរបញ្ចកោណ និយាយថា ការវាយប្រហារដោយមីស៊ីលកាន់តែច្រើនឡើងរបស់រុស្ស៊ីលើអ៊ុយក្រែន គឺដើម្បីកម្ទេចប្រព័ន្ធការពារដែនអាកាសដែលត្រូវបានផ្គត់ផ្គង់ឱ្យទីក្រុងកៀវ (Kyiv)។ ហេតុនេះហើយ អាមេរិក និងសម្ពន្ធមិត្ត បាននិងកំពុងផ្តល់ការការពារដែនអាកាសបន្ថែមទៀតសម្រាប់ទីក្រុងកៀវ។
គួរបញ្ជាក់ថា រហូតមកដល់ពេលនេះ ទីក្រុងវ៉ាស៊ីនតោន បានផ្តល់ជំនួយយោធាចំនួន ១៩,៣ ពាន់លានដុល្លារដល់អ៊ុយក្រែន ចាប់តាំងពីជម្លោះចាប់ផ្តើម៕
