ប្រទេសម៉ាឡេស៊ី បាននិយាយនៅថ្ងៃនេះថា ខ្លួននឹងចេញដីកាចាប់ខ្លួនអ្នកកាទូតកូរ៉េខាងជើងម្នាក់ យកមកសួរចម្លើយ ជុំវិញករណីឃាតកម្មលើលោក គីម ជុងណាម ប្រសិនបើអ្នកកាទូតរូបនេះ មិនសហការជាមួយប៉ូលិសដោយស្ម័គ្រចិត្តទេនោះ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
នៅដើមសប្ដាហ៍នេះ ប្រទេសម៉ាឡេស៊ីនិយាយថា លោក យ៉ុន ក្វាងសុង អាយុ ៤៤ឆ្នាំ ជាលេខាទីពីរប្រចាំស្ថានទូតកូរ៉េខាងជើងនៅទីក្រុងគួឡាឡំពួរ ស្ថិតនៅក្រោមការតាមចាប់ខ្លួនយកទៅសួរចម្លើយ ជុំវិញឃាតកម្មទៅលើលោក គីម ជុងណាម បងប្រុសម្ដាយទីទៃរបស់មេដឹកនាំកូរ៉េខាងជើង លោក គីម ជុងអ៊ុន។
មេប៉ូលិសរដ្ឋសេឡាំងហ្គ័រ លោក អាប់ឌុល សាម៉ាហ៍ម៉ាត់ បាននិយាយថា ពេលវេលាសមគួរមួយ ត្រូវបានគេផ្ដល់ទៅអ្នកកាទូតរូបនោះ ឲ្យចូលខ្លួនទៅបំភ្លឺនៅមុខប៉ូលិស មុននឹងគេចាត់វិធានការបន្ថែមទៀត។
លោក សាម៉ាហ៍ បាននិយាយថា ប្រសិនបើបុគ្គលជាប់ពាក់ព័ន្ធ មិនសហការជាមួយទេ ប៉ូលិសនឹងចេញសេចក្ដីជូនដំណឹងទៅតាមច្បាប់របស់ម៉ាឡេស៊ី បង្ខំឲ្យពួកគេបង្ហាញខ្លួននៅមុខក្រុមមន្ត្រីស៊ើបអង្កេត។
មេប៉ូលិសរូបនេះ បានប្រាប់ក្រុមអ្នកយកព័ត៌មានថា ប្រសិនបើអ្នកកាទូតរូបនេះមិនបង្ហាញខ្លួនតាមសេចក្ដីជូនដំណឹងទេ ប៉ូលិសនឹងអនុវត្តតាមជំហ៊ានបន្ទាប់ តាមរយៈការស្នើសុំដីកាចាប់ខ្លួនពីតុលាការ។
ទោះជាយ៉ាងណា គេមិនច្បាស់ថា តើមន្ត្រីកាទូតរូបនេះ អាចត្រូវឃុំខ្លួនឬយ៉ាងណា បន្ទាប់ពីប៉ូលិសនិយាយថា មន្ត្រីកូរ៉េខាងជើងរូបនោះ មានបុព្វសិទ្ធិកាទូត។
ជនជាតិកូរ៉េខាងជើង ៨នាក់ កំពុងស្ថិតក្រោមការតាមចាប់ខ្លួន ពាក់ព័ន្ធនឹងករណីនេះ ក្នុងនោះមានទាំងអ្នកកាទូតម្នាក់។ ជនជាតិកូរ៉េខាងជើងម្នាក់ ត្រូវបានប៉ូលិសម៉ាឡេស៊ីឃុំខ្លួនហើយ ចំណែក ៤នាក់ទៀត ត្រូវបានគេជឿថា បានរត់គេចខ្លួនទៅកូរ៉េខាងជើងវិញ ខណៈ ២នាក់កំពុងស្ថិតនៅក្នុងប្រទេសម៉ាឡេស៊ីនៅឡើយ៕