មនុស្សរាប់ពាន់នាក់ ក្នុងនោះមានទាំងក្រុមអ្នកគាំទ្រ និងអ្នកប្រឆាំងប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ ផងដែរ បានចូលរួមពិធីប្រមូលផ្ដុំមួយនៅទីក្រុងម៉ានីល កាលពីថ្ងៃម្សិលមិញនេះ នៅចំថ្ងៃប្រារព្ធខួបលើកទី ៣១ នៃថ្ងៃបដិវត្តន៍អំណាចប្រជាជន ដែលបានទម្លាក់មេដឹកនាំផ្ដាច់ការ លោក ហ្វឺឌីណាន់ ម៉ាកូស។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រុមប្រឆាំងនឹងលោក ឌូទើតេ បានបង្ហាញពីសង្គ្រាមប្រឆាំងគ្រឿនញៀនដ៏ឃោឃៅរបស់លោក ឌូទើតេ ដែលបានប្រទេសហ្វីលីពីនបែកបាក់។
ចំណែកក្រុមអ្នកគាំទ្រ បានរៀបចំពិធីកោតសរសើរដល់ប្រតិបត្តិការបង្ក្រាបគ្រឿងញៀនរបស់លោក ឌូទើតេ ដែលទើបតែមានអាយុកាល ៨ខែប៉ុណ្ណោះ។ ពិធីប្រមូលផ្ដុំនេះ បានទាក់ទាញមនុស្សចូលរួមធំបំផុតដល់ទៅ ២សែននាក់ ដែលនេះជាការប៉ាន់ស្មានរបស់ប៉ូលិស។
រដ្ឋមន្ត្រីយុត្តិធម៌ហ្វីលីពីន លោក វីតាលីណូ អាហ្គីរ៉េ បានប្រាប់មហាជនថា វត្តមានរបស់ពួកគេ បានបង្ហាញនូវការគាំទ្រដ៏រឹងមាំទៅដល់ប្រធានាធិបតី។
ប្រធានាធិបតីហ្វីលីពីន លោក ឌូទើតេ បានឈ្នះការបោះឆ្នោតកាលពីឆ្នាំមុន បន្ទាប់ពីសន្យាអំឡុងយុទ្ធនាការឃោសនាបោះឆ្នោតថា លោកនឹងលុបបំបាត់គ្រឿងញៀនចេញពីសង្គម តាមរយៈការសម្លាប់មនុស្ស ១ម៉ឺននាក់។
លោកបានចាប់ផ្ដើមប្រតិបត្តិការនេះ បន្ទាប់ពីលោកឡើងកាន់តំណែងជាផ្លូវការកាលពីខែមិថុនាឆ្នាំមុន ហើយប៉ូលិសរាយការណ៍ថា ជនសង្ស័យពាក់ព័ន្ធនឹងគ្រឿងញៀនជាង ២៥០០នាក់ និងមនុស្សផ្សេងទៀតប្រហែល ៤ពាន់នាក់ ត្រូវបានគេសម្លាប់នៅក្នុងស្ថានភាពដែលគ្មានការបកស្រាយ៕