តារាហូលីវូដអាមេរិកលោកស្រី អានជេលីណា ចូលី (Angelina Jolie) ប្រធានមូលនិធិ MJP បានពិភាក្សាជាមួយរដ្ឋមន្ត្រីក្រសួងបរិស្ថានលោក សាយ សំអាល់ពីការលើកកម្ពស់ជីវភាពពលរដ្ឋនៅតំបន់ព្រៃការពារ។
តាមទំព័រហ្វេសប៊ុករបស់ក្រសួងបរិស្ថាន ចុះផ្សាយថា ជំនួបនោះធ្វើឡើងកាលពីរសៀលថ្ងៃទី១៨ខែកុម្ភៈម្សិលមិញ។ ជំនួបរវាងលោកស្រី អានជេលីណា ជូលី និង លោកសាយ សំអាល់ ផ្តោតលើកិច្ចសហប្រតិបត្តិការក្នុងការបង្កើនប្រសិទ្ធភាពការពារ និងអភិរក្សធនធានធម្មជាតិនៅតំបន់ប្រើប្រាស់ច្រើនយ៉ាងសំឡូត ក៏ដូចជា ការលើកកម្ពស់ជីវភាពរស់នៅរបស់ប្រជាសហគមន៍មូលដ្ឋាន។
ហ្វេសប៊ុក ដដែលបញ្ជាក់ថា ការផ្តោតលើការលើស្ទួយជីវភាពប្រជាសហគមន៍ទាំងនោះ គឺដើម្បីធានាបាននូវប្រសិទ្ធភាពនិងនិរន្តរភាពនៃការគ្រប់គ្រងធនធានធម្មជាតិ កិច្ចពិភាក្សាបានឯកភាពបន្តកែលម្អយន្តការសហប្រតិបត្តិការ និងក្របខណ្ឌការងារ ដែលតម្រូវឱ្យភាគីទាំងពីររៀបចំនិងអនុវត្តរួមគ្នានូវផែនការល្បាត ទប់ស្កាត់ និងបង្ក្រាបបទល្មើសធនធានធម្មជាតិគ្រប់រូបភាព។
ទន្ទឹមនឹងនេះ កិច្ចពិភាក្សាក៏បានឯកភាពលើការជំរុញការលើកកម្ពស់ជីវភាពរស់នៅរបស់សហគមន៍នៅក្នុងតំបន់នេះ តាមរយៈការអភិវឌ្ឍការងារកសិកម្ម មុខរបរចិញ្ចឹមជីវិត និងទេសចរណ៍ធម្មជាតិ សំដៅកាត់បន្ថយការពឹងអាស្រ័យទាំងស្រុងលើធនធានធម្មជាតិ ក៏ដូចជាប្រែក្លាយឥរិយាបទរបស់ប្រជាសហគមន៍មូលដ្ឋានក្នុងការរស់នៅប្រកបដោយភាពសុខដុមរមនាជាមួយបរិស្ថាន និងធនធានធម្មជាតិ។
