មេដឹកនាំបក្សប្រឆាំង លោក សម រង្ស៊ី បានលើកឡើងថា លោកនាយករដ្ឋមន្ត្រី ហ៊ុន សែន បានព្យាយាមរំលាយគណបក្សប្រឆាំងរបស់លោក ដោយសារតែបក្សកាន់អំណាចដឹងថាខ្លួន មិនអាចឈ្នះការបោះឆ្នោតនាពេលខាងមុខ។
ក្នុងកិច្ចប្រជុំសភាពេញអង្គ ដែលមានតែតំណាងរាស្ត្របក្សកាន់អំណាចចូលរួម កាលពីថ្ងៃទី៣១ខែមករា លោកនាយករដ្ឋមន្ត្រី ហ៊ុន សែន បានព្រមានរឹបអូសទ្រព្យសម្បត្តិលោក សម រង្ស៊ី និងជំរុញទៅរដ្ឋសភា ឲ្យកែប្រែច្បាប់គណបក្សនយោបាយ ដើម្បីរាំងខ្ទប់ជីវិតនយោបាយរបស់លោក សម រង្ស៊ី។
ជាការឆ្លើយតបនឹងការព្រមាននេះ លោក សម រង្ស៊ី ដែលកំពុងរស់នៅឯក្រៅប្រទេសនោះ បានរៀបរាប់នៅលើទំព័រហ្វេសប៊ុករបស់លោកថា លោកនាយករដ្ឋមន្ត្រី ហ៊ុន សែន ធ្លាក់ទឹកចិត្តយ៉ាងខ្លាំង បន្ទាប់ពីលទ្ធផលនៃការបោះឆ្នោតកាលពីឆ្នាំ២០១៣។
លោកបន្តថា លោកនាយករដ្ឋមន្ត្រី ហ៊ុន សែន បានព្យាយាមរំលាយគណបក្សសង្គ្រោះជាតិជាច្រើនដងដោយសារតែដឹងថាមិនអាចឈ្នះបក្សប្រឆាំង នៅក្នុងការបោះឆ្នោតខាងមុខ។
គណបក្សប្រជាជនកម្ពុជា ដែលគ្រប់គ្រងប្រទេសកម្ពុជាអស់រយៈពេលជាង ៣០ឆ្នាំមកហើយនោះ បានបាត់បង់អាសន្នចំនួន ២២ ទៅគណបក្សសង្គ្រោះជាតិ នៅក្នុងការបោះឆ្នោតជាតិកាលពីឆ្នាំ២០១៣កន្លងមក៕