ស្ថាបនិកពីររូបនៃក្រុមហ៊ុនច្បាប់ Mossack Fonseca នៅក្នុងប្រទេសប៉ាណាម៉ា ត្រូវបានសមត្ថកិច្ចចាប់ខ្លួននៅថ្ងៃនេះ បន្ទាប់ពីអ្នកទាំងពីរនោះ ត្រូវបានតុលាការចោទប្រកាន់ថា បានលាងលុយកខ្វក់ នៅក្នុងករណីមួយដែលជាប់ទាក់ទងនឹងរឿងអាស្រូវពុករលួយដ៏ធំនៅក្នុងប្រទេសប្រេស៊ីល។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សម្ដីរដ្ឋមន្ត្រីយុត្តិធម៌នៃប្រទេសប៉ាណាម៉ា។
ស្ថាបនិកក្រុមហ៊ុនច្បាប់មួយនេះ មាន លោក ចួរហ្គេន មូសាក់ និងលោក រ៉ាម៉ន ហ្វុនសេកា ត្រូវបានសមត្ថកិច្ចឃុំខ្លួន ដោយសារតែបារម្ភថា ពួកគេអាចព្យាយាមរត់គេចខ្លួនចេញពីប្រទេស។
រដ្ឋមន្ត្រីក្រសួងយុត្តិធម៌ លោក ខេនៀ ព័រសេល បានប្រាប់អ្នកយកព័ត៌មាននៅថ្ងៃនេះថា ព័ត៌មានដែលគេប្រមូលបាន បានបញ្ជាក់ថា ក្រុមហ៊ុនច្បាប់ប៉ាណាម៉ាមួយនេះ គឺជាអង្គការឧក្រិដ្ឋ ដែលត្រូវបានគេបង្កើតឡើងដើម្បីលួចលាក់ទ្រព្យសម្បត្តិ ឬក៏លុយកាក់បានមកពីប្រភពគួរឲ្យសង្ស័យ។
លោក ព័រសេល បានបន្ថែមថា ការស៊ើបអង្កេតរយៈពេល ១ឆ្នាំ ដែលឈានទៅដល់ចាប់ខ្លួនស្ថាបនិកទាំងពីរនេះ បានទទួលជំនួយពីរដ្ឋអាជ្ញានៅប្រទេសប្រេស៊ីល ប៉េរូ អេក្វាទ័រ កូឡុំប៊ី ស្វីស និងសហរដ្ឋអាមេរិក។
ក្រុមហ៊ុន Mossack Fonseca ក៏ជាប់ពាក់ព័ន្ធនឹងករណីដាច់ដោយឡែកមួយទៀតដែលគេស្គាល់ថា Panama Papers។ Panama Papers មានជាប់ពាក់ព័ន្ធនឹងឯកសាររាប់លានទំព័រដែលគេលួចបានពីក្រុមហ៊ុនខាងលើ និងទម្លាយទៅសារព័ត៌មាននានា កាលពីខែមេសាឆ្នាំមុន៕
